MOATLEM 27
27
Jogarii ma Pol Rom nâng Chhangkat
1Chenthu nia Jogarii ma Itali nâng katrãng ngatko, thinma Pol ngale ahan phâtek nâng tôngte heh Julius, “Chofa Regimen” ngamemin eka Roman regimen sahhab nâng kohwah. 2Nia Adramitiem wah jogari ko chhangwah, erepa Asia diakwah jogari chepthin thenâng katrãng cheplahma dângwah, ngale erepumma ni chhoanwah. Thisalonika wah Mesidonia mihnyan Aristakus, pa nidemko dângwah. 3Eredijâko nia Sidon hahnâng hokwah. Julius pa Pol demnâng asen dângwah ngale ate lemru heh demnâng Pol chohmînchhoan thukwah, ngale atema chenni lemeka erehehmin chohkoh thukwah. 4Nia Sidon hahwah loatchhoan wah, ngale pôngpa ni ngenâng metwah, pông lemetthe jotungwah Sipras hah ngenâng katwah. 5Nima Kilikia ngale Pamfalia wah josi heh danlihma Likia wah Mira hahnâng katwah. 6Eko sipâhi sahhab pumma Alexendra wah Itali nâng katte jogari chohwah, ephumma atema ni ereko chhangthukwah.
7Jogari pumma rere chhama melâng rangwo chhoan lihma Nidas hahnâng hokwah. Phumma nia ere ngenâng pôngma wãngthuk tuho, ephumma Salomi hah danlihma, pông lepongthe jotungwah Kret hah ngenâng katwah. 8Nima jokông kôngma nyahrãng chêmlihma jogari pechep thinthe ngama ngaeka theko hokwah, erethepa Lasia hahwah chentô letaangko dângwah.
9Eretheko nia rangwolo tôngthienwah, ephumma nia jogari ma chhangchhoan pa nyahrãng acheili dângtuwah, ngale ere sanpoat pa Jews hehma lejok phhekchhah thangma#27.9: pap rãngma lejok lechhah ma rangsoam sanpoat: Arepa Setemboat dâjang athôan chînâng ngale October dâjang khebeng nâng kepeka, ere rangkuhko jo garii nâng chhangpa acheili rângdanga. rangsoam sanpoat pa lienchoan dângwah. Ephumma Pol ma thinnâng aroh thôkoh wah: 10“Mihnyan heh, ngama nãng arethe kowah loatchhoan pa nyahrãng acheili khekãng; Jogarii ngale sêmmak hehmin ajahthem eta chhihjâa, ngale nãngmin eta mahriie.” 11Rohkomin sipâhi sahhab pumma jogari kepten ngale tângte nii ngin keplahma, atema Pol nginlekep dângwah. 12Erethepa rangpa ko jogari cheprãng lesen dângwah; erohwah chentôma jogari pa ere thekowah loatchhoan lahma Fonik hahnâng hokkat hunwah, meta dangako, rangpa pa enâng tônghun wah. Fonix pa Kret diaknâng jogari chepthinthe, erethepa dekhit wah sannyup ngale dekchah wah sannyup nângmin ama tuta ngiak lahma dângwah.#27.12: dekhit nângmin sannyup ngale dekchah nângmin sannyup; ba dekchah wah sankat ngale dekhit wah sankat.
Josi Mongnâng Pôngdong Patdong
13Dekhit wah pông bângwut hokwah, ngale mihnyan hehma nãngma huntih pa eta danga ngama thônghun wah, ephumma thinma jogari chepbenthin janphak pa putphe waklahma Kret hah kekema repkatwah. 14Phumma lemlienma pôngchaan mõang - “Dekchah ngewah pông” - ngama ngaeka pa jotungwah hah kowah pônghokwah. 15Erepông pumma jogari ko metwah, ngale jogari pa pôngthunko amanâng leta wãngtu dâng phumma, lechêm thatreptu thangma pôngma chennâng metchhoan eka eroh metchhoan thukwah. 16Nima jotungwah Kauda hah arinchha pa danlihma pông lemetthe roanche chohwah. Eretheko, nima jogari kowah khôankho pa, chaanma mampesiet wah. 17Thinma jo khôankho pa jogari ko sekwên lahma ruma jogari ko kitkit khhekwah. Thinma jogari pumma Lidia jowah senâng matunglih o ngama cheiwakwah, ephumma jogari kowah pông pûnwutthin pa numsiet lahma pôngma chenroh metchhoan eka eroh metchhoan thukwah. 18Pôngpa lejek thangma nyahrãng cheili pôngwah, ephumma khedi jâko thinma Jogari kowah sêmmak khaka toanphewah, 19ngale eredijâ komin thinma jogari sêmmak heh wahmin khaka patphewah. 20Melâng rangwo nima sanmin, ngale meritmin chohkheho, ngale pông pemin lejek thangma nyahrãng chaanpôngwah. Nimin bâmpe tumih ngama thônghun wah.
