MOATLEM 28
28
Malta Hahnâng
1Chenthu ni sâran nâng senthemthem pehok diko, nima jotungwah hahpa Malta hah ngama jetwah. 2Ere hahwah mihnyan heh nidemnâng nyahrãng asen dângwah. Phumma rangpat hongpat lahma rangchhông dângwah, erohwah thinma wenthhek lahma ninâng wenko tôngrãng roowah. 3Phumma Pol ma chan roapthe khôantoan lahma wenko thhek thuko akham junko chan kowah pû hongloat lahma Pol dekko depwah. 4Ere hahwah mihnyan hehma Pol dekwah dep eka pûpa khelahma jabmînwah, “Are mihnyan pa mih ritphete dângmin dede, atea jowahjô mepe akomin, khengraang pumma atea lehinthuk tumin.” 5Rohkomin pû pumma atenâng lekek thangma Pol ma wenko jâhekwah. 6Thinma Pol nâng aphîn ba lemlienma hahko loangrii lahma eriia ngama thônghun wah. Rohkomin ajahthem sanpoatsok dikomin Pol nâng chenjô ledang khe phumma thinma ngakthônghun lahma ngatwah, “Atea Joban!”
7Erethe kowah chentô letaangko erehah kowah adongthôan Publius pit dângwah. Atema ninâng nyahrãng khuhah nâhah tãngroo lahma ate humnâng jârem tôngthienwah. 8Publius wa pa khun ngale heichhoan ma ate jupthinko dângwah. Pol ate jupthinko wãng lahma, ate khohko dekma sahlo lahma rangsoam kolahma mesietwah. 9Chenthu erepa sen phumma, jotungwah hah wah ahan khunte chentôpa hûlahma mesiet wah. 10Thinma ninâng hînhô jahmõang kohthi, ngale chenthu ni enângwah jogari ma chhoanrãng chepko, nima lemko chenlem ekia ereheh thinma jogari ko sekkohthi.
Malta Hahwah Rom nâng Hok
11Jengrem diko Alenxendra wah, “Joban wanii,” ngamemin eka jogari pumma ni chhang chhoanwah, erepa jotungwah hahko rangpa pa tôngkatwah. 12Ni Sirakas hahko hûlihma enâng jârem tôngthienwah. 13Erethe kowah wienchhoan lihma Rigium hahko hokwah. Eredijâko dekhit wah pông hôngpông hokwah, ngale jânii khenko ni Putioli hahko hokwah. 14Enâng nima putedâlemte mihnyan roanche chohmin lihma thin demnâng haptathe johtôngrãng rosepthi. Eroh relihma ni Rom nâng hokwah. 15Rom wah putedâlemte hehma ni ngin tatlahma Apius hahwah phin athã sengthe ngale Hum Dângrem ngaeka hah tôko kalahma nidemnâng chomîn katwah. Chenthu Pol ma thin khe phumma, atema Joban nâng dangkoh a ngatwah ngale nyahrãng hungdôngwah.
Rom nâng
16Chenthu ni Rom nâng hokphumma, sipâhi hehma bem lahma Pol atelolo songthukwah.
17Jârem diko Pol ma enângwah Jews khhepho phannang heh ngoangthun rãng roowah. Chenthu thin khôanhok phumma, Pol ma thinnâng ngatwah, “Ngalemru Isrial heh, ngama nãng mihnyan hehrãngmin chenjô lechhihmo ngale nãngte nãngwa heh niemarang min lechhihsiet nâng, Nga Jeroselem phâtek nâng khhek lahma Roman mihnyan heh deknâng koh ehang. 18Nganâng nginthôngpha diko, Roman hehma nga thinphe hunwah, chenrãngma ngako thinma nga lanrit pheroh chenmin chhihmo lekma chohkhe mahthang. 19Rohkomin chenthu erepa Jews hehma dan phumma, Ngama Chofa nâng roatsep wah, rohkomin arepa ngama nãng mihnyan heh lelatnâng chhihngatrãng dangmah. 20Erohwah Ngama nang demnâng chohmîn lekma jabmîn hunwah. Rohkomin linlinko, nga are janruko khhekrii ekangpa Isrial hehma putedâlem eka mihnyan rãng khhekrii ekang.”
21Thinma Pol nâng ngatwah, “Nima Judia wah nangrãngma chenni sitijô chohmih, ngale enângwah ni mihnyan kawak era hehmemin chenni nginjô thôkat mahra, ngale nangnângmin chenjô chhihthô mahho. 22Rohkomin nangma chenthônghun eko erepa nima chohtat huneki, chenrãngma ngako nima ajet chentô thenâng mihnyan hehma are nang johrôam eko heh lelatnâng chhhihjab eka.”
23Ephumma thinma Pol demnâng rangwo kahtok hôanwah, ngale ere rangwo jâko Pol tongeka theko jahmõang mihnyan hokwah. Rangkhah khowah rangnyek kotuk Pol ma thinnâng Joban Hahsông nginkongpa thôkoh wah, ngale atema Mosa Niemarang ngale Mõng hehma raangwah Joban ngin hehwah thakthô lahma mihnyan hehnâng Jisu junma thôkoh wah. 24Khaka ma ate nginpa putedâlem wah, rohkomin khaka hehma putedâlem ho. 25Ephumma thindede tungko nginthun lejut thangma dângwah, phumma thin phanchhoan mako, Pol ma thinnâng are jabkhab khabthepa ngatwah: “Asâthôanju junma Mõng Isaia ma nete newa hehnâng chentôsên ngatwah a! 26Atema aroh ngatwah,
‘Chhoan lohma are mihnyan hehnâng thôkoh:
Nema atatpa etat en, rohkomin lejet tatmin;
Nema asokpa esuen, rohkomin lekhemin,
27chenrãngma ngako are mihnyan heh hungpa bajâ tah,
ngale thinnâpa hap rewak eka ngale thinmitpa thup rewak eka.
Eroh ledang ngako, thinmitma khemin wah,
ngale thinnâ memin tatmin wah,
ngale thinhung memin chenjettah,
ngale thin a ngatânâng ngakhû lahma, Joban ma ngaeka,
ngama sênsiet minwah.’ ”
28Ngale pol ma jekthôwah: “Nema arepa jet en, Joban ngewah khope nginpa Jews ledangte hehnâng matchhoan eka. Thinma ejetat a!”#28.28: wanwanthe ma vars 29 pemin raangeka: Pol ma arepa ngatdiko, Jews heh thindede tungko nyahrãng chaanmênmîn lahma phanchhoan wah.
30Pânii rãng Pol ma thãkoh lahma erethe kowah hum wanthenâng sôngwah, ngale ere humko ate demnâng chohmîn hokte anga nganâng nyahrãng khuhah nâhah tângroo wah. 31Atema Joban Hahsông ngin ngale Teso Jisu Krista nginpa, lechei thangma ngale lesoang thangma phoang hethô wah.
Currently Selected:
MOATLEM 28: NOKTBSI
Highlight
Share
Compare
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
