RIWÜRÜTI NGUCHI 7
7
Stefan-nü Chocho
1Amungthriba bebübanü Stefan te tsingdhingcho, “Hütsü yuje mah-o?”
2 #
Lip 12.1
Stefan-nü lalingcho, “Jünirüti ko tpurüti, hi nyidhing! Ihsa jümürü Abraham Haran la linung müwüede, ahechi Tsingrang-nü Mesopotamia la abi te shiro yocho, 3‘Nü tsutpu ko nü limih pehjüng ko Ihnü nüte ngusohnung limih lang tsü wüng.’ 4#Lip 11.31; 12.4Achotsü abinü abi limih pehjüpü Haran la linung wücho. Abraham au süpü khanglang, nührü ade liyaba limih hi yang Tsingrangba-nü abi norocho. 5#Lip 12.7; 13.15; 15.18; 17.8Hütsütade Tsingrangba-nü Abraham khyang apu yo thsanung tusü müjü, alih dsiosü müjü, ta Tsingrangba-nü hütsü abi khyang jünung nyengchocho, ko hütsü abi ko abi chahnü trahchocho yo kangnung. Tsingrangba-nü hütsü nyengchode, Abraham atsurü müliecho. 6#Lip 15.13-14Tsingrangba-nü abi te yoba tsü hi: ‘Nü chahnü trahchochoti shirü lih la kang thsih müyü ayurü kang khingchi linung. 7#Nüch 3.12Ta arühnü dikehba nyitsarüti michah Ihnü yukhanung; ko akhanglang hütsüba lih lanü chüronung ko hiba lih la Ih mübünung.’ 8#Lip 17.10-14; 21.2-4; 25.26; 29.31—35.18Hütsüpü Tsingrangba-nü azengchota amüdhethsa Abraham khyang amüjüp-pehba jücho. Hütsünü Isak suropü nyükhih-o lipü Abraham-nü müjüp-pehjücho; hütsüde Isak-nü atsudhre Jakob ko Jakob-nü atsurü dhüreanyüh, Ihsa hung adangchi jümürüti müjüp-pehcho.
9 # Lip 37.11, 28, 39.2,21 “Jakob tsurütinü arüh nirü Josef nahmohcho ko Ijip la ayurü thsasohnung icho. Ta Tsingrangba abi te zehcho 10#Lip 41.39-41ko abi chongcha apüm lanü khümchocho. Ijip yangthsaba bete yade, Tsingrangba-nü abi khyang saying atsa ko lümlong jücho, ko yangthsabanü abi yanglih ko yangthsaba kukhi apüm michah governor kangsohcho. 11#Lip 42.1-2Hütsüde Ijip ko Kanan apümlang yangkongthsükong thsamütsa amülah mütohcho. Ko Ihsa jümürüti tsuyongnung tusü müngucho. 12Ko khode Jakob-nü Ijip la fürü lilepü yuchicho, abinü atsurüti, Ihsa jümürüti hütsülang akhudiba müthehcho. 13#Lip 45.1, 16Anyüpi wüdelü Josef-nü amungrü te abi mishacho, ko Ijip yangthsabanü Josef tsutpu müdhe kangcho. 14#Lip 45.9-10, 17-18; 46.27Hütsüde Josef-nü au Jakob te abi ko tsutpurü atümung nyührepü müngatingnü Ijip lang ronung yuva müthehcho. 15#Lip 46.1-7; 49.33Achotsü Jakob-nü Ijip lang jowücho, ko hütsüla abi ko atsurüti li sücho. 16#Lip 23.3-16; 33.19; 50.7-13; Jos 24.32Ko arüh me tsü Shekem lang hiwünü, Abraham-nü Hamor hung te lihcho kong la tsü dhrürangcho.
17 #
Nüch 1.7-8
“Tsingrangba-nü Abraham te nyengchocho tikehnung becho chii rode, Ijip la Ihsa nyitsarüti mono khütang zikehpü licho. 18Achangkala, Josef mümüdheba yangthsarü khüdunü Ijip la yangthsanung dikehcho. 19#Nüch 1.10-11, 22Abinü Ihsa jümürüti te thsacho ko mütsa bichicho, ko süsohnung nengdang akhungarüti dongkhu pehnung khingcho. 20#Nüch 2.2Hiba shikhela tsah atsa akhunga khüdu, Mosa surocho. Abi choo asang kuh la xükümcho, 21#Nüch 2.3-10ko khode abi dongkhu pehcho, yangthsaba tsulatpünü abi hiro abükyü tsurü kang kangchehcho. 22Ko Ijip-rü lümlong apüm Mosa te docho ko abi yula ko nguchila dee akoh kangcho.
