MOATLEM 15
15
Jeroselem nâng Ngoangthun
1Judia wah Antiok nâng mihnyan heh khuthe hûlahma putedâlemte hehnâng, “Mosa Niemarang junko nema khoankhen niempa lehôan kenko kho lepemin,” ngama hethô wah. 2Pol ngale Barnabas nii are junko ereheh demnâng nyahrãng chaanchhiakmîn wah, ephumma Pol le Barnabas ngale Antiok wah mihnyan khuthe Jeroselem nâng wãng lahma moattat chhoante heh demnâng erejunko thômîn wah.
3Thin lemko Asâthem hehma sênkatwah; ngale thin Fonika ngale Samaria ma danka lahma Jews ledangte chenroh Joban nâng putedâlemte rãng dangeka erengin heh thinnâng thôthien kohwah; Are ngin pa tatlahma chentô putedâlemte heh nyahrãng khuhah nâhah dângwah. 4Chenthu thin Jeroselem nâng hokphumma, Asâthem hehma, moattat chhoante, erediko khhepho phannang hehma khuhah nâhah tângroo wah, ngale thinjunma Joban ma chentô moatlem motah a ereheh thinnâng thôkoh wah. 5Phumma Farasi jatwah putedâlemte wathe toanchep lahma ngatwah, “Jews ledangte hehma khoankhen niempa hôanmin, ngale thinnâng Mosa Niemarang pa keprãng thôkohmin.”
6Moattat chhoante ngale khhepho phannang heh are nginpa phênthômîn rãng khôanwakwah. 7Ajahthem lekchiakmîn diko Piter toanchep lahma ngatwah, “Lemruchha heh, nemajet, melâng rangpâ mako, nekhuchhang wah Joban ma nga Jews ledangte hehnâng Nginkongsen pa thôchhoan kohrãng renwah, erohwah thinma chohtat lahma putedâlem wakeka. 8Ngale anga nga hung arin lepjette Joban pumma nãngnâng kohthi rãngrãng atema Jews ledangte hehnângmin Asâthôanju kohlahma kepeka. 9Atema thin ngale nãngkhu tungko chenjô mâmâ hôanmahhi; atema thinpap heh map koheka chenrãngma ngako thinmemin putedâlem eka. 10Ephumma nema Jews ledangte putedâlemte hehnâng nãngte nãngwa hehmemin ngale nãngdede memin letahenli hênlihpa henthuk letma Joban nâng chenrãngma thatsu eken a? 11Eroh dangmah! Teso Jisu mînchenchaan ko putedâlem lihma nãng khope eki rãngrãng jôba thin khomin pe eka.”
12Barnabas ngale Pol niima Jews ledangte heh tânâng Joban ma patritli ngale bâritli moatlem chentô motah heh thôkoh phumma mihnyan heh phangtang kihchepchep tôngwah. 13Chenthu thinma thôkoh diko, Jems ma loatjabwah: “Nga lemruchha heh, nganâng jetat tanha! 14Joban ma Jews ledangte hehnâng hunlahma atenâng putedâlemte mihnyan rãng chenroh kepeka ereheh Simon ma arohroh nãngnâng lâthô kohthi. 15Mõng heh jabpa areheh demko toangtang dangeka. Joban nyapraangma aroh ngaeka,
16‘Teso ma ngaeka, Arediko, nga engak karâng,
ngale Devit Hahsông pa engak khôansiet ang.
Ngale chhihjâ rekapa ngama ngakhôan lekma amãnmãn engak rõngsiet ang.
17Ngale chentô mihnyan jat apat heh ngatânâng ehûra,
ngale Jews ledangte jat ngadede mihnyan rãng chentô rootek hehmin ehûra.
18Arepa Teso ma jabeka, ngale atema areheh khema thuma jetthukwah.’
19Jems ma thôkoh wah, “Ngama thonghun junko, Jews ledangte Joban tânâng hunglit lahma hokte hehnâng nãngma lechêm thukmin. 20Erenoma, moangachang nâng kohwah phhekchhah, chenpa nãngniem junko achin ngaeki heh nekphhek chhah en ngama sitiwah raange; ngale dihiak dela tungnâng kaamchhih moatte, ngale bohkorep lahma ritphewah ngemheh lephhekrãng, erediko hei lephhekrãng sitiwah raange. 21Chenrãngma ngako Mosa Niemarang pa chenthu thuma Sanagog nâng Joban pientôngjâ roakweih loatweihwah, ngale ate Jabkhab pa chentô hahdaang hehnâng phoangthôwah.”
