MOATLEM 26
26
Pol ma Agripa Mathahko Ate Dede Junma Jabwah
1Agripa ma Pol nâng ngatwah, “Nangma nangdede junma jabthin metong hoko tajab o.” Phumma Pol ma ate deklaang lahma aroh jabwah:
2“Lowang Agripa! Thejâ ngama nang mathahko cheplekma Jews hehma sekham ehang junko ngadede rãngma chohjab pa khengraangsen ngama thonghun ekang, 3Nangma senthemthem ajet Jews heh niemarang ngale thin chenjunko chhiakmîn ekapa. Erohwah, hungmông sietlohma jetat mênghang ngama rosep eki.
4“Leta thuma nga chenroh songtongtek a ereheh chentô Jews hehma jethang. Khebengko nidiak nâng, erediko Jeroselem nâng nga roangdong chenroh dongtek a ereheh thinma jet. 5Thinma khema thuma ajet, ngale thinma thôhun medang ako tathô kohho, nga khebeng thuma nãng rangsoam niem pa senthemthem keplekma tôngwah, ngale nga Farasi dângwah. 6Ngale thejâ nga aretheko chepkangpa Joban ma nãngte nãngwa hehnâng toamhoantah nginko putedâlemdi sekhamrãng chepekãng - 7arepa chohrãng jôba nãng echhi jatnii mihnyan tonga hehma Joban nâng dâlem lahma, rangwo rangnyek soamtô eka. Ngale Lowang Agripa, ngama ereko putedâlemdi jôba are Jews hehma sekham ehang! 8Chenrãngma arekowah tôngte nekhuma Joban ma riichoante heh ngakhinsiet eka ngama leputedâlem reken a?
9“Ngadede memin Nazarat wah Jisu lelatnâng chentô tatamo angpa moatrãng thônghun wah. 10Ngale ngama Jeroselem nâng eroh motek. Ngale Soam aroakte adong hehma chaan kohlahma ngama Joban mihnyan heh jahmõang phâtek nâng sektek; ngale chenthu thin ritphe rãng nginpatko, ngamin thin lelatnâng jabtek. 11Melângdep ngama Sanagog hehnângmin chêmsiet lekma thin putedâlem jeksietkrãng thatmotek. Nga thin demnâng cheili rinkhah lekma mihdiak nângmin thin chêmsiet rãng chhoanwah.
Pol ma Ate Litjâ Nginthôkoh
(Ml 9.1-19; 22.6-16)
12“Soam aroakte adong hehma nganãng chaan kohlahma thin hôkum pa keplekma Damaskas nâng putedâlemte chêmsiet rãng katwah. 13Adongthôan Lowang Agripa, ngihmongko lemnâng dângpoatko, ngama san nomemin phiakdong, rangkho wah nga ngale ngademwah mihnyan heh tumlitko phiakkat lahma khewah. 14Phumma nikhu phangtang hahko kôanjâwah, ngale nganâng Hibru jabma ngalahma tatwah, ‘Sol, Sol! Nangma nganâng chenrãngma chêmsiet ehanga? Mânpong pumma ate tângtewa thankahko dama ngakphinkat rãngrãng, nangdede nângba ngakwatrii eko.’ 15Phumma ngama chhienwah, ‘Teso, nanga hen a?’ Ngale Teso ma dânthâng wah, ‘Nga a Jisu, nangma chêmsiet ehangpa. 16Rohkomin satlohma nang dama chep o. Nanga ngahaa dângthukrãng nang demnâng chohmîn eki. Nangma thejâ nga chenroh khethanga erepa#26.16: wanwanthe ma nga ngama raangmahnga junma. thejâ ngale khedi kowah ngama nangnâng khesokmin hehmin mihnâng phoangthô kohmin. 17Ngama nanga Isrial mihnyan ngale Jews ledangte heh tânâng echienchhoan e, Ngale thinwah pepâng lihma ethien e. 18Nangma thinmit kânsiet kohmin ngale rangnyek khenwah rangwo nâng loatsietmin, ngale joak ajo khenwah Joban tânâng loatsietmin, erohkoba thinma nganâng putedâlem junko thinpap heh map chohlahma Joban mihnyan heh chhangnâng thinthe echoh a.’
Pol ma Ate Moatlem heh Thôkoh
19“Ngale Lowang Agripa, Ngama rangkhethung wah thânkhetek pemin lekep jiendângmek. 20Ngama khebengko Damaskas nâng, ngale Jeroselem erediko Judia diaktang wah Jews ledangte hehnâng, Ngama thinpap wah hungngaklit letma Joban tânâng ngakhû ren, ngale papwah hung littih ngama kheli moatlem mo en ngama phoangthôkoh ekang. 21Are rekwah nga Rangsoamhum nâng dângpoatko are Jews hehma loehang, ngale ritphe rãng hun ehang. 22Rohkomin thejâ tôko Joban ma Nganâng chohsû ehang, ngale erohwah Ngama thejâ ako cheplekma, adong arin chentô nâng khoaktheko thôkoh eka. Ngama chenni ngaekãnga erepa Mõng hehma ngale Mosa ma jabtah pa dângwâng ngin pejôba jabekang: 23Misaia pa metkep chêmmin ngale ritwah khebeng thôan ngaksat lahma, khope wenphiak nginpa Jews ngale Jews ledangte hehnâng phoangthô kohmin.”
24Pol ma atedede junma aroh thôkoh poatko, Fistus ma atenâng rakkatwah, “Pol, nanga apa reko! Nangma nyap ajah weiheko pumma apa thukre eho!”
25Pol ma dânthâng wah, “Adongthôan Fistus! Nga apa dangmek, Ngama toangtang jabkãng. 26Lowang Agripa! Ngama nangnâng phangtang loatthôkoh eki, chenrãngma ngako, nangma areheh ajet. Ngale Ngama thonghun ekang, nangma are chentôpa lâtattoh, chenrãngma ngako, areheh bin abe thenâng huhdâng dangwah. 27Lowang Agripa, nangma Mõng hehnâng putedâlem ekole? Ngama ajet nangma putedâlem eko!”
28Agripa ma Pol nâng ngatwah, “Aretô sanpoat thoanchhako nangma ngamin Kristan dângthuk hun ehanga?”
29Pol ma dânthâng wah, “Sanpoat thoanchha dangkolah alonyong dangkolah,” “ngama Joban nâng rangsoam pa nangmin ngale thejâ are thekowah ngangin jetatte hehmin phangtang nga rãngrãng chendangen ngama soam ekang - rohkomin, are janruko nga khhekrii ekang rãngrãng khhekrii en ngama soam dangmek!”
30Ephumma Lowang, Govono, Bernic, ngale ahan hehmin phangtang tôanchepwah, 31ngale erekowah loatchhoan diko thin jabmîn wah, “Are mihnyan pumma ate lanrit pheroh ba phâtek nâng lânsekroh chenjô chhihmomah.” 32Ngale Agripa ma Fistus nâng ngatwah, “Are mihnyan pumma Chofa nâng lerosep ngako lanta laangpheroh dângwah.”
Currently Selected:
MOATLEM 26: NOKTBSI
Highlight
Share
Compare
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
