RIWÜRÜTI NGUCHI 9
9
Saul Lasih Thsamülacho
(R. Ngu 22.6-16; 26.12-18)
1Ade yingcheh Saul-nü mütozah Abüdongba monoti nyümnü müpsehcho. Abüdongba Langla lirü khürü shirükhang 2arüh adhrerünye khingkurünye abinü rangpü Jerusalem lang noronung shulüm, Amungthri Bebüba yang wünü Damaskas la Sinagogti yangnü vathrah chingcho.
3Saul Damaskas chinyü rode, dhrongyengnü ninglangnü atsingse khüdu abi chah tehkehcho. 4Abi alih la longchocho ko abi te yuva khüdunü yo yuchicho, “Saul, Saul! Tuepü nühnü Ih dhsümthsero?”
5Abinü tsingdhingcho, “Abüdongba, nüh süo?”
Ko yuva tsünü lalingcho, “Nühnü dhsümthsebong Jisu Ih.” 6“Ta yamüsung ko yangdila tsü züdung, ko nühnü tu nguchinung athsalang hütsü nüte yonung.”
7Saul te müjang shitsehrüti yuva khüdusü müchüro nyehlicho; tunüo arühnü yuva tsü yuchicho ta süsü müngucho. 8Saul-nü alih lanü shemüsu anah trahdhingde, abinü tusü müngucho. Achotsü arühnü akhehnü shüripü Damaskas lang norocho. 9Nyümong asang abinü ngunung mükohcho, ko hütsü shikhe abinü tusü mütsumüyongcho.
10Damaskas la khristan khüdu anengnü Ananias licho. Abinü müngucheh khüdu ngu Abüdongba-nü abi te yocho, “Ananias!”
Abinü lalingcho, “Abüdongba Ih hila lile.”
11Abüdongba-nü abi te yocho, “Rungnüm ko Amüchong Langla tsü wüng, ko Judas kuh la Tarsus-rü khüdu anengnü Saul tsingdhing. Abi dangkhidangnangyale. 12Abinü ngulinungthsa nyüh khüdu anengnü Ananias ronü abi chah akhehnü nyümkehcho münguchehcho.”
13Ananias-nü lalingcho, “Abüdongba, hiba nyitsarü ko abinü Jerusalem la amüsarüti chah amütsa khüta bichicho hiri nengdang nyitsarü adrongnü Ite yoko. 14Ko nüh mübürüti atümung rangnung nengdang bebü ayingti chahnü tase bipü Damaskas la ro lile.”
15Abüdongba-nü abi te yocho, “Wüng, tunüo yangpirüti, yangthsarüti ko Israelrü te I neng müdhesoh Ih dikehsohnung Ihnü abi throchehko. 16Ko I nengdang abi khüta chongchanung Ipunü abi te ngusohnung.”
17Achotsü Ananias-nü Saul pümba kuh la tsü züducho, ko abi chah akhehnü nyümkehcho. Abinü yocho, “Jünirü Saul” nüh hilang rode langla Abüdongba Jisu, sü nü bete chürocho, abinü nü nah trahsohnung ko Anbü Amüsanü jengsohnung nengdang Ih müthehcho. 18Hütsüde tsünü anahtse lanü nguh laküp kyo longcho, ko abinü thali ngunung kohcho. Ko shemüsu abi bapticho; 19Abinü tsuyongcho, ko rezeh kangcho.
Saul-nü Damaskas la Thsingyucho
Saul-nü Damaskas la yudsirüti te nyümong azachah licho. 20Abinü müchungkhüti Sinagog lang wüpü Jisu tsü Tsingrangba Tsurüepü thsingyunung dikehcho.
21Abi yu yuchirü atümungnü nyemüyangnü tsingdhingcho, “Hivi hi Jerusalem la Jisu chah yudsirüti müpsehbongsü mahrü do? Ko abi hila nyitsarüti rangnü bebü ayingti yang hiwünung rocho mahrü do?”
22Ta Saul-nü thsingyuba tsü alaa du zinü kangcho ko Jisu tsü Mesia epü hohnungthsa abinü yuzi jüchonü Damaskas la liba Jihudarünü mülengchehcho.