23 #
Nüch 2.11-15
“Abi kang yüre pide, apu nyitsarü Israelrü khüta lirü abinü xodhingnung dhrongchehcho. 24Arüh yola nyüh khüdu Ijiprü khüdunü khingchi ngu abinü wü Ijip-ba tsü müpsehnü rühyangjücho. 25(Abi nyitsarünü arüh lehchehnung shulüm Tsingrangba-nü abi bichirepü arühnü nyichehnungepü lümcho, ta arühnü hütsü münyicheh) 26Nyümong khüu Israelrü nyüh anyüh yübüta abinü ngucho, ko abinü arüh müdronyo yocho, ‘Nyieng, nührü ajünirüe; tuepü müptaro?’ 27Ta amütsa nguchiba tsünü Mosa nyümyohchüpeh yocho, ‘Sünü nüh ihrü michah yangthsarü ko yukharü kangsohcho?’ 28‘Atü Ijiprü khüdu müpsehcho kyo Ihsü müpsehnyürü mah-o?’ 29#Nüch 18.3-4Mosa-nü hi yuchinü Ijip lanü tsicho, ko Media lih la licho. Hütsüla abi tsuzarü anyüh thsa licho.
30 #
Nüch 3.1-10
“Kang yüre tsipü khanglang, Sinai zong münyeh lipilih la singtrung khüdula mihmüle la riwürü khüdu Mosa yanglang chürocho. 31Hütsü ngude Mosa-nü nyemüyangnü, ta tsidsanung singtrung amünyethsa wücho. Ta abinü Abüdongba yuva yuchicho: 32‘Ih nü jümürüti Tsingrang, Abraham, Isak ko Jakob Tsingrang.’ Adrüchonü Mosa dhridhricho ko müdhingkehcho. 33Abüdongba-nü abi te yocho, ‘Nü jingkhüm khyüchehng, tunüo nüh yaba müdüm tsü amüsa lile. 34Ijip la I nyitsarüti chongchacho Ihnü nguko. Arüh rükhirüyocho Ihnü yuchiko, ko arüh lehchehnung Ih jürocho. Ade rung; Ihnü nüh Ijip lang müthehnung.’
35 #
Nüch 2.14
“Mosa tsü Israelrünü mükhyüchoba tsü lile. Arühnü yocho, ‘Sünü nüh ihrü michah yangthsarü ko yukharü kangsohcho?’ Abi tsü anyitsarü michah thsanung ko singtrungla mishaba riwürü atroba khu arüh lehcheh müthehnung Tsingrangba-nü müthehbong tsü licho. 36#Nüch 7.5; 14.21; Khi 14.33Abinü Ijip lanü anyitsarü nüchehcho; ko lipilih la kang yüre Ijip la ko amoh kihdi la thsayahiya ko anyemüyangnungti nguchicho. 37#Azk 18.15, 18Israelrüti, ‘Tsingrangba-nü müthehcho kyo nührü yang azikehrü khüdu müthehnung, ko abi tsü nührübürü nyitsarü thsanungpü yoba tsü Mosa licho.’ 38#Nüch 19.1—20.17; Azk 5.1-33Lipilih la Israelrü ashimükhong la zehba tsü abi lile; abi Ihsa jümürüti ko Sinai zong chah chotaba te hütsüla licho, ko Ihsa te chomüchinung Tsingrangba akang yusi abinü khyüchocho.
