RIWÜRÜTI NGUCHI 10
10
Peter ko Kornelius
1Kaesarea la nyüh khüdu anengnü Kornelius, “Italirü Rothsarü mülung” ko dsiba, Roman rothsarü yola thsih michah anüchirü licho. 2Abi khakhuchüjüba nyitsarü khüdu; akukhi shünü Tsingrangba jengreng drü licho. Adesü abinü ailümrü dee trocho, ko Tsingrangba te lede dangkhidangnang licho. 3Abinü nyümong khüdu anyüzehlang rehtseh asang bekhyah koh abi te Tsingrangba riwürü khüdunü ro, “Kornelius” pü dsicho müngucheh khüdu tsidsa ngucho.
4Abinü riwürü chah tsü drüseh dhingkeh yocho, “Hi tuo, Abüdongba?”
Riwürü tsünü lalingcho, “Nü dangkhidangnang ko nü amüi nguchinü Tsingrangba longsüre, ko nüte lalingnung rungnüm lile. 5Ade Joppa lang Simon Peter ko dsiba nyitsarü nünung khürü müthehng. 6Kihbekhümla shuküp külüprü Simon kuh la abi müdong lile.” 7Hütsüde riwürü tsü tsipehcho, ko abinü akulirü nyüh anyüh ko abi dikehrü Tsingrangba müdherü rothsarü khüdu dsicho. 8Abinü atikehcho tsü arüh te yopü Joppa lang müthehcho.
9Nyümong khüu, arüh langla Joppa shündhün rode, nyüthung koh Peter-nü dangkhidangnangnung kuh michah tuwücho. 10Abi yangcho ko lango tsunyücho; tsuyongnung rungnümyade abinü müngucheh khüdu ngucho. 11Jongnah müyü kehpü atpah amülah khüdu kyo ning khangthrupü jürochi abinü ngucho. 12Hütsüla kanglungrü lüpcho, achitsiba ko rangmü uzati zehcho. 13Yuva khüdunü abi te yocho, “Shemüsung Peter; müpsehng ko tsung!”
14Ta Peter-nü yocho, “Imoh, Abüdongba! Amümüsa ko münyicho tusü Ihnü khodesü mütsu.”
15Yuva tsünü thali abi te yocho, “Tsingrangba-nü müsachehjücho tusü nühnü amümüsa tükangsoh.” 16Hiroh-i asangpi tikehcho, ko hütsü ninglang dhikehli tsicho.
17Hiba müngucheh adüzü nengdang Peter lümkücha yade, Kornelius-nü müthehba nyitsarüti, Simon-rü kuh tsingchi trahtrite yacho. 18Arühnü dsicheh tsingdhingcho, “Hila shirü khüdu anengnü Simon Peter lirü mah-o?”
19Peter-nü müngucheh tsü nyichehnung müküpyade, Anbünü abi te yocho, “Nyieng! Nyüh asangnü nüh yangchile. 20Rungnümpü jowüng, ko mütütohnyünyehpü arüh yola wüng, tunüo arüh Ihnü müthehcho.” 21Achotsü Peter-nü jowü arüh te yocho, “Nührünü yangchiba nyitsarü tsü Ih-e. Nührü tu nengdang rocho?”
22Arühnü yocho, “Adirü Kornelius-nü ihrü müthehcho. Abi nyitsarü atsa ko Tsingrangba mübürü ko Jihudarü atümungnü abi jengreng drüre. Nühnü abi te tu yonung lirünang abinü nyinungba abi kuh la nüh dsiyohnung riwürü khüdunü abi te yocho.” 23Achotsü Peter-nü hütsü romang arüh hütsüla müdongnung kihchicho.
