MOATLEM 16
16
Pol le Silas Nii demnâng Timothi Johchhoan
1Pol Dirbi le Listra ngenâng katwah, phumma ere ngenâng Kristan mihnyan wathe Timothi ngama songlahma dângwah. Ate nyong min Kristan dângwah, rohkomin atea Jews dângwah, phumma ate wapa Griik dângwah. 2Listra ngale Ikoniem wah Kristan mihnyan hehma Timothi asen ngama thôwah. 3Phumma Pol ma Timothi ate demnâng johsietchhoan rãng hunwah, erohwah atema Timothi nâng khoankhen niem hôankohwah. Chenrãngma ngako enângwah sôngte Jews phangtangma Timothi wapa Griik ngama jetphumma Pol ma Timothi nâng khoankhen niem hôankohwah. 4Thinma sumhah heh dânkhôamko moattat chhoante le khhepho phannang hehma Jeroselem nâng pattah niemarang heh chentô Asâthem hehnâng phoang hethô wah, ngale ere niemarang heh kepletma tongen ngama phoangthô kohwah. 5Erohwah Asâthem heh putedâlem nâng jêngdong dongwãng ngale jêngsen senwãng dângwah ngale putedâlemte hehmin jêngjah jêngjah rewah.
Tros Hahnâng: Pol ma Thânkhe
6Asâthôanju ma Asia diak ngenâng Joban nginkongsen pa lethôthuk dâng phumma thin Phergia le Galatia ngenâng katwah. 7Chenthu thin Mysia jatrii nâng hokphumma, thinma Bithania diak ngenâng wângrãng phungwah, rohkomin Jisu Juma thin enâng wãngthuk ho. 8Ephumma thin dekchah ngema Mysia hah dankat lahma#16.8: dekchah ngema dânkatwah; ba dânkatwah. Tros nâng katwah. 9Erejâ rangpenko Mesidonia wah mihnyan toanchep lahma atenâng rosep kalahma Pol ma thânkhewah, “Mesidonia nâng wãnglohma ninângmin mamchohsû wãng mênghi!” 10Pol ma erepa thânkhe rienrien ni Mesidonia nâng wângrâng cheplihma loatchhoan wah, chenrãngma ngako nima enângwah mihnyan hehnâng Joban Nginkongsen thôkohrâng Joban maroo ehi ngama jetwah.
Filipien Hahnâng: Lidia Hunglit
11Tros wah jogari ma chhoan lihma Samothrace nâng tintin katwah, ngale eredijâko Niepolis nâng katwah. 12Erekowah ni Filipien nâng katwah, Filipien pa Mesidonia diak kowah khebeng thôan Distik ngale alemthôan hah dângwah;#16.12: Mesidonia kowah khebâng thôan distik ngale alemthôan hah; wanwanthe ma arepa johraang eka Mesidonia Distit kowah alemthôan hah, ba Mesidonia diakko alemthôan hah. ngale are hah pa Roman mihnyan heh sôngthin hah dângwah. Phumma eretheko ni melâng rangwo tôngthienwah. 13Pientông jâko josikah nâng Jews heh khôan lahma rangsoam thinthe etongthem a ngama thonghun lihma ni josi kahnâng katwah. Phumma erethe kowah dihiaknyu khôantongtah heh demnâng johtong kalihma thin demnâng thômîn wah. 14Thinkhuchhang wah ni nginkepte pa Thiatira hahwah Lidia dângwah, atea khetchek sengte dângwah. Atea Joban linlin nâng soam atôte dângwah, ngale Pol ma thôeka nginpa jetatrãng ate hung Teso ma laangkohwah. 15Atema ngale ate hum wah mihnyan hehma baptijem kepdiko, Lidia ma ate humnâng ni roowah, “Nema nganâng linlin Teso nâng putedâlemte ngama methonghun theko nga humnâng tongwãngren.” Ngale thinhumnâng wângrãng atema ninâng roatsep wah.
Filipien Hah wah Phâtek nâng
16Jâthe ni rangsoam thinnâng katko janchhônya wathe atea mihhaa dângwah erepa chohmînwah, phumma atema juchhih ngewah chaanchoh lahma khediko chenni dângmin a erengin heh jienthô lahma dângwah. Atema khediko dângwângmin ngin heh phoangthô kolahma ate tângte rãng ngun akem heh jahmõang chohbi kohwah. 17Ere janchhônya pa raklahma Pol le Silas nii diko junkhôamwah, “Are mihnyan niia achoang thôanwah tôngte Joban haa! Ate niima nekhu chenroh khope min a erengin heh thôkoh ehèn!” 18Janchhônya pumma Pol khoan lânpunroh are nginpa melâng rangwo rãng phoangjabwah, Phumma Pol nyahrãng khoanpun lahma litphong lahma ere juko ngatwah, “Jisu Krista mînko ngama nangnâng are janchhônya kowah loatchhoan o ngama chien eki!” Phumma ere sanpoat poatko janchhônya kowah jupa loatchhoan wah. 19Chenthu janchhônya tângte pumma thinma ngunbi lemkhô pa ahotu ngama jetphumma, thinma Pol le Silas nii lolahma nok atang ngale thôte jabte heh tânâng siethokwah. 20Thinma Roman adong heh tânâng siethû lahma ngatwah, “Are heh a Jews, ngale thinma ni hahdaang pa jamsiet eka. 21Thinma nãng niemarang heh lelatnâng phoanghethô eka; Nia Roman mihnyan, ngale nima are niemarang heh jienkepmih.” 22Ngale mihnyan phangtang Pol le Silas nii lelatnâng chepwah.