21Jogari kowah mihnyan heh lephhekchhah thangma melâng rangwo dângdiko, Pol thin mathahko toanchep lahma ngawah, “Mihnyan heh nema ngangin kepletma Kret wah leloatchhoan nomako; nãngma are sêmmak hehmin lemahphe minwah ngale lechhihmin wah. 22Rohkomin ngama nenâng rosep eka, hung nekchha en! nekhu henmin leriimin; jogari loloba echhihjâa. 23Thepen Ngama soam ekang ngale Nga aterãng hin ekang Joban ngintatte ngatânâng kalahma 24nganâng thôkoh ehang, ‘Nekchei, Pol! Nanga Chofa tâko metkep chepmin. Ngale Joban ma nangnâng mînchen lahma nangdemwah jogari kowah johchhangte hehmin epesiet a.’ 25Mihnyan heh! erohwah hung nekchha en, Ngama Joban nâng putedâlem ekang, Nganâng chenroh thôkoh thanga erohjô edanga. 26Rohkomin nãnga jotungwah hahnâng emethûhi.”
27Echhi pen beliijâ rangpen ko, nia pôngdong pumma Mediteranien josiko ditmetwah. Phumma rangpen mongko jogari repte pumma jokah lâhû themtih ngama thônghun wah. 28Ephumma thinma runâng athakthin khhek lahma joko chentôlu dangeka pa jetrãng chaamphe katwah. Phumma jopa roak belii mitatlu dângwah; Chuthe dikomin thatthak tahpa roakrem mitatlu dângwah. 29Thin a jogari pumma longnâng matunglih o ngama chei wah, ephumma jogari tokdi nge pumma janphak wanbelii joko chaamphe katwah ngale rangwo rãng rangsoam wah. 30Erediko arepte heh jogari kowah huhchhoanrãng phungwah; thinma jogari kowah khôankho pa joko jâsiet katlahma jogari khema ngema janphak heh chaamphekat e ngama diapdâng wah. 31Phumma Pol ma sipâhi sahhab ngale sipâhi hehnâng ngatwah, “Arapte heh jogari ko letong kako, ne leta pemin.” 32Ephumma sipâhi hehma khôankhoko thiet eka ruheh patdoak lahma khôankho pa chhoanthuk wah.
33Rangwo nemnemko Pol ma thinkhu anga nganâng chenni komin phhekchhah en ngama roatsep wah: “Thejâ tôko nema echhi jâbelii rangwo lâbemtet, eretô rangwo ko nema chenmin lephhekchhah ma lâdangtet. 34Erohwah, ngama, nenâng tâhînrãng; chenkomin phhekchhah en ngama rosep eka. Newah khochoo lathemin lemahmin.” 35Pol ma aroh ngatdiko, atema bankên roanche toanlahma, thin anga nga mathahko Joban nâng dangkoh a ngat rangsoam soam lahma, atema chhupsiet, lahma phhekwah. 36Thinhung dôngwah, ngale thinkhu anga ngama phhekchhah roanru chhahwah. 37Nia jogari ko phangtang tungko 276#27.37: 276; wanwanthe nâng arepa 275 ngama raangeka; ahan hehnâng 76 tôrãng ngama raangeka. rãng chhang lihma dângwah. 38Anga ngama phoatphoat phhekchhah diko, thinma jogari pa chenchãa ngama chhah heh phangtang joko phekatwah.
Jogarii pa Chhihjâ
39Rangwo komin arepte hehma jopha pa jetloho, rohkomin thinma jotungnâng chihthienwah jopha lepkhewah, phumma meta dangako, thinma jogari pa eretheko chepthukrãng thônghun wah. 40Ephumma thinma ruheh patdoak lahma janphak heh joko thumjâkat thukwah, ere demdemko jogari pûnchhoan thukrãng ama ngeko khhek ekaru hehmin jânwah. Erediko pôngma jogari pa ama ngenâng chenmetwên a ngama pông pûnmetthin pa ama ngeko laanglihma, jophanâng repwênwah. 41Rohkomin jogari pumma sekhohnâng tunglahma mânritwah; phumma ama ngepa chhihjâ lahma lejien phongtu dângwah, ngale khedi nge pemin jowaak chaan pumma chhupchhup chhachha lândangroh chhihsiet wah.
42Phumma akhhekte heh sârannâng danju lahma môang huhchhoan a ngama sipâhi hehma phangtang ritphe rãng thônghun wah. 43Rohkomin Sipâhi sahhab pumma Pol pepâng hunwah, erohwah atema leritphe thuk wah. Enoma henhen jojûjet a ereheh jogari kowah jâtoakka letma sârannâng bengdãn juwãngen ngama chienwah; 44khaka hehma bãngkha hehnânglo, erediko jogari wah chhupjâeka hehnâng lolahma jûnjû wângwah. Ngale eroh relihma nikhu anga nga sârannâng pehokwah.
Currently Selected:
MOATLEM 27: NOKTBSI
Highlight
Share
Compare
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
