MAK 13
13
Jisu ma Rangsoamhum Chhihjâ junma Jab
(Mt 24.1,2; Luk 21.5,6)
1Jisu Rangsoamhum wah loatchhoan poatko ate dijunte wathema atenâng ngatwah, “Sûtan, Hethôte! Are Rangsoamhum kowah longheh chentôdông ngale sên a!”
2Jisu ma dânthâng wah, “Nangma are humdong heh khe ekoa? Long phangthemin ate theko letongtumin; phangtang runjâ rêmin.”
Chêmchei ngale Mihma Chêmsiet
(Mt 24.3-14; Luk 21.7-19)
3Rangsoamhum rãnkawah Oliv hahhokho ko Jisu tonglahma dângwah, eko Piter, Jems, Jon, ngale Andru, lolo ate tâko hokwah. 4Thinma ngatwah, “Arepa chenthu dângmin a erepa ninâng thôkohhi,” “ngale areheh dângrãng sanpoat pa lâthângtah ngama jetrãng chendângmin a erepa ninâng thôkohhi.”
5Jisu ma thinnâng ngatwah, “Jetletma dangen, ngale hennâng min nekmok sietrii en. 6Ajahthem mihnyan hehma ngamîn keplahma ehuwakra, thinma ‘nga a ate!’ ngama ngalahma ajahthem mihnyan heh emoksiet a. 7Ngale ne kêanâ hehnângmin erediko hahtaang nângmin rantîn metat enkomin nekchei en. Erohpa metkep dângmin, rohkomin arepa athôan sanpoat pa hûera ngama dangmah. 8Diakthe pumma diakthe demko emênmîn a; wanthe hahsông pumma wanthe hahsông demko khum apanmîn. Chentô thenâng hahtii, ngale rem edanga. Areheh naahôngrãng wok bângkekko chetwah rãngrãng edanga.
9“Nededema jetletma dangen. Nea Sanagog hehnâng siethû lahma ewat hèn; ngale nema hahpênte ngale Lowang hehmako ngamînko chepletma thinnâng Nginkongsen pa ethôkoh en. 10Rohkomin athôan sanpoat hokmako, Nginkongsen pa chentô mihnyan nyuchha nâng bengchoh thômêng kohmin. 11Ngale chenthu ne khhek lahma metloat thinnâng siethokko, nema chenroh dânthâng min a ngama ammama neksekmah en; chenthu sanpoat pa mehûthako, Joban ma chenni jabthuk ehèn a erepa dânthangen. Chenrãngma ngako nema jabmin jabkhabpa newah ledangmin; ereheh Asâthôanju ngewah ehûra. 12Mihnyan hehma thinpho anaa heh eritphethuk a, ngale wa hehmemin thinchha heh eroh eritphethuk a. Chha hehmemin thinnyong awa heh lelatnâng danglahma eritphethuk a. 13Anga ngama ngajunma nenâng emitchek hèn. Rohkomin athôan tokokiet henhenpa dâlemsen danglahma lektong eka ere hehba khopemin.
Nyahrãng Cheili
(Mt 24.15-28; Luk 21.20-24)
14“Nema ‘nyahrãng cheili thôanpa’ ate chepthin theko ledang cheplahma ekhe en.” (Arepa chenni nâng ngaeka erepa weihte hehma jet en!) “Erediko Judia wah mihnyan heh hahkong khonâng huhchhoan wângmin. 15Humkho nâng dângte mihnyan pummemin humkhen nâng kalahma ate sêmmak heh ate demko johtôan chhoanrãng sanpoat pa lechhoan thukmin. 16Pitnâng dângte mihnyan hehmin humnâng khet akhu toanrãng leta ngakwãngmin. 17Ngale ere sanpoat kowah naawunte dihiaknyu ngale naajeng nyong dângte dihiaknyu hehrãngma chentô cheili dângmin a! 18Areheh rangpen nâng nekchen dangeka ngama Joban nâng rangsoam en! 19Chenrãngma ngako, ere sanpoat kowah chêmcheipa Joban ma rang ahah hôantah thuwah athângheh tôko hahtokkhoh ma chêmchoh eka kowah achhihthôanpa dângmin. Ngale arerãngrãng khedi nângmin chenthujô ledang tumin. 20Rohkomin Joban ma ere rangwopa thoansiet reka; Joban ma lethoansiet ngako, henmin kho leta peminwah. Atema ren eka mihnyan hehrãngma Joban ma ere rangwopa thoansiet eka.