Erediko Roman thôte jabte adong hehma Pol le Silas nii khet koakphe kolahma watthukwah. 23Chhihmõang buhawat diko, thinma phâtek nâng sekwah, ngale phâtek bemte hehnâng kitkit sekthien en ngama chienwah. 24Are nginpa tatphumma phâtek bemte hehma thinda tungko bãnglengdong khhek lahma akhen thôanko sekwah.
25Rangpen mongtangko Pol le Silas niima rangsoam nungma Joban nâng rangsoamsê selahma dângwah, ngale thindemwah khhekritte ahan hehma atenii nâng jetat lahma dângwah. 26Phumma lemlienma hahtiidong tiihû lahma phâtek pa hahkhenma chhihjâwah. Ngale lemlienma chentô kâsek heh laangjâ rewah, ngale khhekritte heh dekwah janru heh jânjâ rewah. 27Phâtek bemte pumma kâsek heh laangjâ choan khewah, atema phâtek wah mihnyan heh huhchhoan themtah ngama thonghun lahma ate dãngpa toanlahma atedede ritpheritrãng phungwah. 28Phumma Pol chaanmõang raklahma ngatwah, “Nangdede nekrit pherii, nikhu phangtang ako tonge!”
29Phâtek bemte pumma wenphiaktan en ngama ngatwah, erediko ate humkhen nâng chhoanwãng lahma Pol le Silas nii dathongko khupjup wângwah. 30Erediko atema rangsâ nâng loatsiet katlahma ngatwah, “Hethôte, ngama khope rãng chenni moatmin a?”
31Thinma dânthâng wah, “Nangma Teso Jisu nâng putedâlem o, erohkoba nang khomin epeo, ngale - ne humte tangkâ heh khomin epea.” 32Erediko thinma atenâng Teso jabkhab pa thôkoh wah, ngale ere hum wah mihnyan heh phangtang nâng thôkoh wah. 33Erejâ rangpen ere sanpoat poatko phâtek bemte pumma sietchhoan lahma thin mâmãn heh sâsiet kohwah; ngale ate erediko ate humte tangkâ heh phangtang lemlienma baptijem kepwah. 34Erediko atema Pol le Silas nii ate humnâng sietwên lahma thinnâng phhekchhah kohwah. Ate ngale ate humte tangkâ heh nyahrãng khuhah nâhah dângwah, chenrãngma ngako thinma Joban nâng putedâlem wakeka.
35Eredijâ rangkhahko Roman thôte jabte adong hehma, “Are mihnyan heh chhoanthuk en,” ngama phâtek bemte nâng thôkoh rãng sipâhi heh chienkatwah.
36Ephumma phâtek bemte pumma Pol nâng thôkoh wah, “Roman thôte jabte adong hehma Silas nechhe chhoanthuk rãng ngin matkat era. Nechhe ade phumma tachhoan en, ngale khuhah nâhah chhoan en.”
37Phumma Pol ma sipâhi sahhabko ngatwah, “Ninâng chenmin athe lechohlo komin thinma nok atang heh mako watthi - ngale nimin Roman jat jôba! eroh komin thinma phâtek nâng sek ehi. Ade phumma thinma ahuh chhama chienchhoan rãng hun ehia? Nia eroh ahuh chhama huhchhoan mih! Roman thôte jabte adong heh thindede kalahma chenchhoan thukhi.”
38Sipâhi sahhab pumma erengin pa Roman thôte jabte adong hehnâng thôkoh wah; ngale chenthu thinma Pol le Silas nii Roman jat ngama tatphumma chei rewah. 39Ephumma thinma kalahma Pol le Sailas niiwah map thâkatwah; erediko thinma phâtek wah loatsiet lahma thinhah kowah chhoanthuk wah. 40Pol le Silas nii phâtek wah loatchhoan lahma Lidia humnâng katwah. Enâng thinma putedâlemte heh demnâng chohmîn lahma thinnâng hungdông ngin heh thôthien kolahma erehah kowah loatchoanwah.
Currently Selected:
MOATLEM 16: NOKTBSI
Highlight
Share
Compare
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
