MOATLEM 6
6
Waengit Chohsokte
1Khediko lele, dijunte heh jahwâng rienrien, Griik jabma jabte Jews heh Hibru jabma jabte ahan Jews heh demnâng chhihchohmîn wah. Griik jabma jabte Jews hehma thin janthoinyu heh rangwo roakweih phhekchhah phenko chohmah ngama ngatwah. 2Ephumma echhi wanii moattat chhoante hehma phangtang aroamma khôanroo lahma ngatwah, “Nãngma Joban ngin phoangthônâng hung lekoh thangma ngun akem nâng sêmpa senmah. 3Erohwah, lemruchha heh, nekhuchhang wah Asâthôanju mênchong dângte ngale hungkhem rinkhem mihnyan hehwah waengit mihnyan ren en, phumma nãngkhuma thinnâng areheh phên asên moatlem mothuk e. 4Ephumma nãngkhu sanpoat phangtang rangsoam ngale Joban ngin phoangthônâng koh e.”
5Moattat chhoante heh nginko putedâlemte heh phangtang hungsên wah, ephumma thinma putedâlem asente ngale Asâthôanju mênchong dângte heh rênwah, erepa Stifen, Filip, Prokoras, Nikanor, Timon, Parmena, ngale khemako Judiejem rãng litdangte Antiok wah Jews ledangte Nikolas rênwah. 6Putedâlemte hehma areheh moattat chhoante hehnâng siethok kohwah, phumma moattat chhoante hehma ere mihnyan heh khohko dekma sahlo lahma rangsoam kohwah.
7Ngale ephumma Joban nginpa lejektû thangma jêngjah jahphoangthô rewakwah. Erediko Jeroselem nâng putedâlemte hehmin jêngjah jahhong rewah, ngale soam aroakte hehmemin ajahthem ma putedâlem wah.
Stifen Loatkhhek
8Stifen nâng Joban ma nyahrãng rangkoh wah, ngale atenâng Joban chaan mênchong dângwah, atema mihnyan heh tâko nyahrãng patritli le bâritli moatlem heh moatwah. 9Rohkomin Mihhaa dângwah jeklahma Sanagog nâng johdângte mihnyan hehma atenâng jektângwah#6.9: mihhaa dângwah jekte: Are heh a Jews rekthe mihhaa dângwah, ariakwah ba mihhaa dângwah jekthukwah. (ereheh nâng eroh ngatwah), Areko Kren wah Jews heh ngale Alexandra wah heh dângwah. Thin demko Kilikia ngale Asia diakwah Jews ahan hehmin johroam lahma Stifen demnâng chhiakmîn wah. 10Rohkomin Stifen nâng Juma chohsû lahma atema ngin heh chhemlala hôngjabwah, phumma ere Jews heh ate demnâng tachhiakmîn tuho. 11Ephumma thinma mihnyan khuthe nâng aroh jab en ngama huhngatwah, “Atema Mosa le Joban lelatnâng jablahma nima tattih!” 12Eroh mothô thôwak lahma thinma mihnyan heh phangtang, erediko khhepho phannang heh, ngale Niemarang hethôte heh Stifen lelatnâng chepsietwah. Ephumma thinma Stifen lolahma ngoang awang heh tânâng siethokwah. 13Thinma Stifen lelatnâng mothô thôrãng min mihnyan khuthe siethokwah. Thinma ngatwah, “Are mihnyan pumma roantang nãng Rangsoamhum Asâthôan lelatnâng jabeka. 14Nazarat wah Jisu ma are Rangsoamhum pa erunsiet a, ngale Mosa ma hethôthi niemarang hehmin elitsiet a, ngama atema jablahma tattih!” 15Ngoang awang heh chhangwah tôngte chentôma thinmitpa Stifen nâng sokwênwah, ngale thinma Stifen thhenphãng pa rangkhethung wah Joban ngintatte heh thhenphãng rãngrãng khewênwah.
Currently Selected:
MOATLEM 6: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
