RIWÜRÜTI NGUCHI 6
6
Atrotarü Dhünyeh Throcho
1Tunyah mülipü mono alaa zikehde, Greek yu chorü Jihudarü ko Jihudarü khung kahla yubejarong chürocho. Nyümong mükhu tsuyongnung changtade chomirüti müjehrepü Greek yu chorü Jihudarünü mükünyangcho. 2Achotsü riwürü dhüreanyüh tsünü yudsirü mülungshünü müjang dsibülungpü yocho, “Tsuyongba müshonung khyanglangnü Tsingrangba yu thsingyuba layünung athsalang mah. 3Hütsüeko jünirüti, nührü yola aneng atsa lirü, Anbü Amüsa ko lümlongnü jeng lirü nyüh dhünyeh throchehng, ko nguchi hi arüh khyang nyümkehjünung. 4Ko ihrünü ihrü bekhyah apüm dangkhidangnang ko thsingyuba nguchila pehnung.”
5Amülungshünü riwürütinü lümcho la tsü künyangcho, achotsü arühnü Stefan, Anbü Amüsa ko yudsinü jeng liba Filip, Prokorus, Nikanor, Timon, Parmenas ko Antiok lanü yangpirü khüdu Nikolas, sü akhulang Juda yangthsa la ximülacho arüh tsü throchehcho. 6Arüh tsü amülungnü riwürüti bete norocho, ko arühnü arüh chah kheh nyümkeh dangkhidangnangjücho.
7Hütsüta Tsingrangba yu mütozah shucho. Jerusalem la mono alaa alaa zikehcho, ko bebürüti adrongnü yudsi tsü khyüchocho.
Stefan Rangcho
8Stefan, Tsingrangba-nü khütang müwajüba nyitsarü khüdu, ziinü jeng nyitsarüti yola thsayahiya ko anyemüyangnung adrong nguchicho. 9Ta alihchehcho#6.9 Alihchehcho: Hiri tsü Jihudarü, sürü ayurüthsa licho, ta arüh khyang nyüje jücho, mahkhang arüh tsü thsinü lihchehcho. Cyrene ko Alexandria lanü Jihudarü zeh Sinagog khiyohla zehrü khürünü abi nyümcho. Arüh Cilicia ko Asia lanü aparü Jihudarünü Stefan te yujitamüsucho. 10Ta Stefan Anbü ko lümlongnü jeng chode, arühnü abi mülengchehcho. 11Achotsü arühnü khürü pohsa jüpü hita yosohcho, “Abinü Mosa ko Tsingrangba nyüm chocho ihrünü yuchiko!” 12Hütsüta arühnü nyitsarüti, azibarüti, yuzeng dorüti ruhmüsucho. Arühnü Stefan rang ashimükhong bete nowücho. 13Hütsüde abi nyüm arahkheh chonung nyitsarü khürü norocho ko arühnü yocho, “Hivinü lede Ihsa amübükuh ko Mosa yuzeng nyüm chore. 14Hiba Nazaret-rü Jisu-nü amübükuh hi thsangnyangjünung ko Mosa-nü ihrü khyang jücho yangthsa mülichijünungepü abinü chocho ihrünü yuchiko!” 15Ashimükhongla pümrü atümungnü Stefan chah dhinglah dhingde, aromih ninglang riwürü khüdu kyo arühnü ngucho.
Currently Selected:
RIWÜRÜTI NGUCHI 6: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