39“Ta Ihsa jümürütinü abi yocho mühnyicho; arühnü abi mükhiyohcho, ko arühnü Ijip lang thali wünyücho. 40#Nüch 32.1Hütsünü arühnü Aron te yocho, ‘Ihsa nünung nengdang Ihsanü tsingrang khürü külüpnung. Mosa, sünü ihrü Ijip lih lanü norocho, abi tu kangchonang ihrünü mümüdhe.’ 41#Nüch 32.2-6Hütsüpü arühnü kyothri khüdu misüpung kyo külüpcho, ko hütsü khyang kangmübü jo, arühnü külüpba khyang jengrengjo thsüti licho. 42#Amo 5.25-27Hütsünü Tsingrangba arüh tenü ximülacho ko arüh khyang ningchah chenghiti mübünung pehjücho. Azikehrüti vakhala thrah lile:
‘Israelrüti! Lipilih la nührünü kang yüre
kanglungrü müpseh kangmübü
jüba tsü I khyang mah.
43Nührünü dhiba tsü Molek tsingrang shükuh,
ko chenghi tsingrang, Refan kyothri;
Nührünü mübünung külüpba tsü kyothri licho.
Hütsüeko Ihnü nührü Babylon khu yangtsirü kangsohnung.’
44 # Nüch 25.9,40 “Ihsa jümürütinü lipilih la Tsingrangba zehba shükuh arüh te hicho. Hütsü Mosa te ngusohcho tsah kyonü, ko Tsingrangba-nü abi te külüpnung yocho aichi külüpcho. 45#Jos 3.14-17Akhanglang, Ihsa jümürütinü arüh tpurüti khehlanü shükuh tsü khyüchocho ko Joshua yola wüde arühnü hütsü arüh te dhicho ko arüh wüde Tsingrangba-nü iipehjo, arühnü yuchoti khehlanü alih tsü khyücho. Ko David shikhe chii hütsü yohpücho. 46#2 Sam 7.1-16; 1 Roh 17.1-14David-nü Tsingrangba achomang ngunü, Jakob Tsingrang nengdang kuh khüdu thsajünung tsingdhingcho. 47#1 Yang 6.1-38; 2 Roh 3.1-17Ta Solomon-nü du abi khyang kuh khüdu thsajücho.
48“Ta Amichahba Tsingrang tsü nyitsarü khehnü thsacho kuh la mülire; azikehrünü yocho roh-i:
49 #
Isa 66.1-2
“‘Ning I pümji
ko alimih I jing jükehji.
Abüdongba-nü yore.
Nühnü I khyang khütari kuh thsajünung?
I linung müdüm khüde liro?
50Hiri apüm Ihnü mükülüpcho do?’
51 #
Isa 63.10
“Nührü hongzirüti, lasih ko nangkhi mükehrüti! Nührünü lede Anbü Amüsa nyümre. Nührü jümürüti kyo bichire! 52Azikehrü yola nührü jümürütinü müdhsümthsecho sü liro? Papade Tsingrangba Yusi hirüti sürünü amüsaba dikehrü khüdu ronung choyohcho arüh müpsehcho. Ko ade nührünü abi kihyochüko ko müpsehko. 53Ninglang riwürütinü jüba Tsingrangba yuzeng khyüchorüti tsü nührü, ta nührünü hütsü mübichire!”
Stefan Kengsehcho
54Ashimükhongrünü Stefan yu yuchide, abi nyüm arüh rihlong chüro ha mütrehkehcho. 55Ta Stefan, Anbü Amüsanü jengnü, ninglang dhingkehde Tsingrangba ahechi ko Tsingrangba tsalangthring Jisu yanü ngucho. 56Abinü yocho, “Dhing, ning khangthrunü Tsingrangba tsalangthring Nyitsarü Tsurü yanü Ihnü ngure!”
57Ashimükhongrünü züdenü arüh khehnü arüh nangkhi thsitipü abi yangro dhsutinü, 58yangdi lanü tphahcheh nowü lungnü kengsehcho. Ko dhrezarü khüdu anengnü Saul bete yuzithsarütinü arüh shü yohpüjücho. 59Arühnü Stefan chah mütozah lungnü kengde abinü Abüdongba te dsi yocho, “Abüdongba Jisu, I nbü khyüchoung!” 60Abinü mükhukehnü yuva amülahnü yocho, “Abüdongba! Amünyi hi arüh chah tükhang!” Abinü hi yopü sücho. Abi müpsehba tsü Saul-nü yuzi jücho.
Currently Selected:
RIWÜRÜTI NGUCHI 7: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
