MOATLEM 5
5
Anania ngale Safira
1Phumma ate mînpa Anania ngama mihnyan wathe dângwah, atema ate tangnyu Safira demko roamlahma thin chhahkhem wanthe sengwah. 2Roh-komin ate dihiak enii jutthômîn lahma ngun kowah khakapa thinrãng huhtôan lahma khakapa moattat chhoante heh deknâng kohhokwah. 3Phumma Piter ma atenâng ngatwah, “Anania, joak nâng chenrãngma pênrii ekoa, nangma chhahkhem sengtoh ngun kowah khaka huhtoan lohma Asâthôanju nâng chenrãngma diapchhah ekoa? 4Nangma nang chhahkhem pa maseng poatko erepa nangrãng dângwah; phumma nangma erepa seng dikomin ere ngunpa nangthiak rãngjô lethien ekoa. Nangma chenrãngma aroh thonghun lohma motoh a? Nangma mihnyan nâng diapchhah dangmoh - Joban nâng diapchhah eko!” 5Anania ma erepatat rienrien, ate loangjâ lahma ritwah; ngale erengin tatte heh phangtang chei wah. 6Phumma paangmihpho heh khuthe hûlahma ate mangpa doapwah, ngale pechhoan lahma bînchhoanwah.
7Koantarem diko, ate dihiak pumma chenni dangtah a erepa lejet thangma humkhen nâng hokwah. 8Phumma Piter ma atenâng chhienwah, “Nganâng thôkoh tanhang, nang tangwa nechhema chhahkhem sengtetko ngunpa are tôjô lechohtet a?”
Atema, “O,” “Are tôjôba chohtih.” Ngama dânthâng wah.
9Ephumma Piter ma atenâng ngatwah, “Nang tangwa nechhe punthômîn letma Teso Ju demnâng chenrãngma loam eken a? Nang tangwa mangbîn katte mihnyan heh athângheh kâsek thongko tonga, ngale thinma nangmin epekat ho!” 10Lemlienma ate dathongko kôanjâ lahma ritwah. Paangmihpho heh humkhenko wãng lahma riichoan khewângwah, ephumma thinma pechhoan lahma ate tangwa kêko bînkatwah. 11Asâthem heh phangtang ngale ahan henma erengin tatte heh nyahrãng cheiwah.
Apatritli ngale Abâritli
12Moattat chhoante hehma mihnyan heh tânâng melâng patritli ngale bâritli moatwah. Chentô putedâlemte heh Solomon Kânthong ngama ngaeka theko roamchohmîn wah. 13Mihnyan hehma chentôjô medongthô akomin, thin demnâng ledangwah heh henjô thin demnâng chinjoh chephûho. 14Rohkomin mihnyan heh thin demnâng ajahjah johdâng wah - Teso nâng putedâlemte heh dihiak dela anga nga johrû hokwah. 15Piter dânkhôam poatko ate dâpha pumma komin sahlahma chensen a ngama, mihnyan hehma khunte heh thin jupthinkhoh hehnâng ngale hemkhoh hehnâng pehû lahma lemkông hehnâng chîjupthien hokwah. 16Ngale Jeroselem kêanâ hah hehwah mihnyan hehma khun atamte le juchhih lupte mihnyan heh sietlahma hokwah; ngale ereheh phangtang sênwah.
Moattat Chhoante hehnâng Chêmsiet
17Ephumma Soam aroakte adongthôan le ate lemru heh, erediko Saduki hehma moattat chhoante hehnâng nyahrãng mitchekwah; ngale thinma moattat chhoante hehnâng sekhamrãng thômîn wah. 18Thinma moattat chhoante heh lokhhek lahma phâtek nâng sekwah. 19Rohkomin erejâ rangpenko rangwah Joban ngintatte ma phâtek kâsekpa lângphe kolahma moattat chhoante heh loatchhoan thukwah, ngale thinnâng ngatwah, 20“Rangsoamhum nâng wãngletma, mihnyan chentô nâng are roandông nyan nginpa thôkoh en.” 21Moattat chhoante hehma erengin pa keplahma rangkhah rangkhoma Rangsoamhum nâng wãng lahma mihnyan hehnâng hethô wah.
