RIWÜRÜTI NGUCHI 5
5
Ananias ko Safira
1Ta nyitsarü khüdu anengnü Ananias, ko anitpü Safira nyühnü alih khüdu icho. 2Ta anitpü anyüh chotapü amüthsüh thsi changsho yohpüpü anyingcho tsü riwürüti khyang hirojücho. 3Peter-nü abi te yocho, “Ananias, amüthsüh achangsho rang yohponü Anbü Amüsa bete arahkheh chonungthsa tuepü Satan khyang nüh kihyochüsohcho? 4Nühnü kohro tsü mü-iede hütsü nüyo thsacho; ko hütsü ipü khanglang thsi tsü nüyo thsacho. Khang, tuepü nühnü hütsüta nguchinung dhrongchehcho? Nühnü nyitsarü te mah ta Tsingrangba bete arahkheh choko!” 5Ananias-nü hi yuchiyeng khülutsu sücho; ko hütsü yuchirü atümung dee drücho. 6Ko dhrezarütinü ro abi me müshüpü hiwü dhrürangcho.
7Rehtseh asango khanglang tu tikehcho mümüdhepü anitpü rocho. 8Peter-nü abükyü te tsingdhingcho, “Nü nii nühjünü kohro iba thsi apümnü hütsü du a mahro, Ite young?”
Abükyünü lalingcho, “Ho, apümnü hütsü due.” 9Hütsünü Peter-nü abükyü te yocho, “Abüdongba Anbü thsadsünung tuepü nühjü yube trümcho? Nü nii me dhrürangrüti trahtri te yale, ko arühnü nühsü dhitsinung!” 10Hütsüde tsünü ajingte khülutsu sücho. Dhrezarüti ro abükyü so licho ngu arühnü dhiwü anii kong müshüm dhrürangcho. 11Lithro apüm ko hütsü yuchirü atümung dee drücho.
Thsayahiya ko Anyemüyangnungti
12Nyitsarüti yola riwürütinü thsayahiya ko anyemüyangnungti adrong nguchicho. Ko yudsirüti atümung Solomon kekhüm la müjang shibülungcho. 13Aparünü arüh dee senye, hiri yola müzehrü sünüsü arüh yola zehnung müci mümülahcho. 14Ta Abüdongba chah yudsirü khingkurü adhrerü alaa alaa du amülungla tsü khikehcho. 15Riwürütinü nguchicho amüdhethsa tsü, Peter lahkhude anbükhüm dunüsü khümkisohnung nengdang füdhsarüti langla nücho chongnong ko phah la pümsohcho. 16Ko Jerusalem mükang liba yangdongti lanü füdhsarü ko amünyi nbünü rangchoti norocho; ko arüh atümung kyangjücho.
Riwürüti Dhsümthsecho
17Hütsüde amichahba bebü ko ashangrüti, Sadukirü mülung la khiyohti atümungnü riwürüti dee nahmohcho; hütsünü riwürüti nyüm nguchinung arühnü dhrongchehcho. 18Arühnü riwürüti rangnü arangyohkuh la yohpücho. 19Ta hütsü romang Abüdongba ninglang riwürü khüdunü arangyoh trahtri khangthrujücho, ko riwürüti nücheh arüh te yocho, 20“Wüng ko Amübükuh la yapü nyitsarüti te hiba akang asi nengdang young.” 21Riwürütinü ayochonyi mütoh amübükuh la züducho ko donung dikehcho.