Jews Ledangte hehnâng Siti raang
22Erediko moattat chhoante ngale khhepho phannang heh, ngale Asâthem heh phangtang roamlahma thinkhuchhang wah Pol le Barnabas nii demnâng Antiok nâng chienkatrãng thômîn wah. Thinma putedâlemte hehma nyahrãng senchoh mihnyan wanii rênwah, erepa Juda atenâng Barsabas ngamemin roowah, erediko Silas nii renwah, 23ngale are sitipa raang lahma thinnâng matkatwah:
“Ni, moattat chhoante ngale khhepho phannang heh, ngale nekhu pho anaa hehma Antiok nâng, Syria, ngale Kilikia wah Jews ledangte hehnâng salem matkat eka. 24Nima chohtat eki, nikhu tâwah mihnyan khuthe hûlahma nenâng nyahrãng hungke thuk lahma chêmthuk ehèn ngama; rohkomin nima thinnâng aroh moatrãng chienmih. 25Ngale erohwah nikhu thômîn lihma phangtang hungjut lihma netânâng nginmatte chienkatrãng thômîn eki. Thin a nangpho Barnabas ngale Pol nii demnâng ekawakra, 26Pol le Barnabas niima thin roandôngpa Teso Jisu Krista moatlem moatrãng lâkohtah. 27Ngale nima Juda ngale Silas niimin netânâng chienkat erii, nima are sitiko raang ekipa thinma nenâng phoangphoang hûlahma ethôkoh hèn. 28Asâthôanju erediko ni jutlihma are alemli niemarang heh leko lihân henlih nenâng lelê hènthuk turãng thonghun eki: 29Moangachaang nâng kohwah phhekchhah nekchhah en; hei nekphhek en; bohko replahma ritphewah ngem nekphhek en; dihiak dela kaamchhih nekmo en. Nema arerãngrãng heh lemo medang enko nerãngma asen edanga. Asen tuta chendangen.”
30Nginmatte heh chienchhoan lahma Antiok nâng katwah, phumma thinma putedâlemte heh phangtang khôansiet lahma thinnâng sitipa chohkoh wah. 31Chenthu mihnyan hehma sitipa weih phumma, hungdôngli ngin heh chohweih waklahma khuhah nâhah dângwah. 32Juda le Silas niimin mõng dângwah, phumma thin demnâng nyahrãng lekjabmîn lahma rîn akhah wah. 33Thin demnâng poatthe tôngthien diko putedâlemte hehma Juda le Silas nii khuhah nâhah sênchhoanwah, ngale atenii chienkatte heh tânâng ngakwâng wah.#15.33: wanwanthe ma vars 34 pa johraang eka: Rohkomin Silas lengak wãngtu thangma enâng jektôngwah.
35Pol le Barnabas nii melâng rangwo Antiok nâng tôngthienwah ngale mihhan ajahthem heh demnâng roamlahma thinma Teso nginpa phoangthô lahma hethô wah.
Pol le Barnabas Phanmin
36Jâthe jânii dinâng Pol ma Barnabas nâng ngatwah, “Chentô hahdaang hehnâng nãngma Teso ngin phoangthô kotih putedâlemte heh tânâng, ngakchhoan lihma chenroh songtong eka heh phoangsû chhoan e.” 37Phumma Barnabas ma thin demnâng Jon Mak johsietchhoan hunwah, 38rohkomin Pol ma Jon Mak johsietchhoan pa senmah ngama thônghun wah, chenrãngma ngako, khebengko Jon Mak thin demnâng lemra laangriri lejohkhoam thangma atenii Pamfalia nâng phethien lahma ngakchhoanwah. 39Phumma atenii nyahrãng chaanchhiakmîn lahma phânmînwah: Barnabas ma Mak sietlahma Sipras nâng katwah, 40Pol ma Silas sietlahma chhoanwah, phumma Antiok wah putedâlemte hehma Teso deknâng chohkoh lahma chienchhoan wah. 41Atea Siria ngale Kilikia ngenâng katwah, ngale enângwah Asâthem hehnâng chohsok katwah.
Currently Selected:
MOATLEM 15: NOKTBSI
Highlight
Share
Compare
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