21“Ngale, henma komin nenâng, ‘Sûtan en, Misaia pa areko tonga!’ ba, ‘ireko tonga!’ ngama menga hènko - atenâng nekpute en. 22Chenrãngma ngako, Misaia mõang ngale mõngmõang heh ehonga; Ngale Joban ma ren eka mihnyan heh meta diapchhah ekorãng ngama thinma nyahrãng patritli ngale bâritli moatlem hehmin emoa. 23Ne jetletma dangen! Ngama chentôpa sanpoat hokmako thôkoh eka.
Mihnyan Chha Hok
(Mt 24.29-31; Luk 21.25-28)
24“Ere chêmchoh sanpoat thôan diwah rangkuhko sanpa nyekjâ erea, ngale dâmin leliettûmin, 25rangkho wah merit heh jârit erea, ngale rangkho wah chentô kheki hehmin thinthe kowah emahjâa. 26Erediko Mihnyan Chhapa phoamkhohko tonglahma chaan ahang ngale phiakto phiakja ehongkara. 27Atema rangwah ngintatte heh hahtokkhoh sukbeliiko chienchhoan lahma Joban ma ren eka mihnyan heh sukthe ma sukthe kowah ekhoansiet a.
Phukbãng wah He
(Mt 24.32-35; Luk 21.29-33)
28“Phukbãng kowah chohjet en. Chenthu phukbãngpa hinchîchî, noapjokjok, ngale bãngchhong chhongnyan mechhong tahko, nema rangcho lânam hutha ngama rângjet en. 29Ererãngrãng chenthu ngama nenâng thôkotah heh danglahma mekhe tetko, nema athôan sanpoat pa lânamtha, ngale lâhuera ngama jet en.#13.29: sanpoat pa lânamtha, ngale lâhûera; ba atea lânamhutha, ahokrang lâcheptah 30Thonghun en, are chentôpa athângwah ahînte mihnyan heh phangtang târitmako edanga. 31Rangle hah eta chhihjâa, rohkomin Nga jabkhabpa chenthumin leta chhihjâmin.
Henmemin Rangwo Sanpoat pa Tajetmah
(Mt 24.36-44)
32“Ere rangwo le sanpoat pa chenthu hokmin a erepa henmemin jetmah - rangkhethung wah Joban ngintatte hehmemin jetmah, ngale Chha memin jetmah, ere rangwo sanpoat pa Wa Joban ma lolobajet a. 33Jetletma dangen, ngale chep achã letma tongen, chenrãngma ngako sanpoat pa chenthu hokmin a erepa nema jetmet. 34Erepa mihnyan wathema ate humpa haa hehnâng phethien kolahma, ngale haa hehnâng mâmâ moatlem phenthienkoh, erediko kâsek bemteko senthemthem bemrãng thôthienkoh relahma ate humwah hahtaang nâng tongchhoanwah rãngrãng dângmin. 35Erohwah chep achã letma bembemjû tongen, chenrãngma ngako hum tângtewa pa chenthu hokmin a erepa nema jetmet - rangjâthah nângmin tahûra, ba rangpen mongtang nângmin tahûra, wowenkho nângmin tahûra, ba rangkhahkho nângmin tahûra. 36Nema lejetpoatko ate sitsiak mehong hûrako, ne juplek letma nekchen khehû ehèn. 37Ngama nenâng chenni ngaeka, erepa chentô nâng ngaekang: Chep achã letma bembemjû tongen!”
Currently Selected:
MAK 13: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