Soam aroakte adongthôan le ate lemru heh roamlahma Jews khhepho phannang heh demnâng ngoangthun dong thunrãng roowah; erediko thinma phâtekwah khhektah moattat chhoante heh nitânâng sietwênrên ngama ngin matkat wah. 22Phumma mihnyan heh phâtek nâng katahpa moattat chhoante heh phâtek khennâng chohkheka ho, phumma ngakwãng waklahma ngoang awang hehnâng thôkoh wah, 23“Chenthu ni phâtek nâng hokkhôamko, kâsek pemin kitkitsek lahma tonglatah ngale abemte hehmin phangtang kâsek tâko bem lahma tongla tah; phumma chenthu nima kâsekpa laang lihma sûtihpa akhennâng henjô chohkheho!” 24Chenthu Soam aroakte adong le Rangsoamhum bemte adong hehma erengin pa tatphumma, moattat chhoante hehnâng chenni dangeka ngama bârit wah. 25Erediko mihnyan wathe hûlahma thinnâng thôkoh wah, “Tattan en! Nema phâtek nâng sektet mihnyan heh Rangsoamhum nâng mihnyan hehnâng hethô lahma tonga!” 26Ephumma sahhab pumma ate sipâhi heh sietlahma loatchhoan lahma moattat chhoante heh ngakloat katwah. Rohkomin thinma lebuh lewat thangma sietwênwah, chenrãngma ngako mihnyan hehma longma moangpet hi ngama chei rewah.
27Thinma moattat chhoante heh siethû lahma ngoang awang heh tâko chepthuk lahma Soam aroakte adongthôan pumma thinnâng ngin chhienwah. 28Atema ngatwah, “Nima nenâng are mihnyan mînpa kepletma mihnyan hehnâng nekphoang hethôtu en ngama jektengtah dangmahne,” “Phumma sûtan en nema chenni moeken a! Nema Jeroselem phangtang nâng lâphoang hethôtet, ngale nema are mihnyan riitahpa nikhonâng phehun ehia!”
29Piter le moattat chhoante ahan wathe pumma dânthâng wah, “Nima mihnyan ngin kepnoma Joban nginba kepmin. 30Nema bãngphakko sema rittektet diko, Nite niwa heh Joban pumma Jisu ritwah ngakhinsiettah. 31Joban ma ritwah ngakhinsiet lahma, Isrial mihnyan hehnâng hunglit sanpoat kohlahma thinpap heh map kohrãng ngama ate dekchahko lemsênte ngale Pângte rãng dangthuk lahma tongthuk eka. 32Nima areheh mitma khelihma thôeki - ngale Joban ma ate nginkepte hehnâng hînhô rãng koheka Asâthôanju memin jeteka.”
33Chenthu ngoang awang hehma erengin heh tatphumma, thin nyahrãng rinkhah wah, ngale moattat chhoante hehmin ritphe rãng hunwah. 34Farasi wathe ate mînpa Gamaliel, ngale atea Niemarang hethôte, ngale chentô mihnyan hehma atenâng nyahrãng choangpe lahma dângwah, phumma ere mihnyan pa ngoang awang heh chhangko toanchep lahma moattat chhoante heh poatthe rãng rangsâ nâng sietchhoan en ngama chienwah, 35ngale erediko atema ngoang awang hehnâng ngatwah, “Nga lemru, Isrial mihnyan heh, jetletma mo en, nema are mihnyan hehnâng chenni rerãng ngaeken a. 36Nema thonghun ekenle, melâng rangpâ manâng Thiudas pa ngamin wanthe adong ngama hongtah, phumma châbelii mihnyan rãng ate demnâng johdangtah. Phumma chenthu ate ritphe diko, ate dijunte heh phangtang phoangphan chhoan lahma ate ngin pemin mahjâtah. 37Eredikomin, mihnyan heh khoroakweih sanpoatko Galili wah mihnyan wathe Juda ngama erohjô hong lahma mihnyan heh ate demko khôansiet wah; phumma ate ritphe diko ate dijunte heh phangtang phoangmah phanchhoantah. 38Ngale are pemin ngama nenâng thôkoh eka, are mihnyan hehnâng chenjô nekre en. Thienroh re en! Thinma chenni moeka ereheh mihnyan hei angem junma medang ako, are pemin amah jâjô erea, 39Phumma arepa Joban wah medang ako, nema chenthumin tajienmet. Erepa nea Joban demnâng mênmînwah rãngrãng ba edanga!”
Phumma ngoang awang hehma Gamaliel nginpa kepwah. 40Thinma moattat chhoante heh humkhen nâng ngakroo lahma watlahma Jisu mînko chenthumin nekthe phoangthôtu en ngama ngalahma thînphêwah. 41Moattat chhoante heh ngoang awang heh tâwah khuhah nâhah chhoan wah, chenrãngma ngako, Joban ma thin a Jisu rãngma rêsê tathangte rãng rêndi khuhah wah. 42Ngale rangwo roakweih thinma Rangsoamhum nângmin ngale mihnyan heh hum hehnângmin Jisu ngale Misaia Nginkongsen pa roantangma phoangthô wah.
Currently Selected:
MOATLEM 5: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