23 #
2 Kor 11.32-33
Nyümong adrong khupü, Jihudarünü müjang shibülungnü Saul müpsehnung arah külüpcho, 24ta abi te arüh rah tsü yopehcho. Abi müpsehnung nengdang ama atsingse arühnü yangdi tbükhümti nyahcho. 25Ta romang khüdu Saul monotinü abi nowü loh lanü tbü khu abi dhichahchücho.
Saul Jerusalem la
26Saul-nü Jerusalem lang wücho ko monoti yola zehnung müküpcho. Ta abi mono khüdue pü arühnü müyudsipü arüh atümungnü abi drücho. 27Hütsüde abi tronung Barnabas rocho ko abinü riwürüti yanglang abi nowücho. Ko Saul-nü langla khüta Abüdongba ngucho ko Abüdongba-nü abi te chotacho hütsü abinü arüh te changnah yocho. Adesü Damaskas la Saul-nü khüta rezeh Jisu nengla thsingyucho hütsüsü arüh te yocho. 28Hütsüta Saul arüh yola licho ko Abüdongba nengla Jerusalem apümlang rezeh thsingyu rachicho. 29Abinü Greek yu chorü Jihudarü tesü yu rehtacho, ta arühnü abi müpsehnung müküpcho. 30Khode yudsirütinü hi rangchehcho, arühnü Saul Kaesarea lang nowünü Tarsus lang tsisohcho.
31Hütsünü Judea, Galil ko Samaria apüm la Lithro tsü atbachi shikhe khüdu thsacho. Abüdongba jengreng drü linü Anbü Amüsa atroba khu hütsü rezehchi shikhyahla zikehcho.
Lyda ko Joppa la Peter
32Peter-nü apümlang rachicho, ko shikhe khüdu abinü Lyda lang Tsingrangba nyitsarüti xodhingnung wücho. 33Hütsüla dsidsisonü dhsa kang keh chongnong lanü müsurochehcho nyüh khüdu anengnü Aeneas abinü shirücho. 34Peter-nü abi te yocho, “Aeneas, Jisu Khrista-nü nüh kyangjüre, shemüsung ko nü yüpji lohng.” Hütsüdenü Aeneas shemüsucho. 35Lyda ko Sharon la lirüti atümungnü abi ngu Abüdongba yang ximülacho.
36Joppa la yudsilarü khüdu anengnü Tabitha licho. (Greek yula abükyü neng Dorkas, adüzü “Shümüshü.”) Abükyünü akang ayung nguchi atsa nguchi ko ailümrü tro licho. 37Hütsütade abükyü füdhsa sopehcho. Me tsü mütsahjüpü amungthri chongsah la yohpücho. 38Joppa tsü Lyda lanü ashu mah, ko khode yudsirütinü Peter Lyda la lilepü yuchicho, arühnü abi yang yusi tsü hipü nyüh anyüh müthehcho, “Yanglilüm ihrü yanglang zah rung.” 39Achotsü Peter-nü shemüsu arüh yola wücho. Khode abi rochihcho, amungthri chongsahlang abi noküducho. Hütsüla chomilarüti atümungnü abi mükang tsübülung, Dorkas-nü abükyü akang lide arüh khyang xüjücho fükhümti apüm abi te ngusohcho. 40Peter-nü arüh atümung dongkhu chüdusohpü mükhukeh dangkhidangnangcho; ko abinü me lang tsü ximüla yocho, “Tabitha, shemüsung!” Abükyünü nah trahcho, ko Peter ngunü shemüsu pümcho. 41Peter-nü abi kheh jo abükyü tphahmüsucho. Hütsünü abinü yudsirü atümung, chomilarüti zeh dsinü arüh khyang abükyü akang kanglisohpü jücho. 42Hiba yusi tsü Joppa apümlang sobhocho, ko adrongnü Abüdongba chah yudsicho. 43Ko Peter Joppa la nyümong adrong shuküp külüprü Simon yola licho.
Currently Selected:
RIWÜRÜTI NGUCHI 9: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