Amichahba bebüba ko ashangrütinü, Jihudarü azibarüti atümung müjangnü Ashimükhong khüdu dsichocho; ko arüh bete riwürüti noronung arangyohlang yuzengjücho. 22Ta khode anüchirüti ro chihcho, arühnü arangyoh la riwürüti müngucho, achotsü arühnü thali wü Ashimükhongrü te yocho. 23“Khode ihrü arangyoh kuh chihcho, hütsü khahkhah khangtipü anyahrütinü trahtri tsü nyah licho; ta khode ihrünü trahtri tsü khangthrucho, ayonglang tsü ihrünü süsü müngucho!” 24Khode bebü ayingti ko amübükuh nyahrü anüchibanü hi yuchicho, riwürüti chah tu tikehcho, ko arühnü nyemüyangcho. 25Hütsüde nyitsarü khüdu ro arüh te yocho, “Nyieng! Nührünü arangyoh la rangyohrüti sülü amübükuh la do yale!” 26Achotsü anüchiba tsünü nüpü wü riwürüti tsü thali norocho. Nyitsarütinü arüh chah lungnü müpnung drüchonü arüh mükhingchicho.
27Arühnü riwürüti tsü noro Ashimükhong bete yasohpü Amichahba Bebübanü arüh te tsingdhingnü yocho. 28“Hiba nyitsarü nengla müdonung ihrünü nührü khyang yuzeng akhükhah jüko, ta dhing nührünü tu nguchicho! Nührünü Jerusalem jengsohko, ko abi sücho tsü nührünü ihrü bha kangsohnyüre!”#Mat 27.25
29Peter ko aparü riwürütinü lalingcho, “Ihrünü nyitsarü tenülü Tsingrangba yochonyibae. 30Jisu, sü nührünü khala chah hamkeh süsohcho, Ihsa jümürü Tsingrangba-nü abi asücho lanü kangchehli rosohko. 31Israelrü khyang lasih thsamüla mülang pehba jünung khyanglangnü, Tsingrangba-nü abi tsalangthring langnürü ko Kangchehjüba kangsohcho. 32Hütsüri nengdang yuzi tsü abi yocho nyirüti khyang jüba Tsingrangba jiyü Anbü Amüsa ko ihrü yuzi lile.”
33Ashimükhongrünü hi yuchide rihlong chüro riwürüti müpsehnyücho. 34Ta arüh yola Farisirü nyüh khüdu anengnü Gamaliel, sü Yuzeng dorü atümungnü jengrengjo licho, abi Ashimükhongla tsü shemüsucho. Abinü riwürüti tsü nücheh tsinung yuzengjücho, 35hütsüpü abinü ashimükhongrü te yocho, “Israel jünirüti, hiri nyitsarü chah nührünü müzah nguching. 36Tunüo akhulangsü khüdupi Theudas-nü ajangjangthsa amülahrü khüdu kyo chürocho, ko nyitsarü thsih müyü-o abi yola zehcho. Ta abi müpsehcho, abi mono atümung tsishocho, ko hütsüba mülung changpehcho. 37Hütsüpü, Galilrü Judas mono khiba bekhyahla chürocho; abi yola nyitsarü khütango zehcho, ta abisü müpsehcho ko amonoti tsishopehcho. 38Hütsüeko, hi nengdang Ihnü nührü te yonung, arüh nyüm tu tünguchi. Arüh yah pehjüng! Arüh lümchung ko nguchiba hi nyitsarü chahnü thsakhang, hütsü changpehnung, 39ta hütsü Tsingrangba chahnü thsakhang, nührünü arüh mükohnung. Nührünü Tsingrangba nyüm khatacho roh-i thsanung!”
Achotsü Ashimükhongnü Gamaliel yocho tsü khyücho. 40Arühnü riwürüti tsü dsiropü xüpcho, ko khodesü Jisu nengla müchonung yuzeng jüpü müthehcho. 41Riwürüti Ashimükhong lanü künyangseh tsicho, tunüo Jisu khyanglangnü chongchanung tsü Tsingrangba-nü arüh dekhing khichicho. 42Ko nyümong mükhu amübükuh la ko ajünirü kuh la Jisu Mesia nengdang yuse atsa tsü donü thsingyucho.
Currently Selected:
RIWÜRÜTI NGUCHI 5: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
