RIWÜRÜTI NGUCHI 8
8
Saul-nü Lithro Dhsümthsecho
1Hütsü nyümong lanü Jerusalem la Lithro nyüm dhsümthse arangcheh dikehcho. Riwürüti chah khu, yudsirü atümung Judea ko Samaria lih apümlang tsishocho. 2Yangthsa la thurü nyitsarütinü Stefan dhrürangnü abi nengdang dee me tracho.
3Ta Saul-nü kuh müipi züdunü, yudsirüti adhrerü ko khingkurü tphahbülungnü, arangyoh la yohpo ko Lithro tsü thsangnyangjünung müküpcho.#R. Ngu 22.4-5; 26.9-11
Samaria la Yuse atsa Thsingyucho
4Tsisho liba yudsirüti tsünü apümlang yusi tsü thsingyucho. 5Filip-nü Samaria yangdi longla wünü Mesia nengdang hütsüla lirü te thsingyucho. 6Filip-nü chocho yu ko abinü nguchicho thsayahiya ngude, arühnü abi yu mücijo nyicho. 7Nyitsarü adrong chahnü amünyi nbü khong chürocho, ko dsidsisürü ko jingjahrü adrong kyangcho. 8Hütsünü yangdila tsü akünyang amülah licho.
9Hütsüla nyüh khüdu anengnü Simon licho, abinü apu amongzi khunü khüpipi Samariarü nyemüyangsohcho. Abinü apu jangjangthsa amülah-epü lümcho, 10ko yangdila lirü atümungnü abi te nyicho. Arühnü yocho, “Zii amülah ko dsiba Tsingrangba zii nyitsarü tsü hi lile.” 11Arühnü abi te nyicho, tunüo müngulangnü abinü apu amongzinü arüh nyemüyangsohcho. 12Ta Filip-nü Tsingrangba yanglih ko Jisu Khrista nengdang yuse atsa thsingyucho arühnü yudside, arüh adhrerü ko khingkurü atümung bapticho. 13Ko Simon nüsü yudsicho; ko baptipü khanglang abinü Filip shündhün licho, ko anyemüyangnung ko thsayahiya nguchicho ngude abinü nyemüyangcho.
14Jerusalem la riwürütinü Samariarünü Tsingrangba yu khyüchokopü yuchinü, arüh yanglang Peter e Johan nyüh müthehcho. 15Khode arüh ro chihcho, yudsirütinü Anbü Amüsa khyüchochehnung nengdang arühnü dangkhidangnangjücho. 16Tunüo arüh sü chahsü Anbü Amüsa ade yingcheh müjüroepü licho; arüh Abüdongba Jisu nengla bapti dupü licho. 17Hütsüde Peter e Johan nyühnü arüh chah khehnü nyümkehjücho, ko arühnü Anbü Amüsa khyüchocho.
18Riwürütinü arüh chah arüh khehnü nyümkehde yudsirüti chah Anbü jücho Simon-nü ngucho. Hütsünü abinü Peter e Johan nyüh khyang thsi jonü yocho, 19“Sü chah Ihnü I khehnü nyümkehnang abinü Anbü Amüsa khyüchochehnungthsa, hiba zii hi I khyangsü jüng.”
20Ta Peter-nü abi te lalingcho, “Tsingrangba jiyü thsinü lihnung kohnungepü lümcho ngang, nüpu ko nü thsi mümehmi lang wüng! 21Ihrü nguchi la nüh nohlüm tu mühle, tunüo Tsingrangba bete nü lasih mümüchong. 22Hütsüeko hiba amünyi lümchung lanü lasih thsamülang, ko hiroh-i lümba nengdang mülang pehjüngpü Abüdongba te dangkhidangnang.” 23Tunüo nüh amünyi yurü ko nahmohnü jeng licho Ihnü ngure.
24Simon-nü Peter e Johan nyüh te yocho, “Nührünü choba khüdu dusü I chah mütikehnungthsa, I nengdang Abüdongba te dangkhidangnangjüng.”
25Arühnü akang yuzi jonü Abüdongba yusi sobhopü khanglang, Peter e Johan nyüh Jerusalem lang thalicho. Arüh langla Samaria yangdong adrongla arühnü yuse atsa thsingyucho.
Filip ko Ethiopiarü Adirü
26Abüdongba ninglang riwürü khüdunü Filip te yocho, “Rungnüm ko Jerusalem lanü Gaza jowüba kihjing lahpi langla tsü wüng.” (Hiba lang tsü adelü mürachire) 27Achotsü Filip-nü rungnümpü shemüsucho. Ade Ethiopiarü axangmicho khüdu, sü Ethiopia yangthsalatpü kuthsi michah khehthsithsarü adirü khüdu licho, abi wülungchi yacho. 28Abi Jerusalem lang Tsingrangba mübünung wücho ko abi akhüluba la kulang thaliyacho. Abi tsiyade, abinü azikehrü Isaya vakha lanü khichi yacho. 29Anbü Amüsanü Filip te yocho, “Akhülusing shündhün wüng.” 30Filip-nü shang wücho ko azikehrü Isaya vakha lanü khiyacho yuchi abi te tsingdhingcho, “Nühnü tu khiro hütsü nyichehrü do?”
31Adibongnü lalingcho, “Khürünü Ite changnah müyokhang, Ihnü khüta nyichehnung?” Ko Filip te abinü küro abi yola pümnung kihchicho. 32Abinü khichi yaba amüsa yu tsü hi thsacho:#Isa 53.7-8
“Amüpsehnung nowüba San khüdu kyo,
Sanza anbüh müjüpde yuva müchürocho kyo,
abinü yu tpah-o dusü müyo.
33Abi nyüpmüsehcho, abi yuje tsü dhsonglicho.
Abi trahchocho nengdang sünüsü müyochehnung,
Tunüo abi akang limih lanü hitsiko.”
34Adibong tsünü Filip te tsingdhingcho, “Azikehrü tsünü hi sü nengdang yoro Ite young. Apu nengdang a mahkhang aparü khüdu nengdang-o?” 35Hütsüde Filip-nü hiba amüsa yulanü dikeh abi te Jisu Khrista nengdang yusi atsa tsü yonung dikehcho. 36Anyüh jowüyade, kih azikyah licho müdüm khüdu chii rocho, ko adibong tsünü yocho, “Hila kih lile. Ih mübaptichehnungthsa tunü yatinung?” 37(Filip-nü yocho, “Nü lasih apümnü yudsikhang, nüh baptinung kohle.” Abinü lalingcho, “Jisu Khrista tsü Tsingrangba Tsurüepü Ihnü yudsire.”)
38Adibongnü akhülusing tsü nyehlinung yuzengjücho, ko Filip anyüding kih la tsü züducho, ko Filip-nü abi baptijücho. 39Khode anyüh kih la tsünü chürocho, Abüdongba Nbünü Filip notsipehcho. Adibong tsünü abi thali müngupehcho, ta akünyangnü jeng mütozah alang la wücho. 40Filip apu Azodas la abi li ngucho; abi Kaesarea lang wücho, ko langla abinü yangdongti atümungla Yuse Atsa thsingyucho.
Currently Selected:
RIWÜRÜTI NGUCHI 8: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