Nyümong khüu abinü rungnümpü Joppa lanü yudsirü khürü zeh abi yola wücho. 24Ko nyümong khüu tsü abi ro Kaesarea chihcho. Hütsüla Kornelius-nü trahvarü ko shangrüti müjang dsibülungtapü abi yingyacho. 25Peter züdunung thsade, Kornelius-nü abi te shirüta, ajingte mükhukeh mübücho. 26Ta Peter-nü abi tphahmüsunü yocho, “Yamüsung, Ihsü nyitsarü due.” 27Peter-nü Kornelius te chota kuh la tsü züducho, ko hütsüla khütang shibülung püm ngucho. 28Abinü arüh te yocho, “Yangthsanü Jihudarü khüdunü yangpirüte mükhongnung mahkhang xodhingnung mümülarepü nührünü tsidsa müdhele. Ta Tsingrangba-nü nyitsarü süsü amünyi mahkhang amümüsa roh-i tükhichi pü Ite yoko. 29Hütsünü nührünü Ih dsinung müthehde, Ihnü tu mülümxüpü rocho. Hütsüeko, tuthsanung Ih dsicho müdhenyüre.”
30Kornelius-nü yocho, “Nyümong asang thsako, hiba shikhyah I kuh la anyüzehlang asang bekhyah la dangkhidangnangyacho. Dhrongyengnü I bete shü ariri müpipü nyüh khüdu yacho. 31Ko abinü Ite yocho: ‘Kornelius! Tsingrangba-nü nü dangkhidangnang yuchiko ko nü amüi nguchi müdheko. 32Joppa lang Simon Peter dsinung khürü müthehng. Abi kihbekhümla shuküp külüprü Simon kuh la müdong lile.’ 33Hütsünü Ihnü nüh dsinung rosohcho, ko nühnü chomangnü roko. Hütsünü Abüdongba-nü nüte tu mülacho lüpcho nyinung hila Tsingrangba jingte ihrü shibülung lile.”
Peter-nü Chocho
34Peter-nü chonung dikehcho: “Tsingrangba-nü nyitsarü tsah müdhingrepü Ihnü ade müdhere.#Azk 10.17 35Tu yucho lanü thsanye, sünü abi mübüro ko athsalang nguchiro abinü khyüchore. 36Israelrü khyang abinü atümung michah Abüdongba, Jisu Khrista khu atbachi Yuse Atsa müthehcho nührünü müdhele. 37Johan-nü baptinung thsingyuko khanglang, Galil lanü dikeh Israel apümlang tu tikehcho, hütsü nührünü müdhele. 38Tsingrangba-nü khüta Nazaret-rü Jisu chah Anbü Amüsa ko Zii mükhakehjücho hütsü nührünü müdhele. Abinü apümlang wünü nguchi atsa nguchi ko amünyi zii pohki lirü kyangjücho, tunüo abi te Tsingrangba zehcho. 39Abinü Israel ko Jerusalem la nguchicho apüm nengdang ihrü yuzi lile. Hütsüpü arühnü abi khala chah hamkeh süsohcho. 40Ta Tsingrangba-nü nyümong asang khanglang asücho lanü kanglisohcho, ko 41atümung te mah, ta Tsingrangba-nü throchehcho yuziti abi asücho lanü kangli ropü abi yola tsuyongrü ihrü te ngusohcho. 42Nyitsarü te Yuse Atsa thsingyunung ko abi tsü akang lirü ko asürü yukhanung Tsingrangba-nü throchehchoepü yuzithsanung abinü ihrü khyang yuzengjücho. 43Abi chah yudsirü müipi abi neng zii khunü mülang pehba ngunung azikehrü atümungnü chocho.”
Yangpirünü Anbü Amüsa Khyüchocho
44Peter-nü choyade, abi yu nyipümrü atümung chah Anbü Amüsa jürocho. 45Peter yola Joppa lanü rorüh Jihudarünü yangpirü chah mii Tsingrangba-nü Anbü Amüsa jiyü mükhakehjücho ngu dee nyemüyangcho. 46Tunüo arühnü yu papa la chonü Tsingrangba dicho seba arühnü yuchicho. Hütsüde Peter-nü chochehchücho: 47“Hiri nyitsarünü Ihsa roh-i Anbü Amüsa khyüchoko. Khang arüh kih la baptinung nengdang khürünü yatinung kohrü do?” 48Achotsü abinü arüh Jisu nengla baptinung yuzengjücho. Hütsüde abi te arüh yola nyümong azachah linung kihchicho.
Currently Selected:
RIWÜRÜTI NGUCHI 10: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
