RIWÜRÜTI NGUCHI 4
4
Peter ko Johan nyüh Ashimükhong Bete
1Peter e Johan nyüh amülung te chotayade, bebürüti, amübükuh nyahrü anüchiba ko Sadukirü khürü rocho. 2Riwürü anyüh tsünü nyitsarüti te Jisu asücho lanü kanglirocho, ko hütsünü asürü kanglinung nengdang yuzi jo docho ngu arüh wahcho. 3Hütsünü arühnü arüh rangcho ko arangyoh la nyümong khüu yingcheh yohpücho, tunüo hütsü anyüzehlang thsacho. 4Ta yusi yuchirü adrongnü yudsicho; ko nyitsarü shikhi hajar müngao kangcho.
5Nyümong khüu tsü Jihudarü langnürüti, ko yuzeng adorüti Jerusalem la shibülungcho. 6Arühnü amungthriba Bebü Annas, Kaifas, Johan, Alexander, ko amungthriba bebü hung adrong te shirütacho. 7Arühnü riwürüti tsü arüh bete yasohpü tsingdhingcho, “Nührünü hi khüta nguchicho? Tu ziinü mahkhang sü nengla nührünü hi nguchicho?”
8Hütsüde Anbü Amüsanü jeng Peter-nü lalingcho, “Langnürüti ko azibarüti: 9Chünye ihrü te ajingjahba chah tu nguchi atsa nguchicho ko abi khüta kyangcho pü tsingdhingrükhang, 10nührü ko Israelrü atümungnü hi müdheing, nührü bete hiba nyitsarü longi kyangpü yaba hi, sü nührünü hamkehcho ko Tsingrangba-nü asücho lanü kanglisohba Nazaret-rü Jisu Khrista nengla nguchicho. 11#N. Khi 118.22Abi nengdang Amüsa yunü hita yore:
‘Kuthsarünü mükhyüba lung tsü
apüm tenü ayingba kangcho.’
12Akangcheh tsü abi khu dunü ngunung; Liküpla Ihsa khümchonungthsa Tsingrangba-nü sü khyangsü jo mühle.”
13Ashimükhongrünü Peter e Johan nyüh müci mülahcho ngu ko arüh akhicho lümlong mühlepü müdhede nyemüyangcho. Hütsüde arüh tsü Jisu müyangrütiepü arühnü lümchehcho. 14Ta arühnü tu müyochehcho, tunüo akyangba apu tsü Peter e Johan nyüh te hütsüla yacho. 15Achotsü arühnü arüh te ashimükhongla tsünü tsinung yocho, hütsüpü arüh-e arührü chotacho. 16“Ihsanü hiri chah tu nguchinung?” Hiba pathsa thsayahiya tsü arühnü nguchichoepü Jerusalem la lirü atümungnü müdhele, ko Ihsanü hütsü mah pü müyocheh. 17Ta hiba khiyu alaa nyitsarü yola müsobhosohnung nengdang, hiko khodesü Jisu nengla sütesü müchochinung hiri nyitsarü khyang yuzeng jünung.
18Hütsüpü arühnü arüh thali dsiyoh arüh te Jisu nengla sütesü müchochinung mahkhang müdonung yuzengjücho. 19Ta Peter e Johan nyühnü arüh te lalingcho, “Tsingrangba tenü nührü te nyinung tsü Tsingrangba bete athsalanga mahro nührübürünü tsidsa young. 20Tunüo ihrübürünü tu ngucho ko yuchicho hütsü müchoko linung mükoh.” 21Hütsüpü ashimükhong tsünü arüh te alaa amüzah yu yopü lehcheh müthehcho. Arüh khingchinung tsü amükohnungepü arühnü müdhecho, tunüo atikehcho nengdang tsü nyitsarü atümungnü Tsingrangba nengsecho. 22Nyitsarü süchah hiba akyangba thsayahiya nguchicho abi kang yüre chah alaa azirü thsacho.
Müci Mülahnung Dangkhidangnangcho
23Peter e Johan nyüh müthehyeng, arüh mülung yanglang thalicho ko bebü ayingti ko azibarütinü tu yocho hütsü arüh te yocho. 24#Nüch 20.11; Neh 9.6; N. Khi 146.6Khode yudsirütinü hütsü yuchicho, arüh atümungnü Tsingrangba te dangkhidangnang yocho: “Abüdongba, ning, alih, kihdi ko hütsüla liba apüm thribong! 25#N. Khi 2.1-2Anbü amüsa khu nü dikehrü, ihrü jümürü David-nü yocho:
“Tuepü yangpirütinü zichürocho;
tuepü nyitsarütinü amükhyu rah külüpcho?
26‘Abüdongba ko abi Mesia nyüm,
Limih yangthsabatinü yacho,
ko yangthsarünü müjang shibülungcho.’
27 #
Mat 27.1-2; Mrk 15.1; Luk 23.1; 7-11; Jhn 18.28-29 Ajüje, Herod e Pontius Pilat nyüh yangpirüti ko Israelrü nühnü Mesia kangsohba, amüsa nü Dikehrü Jisu nyüm hiba yangdila shirütacho. 28Nü zii ko nü lümchung la tuturü atikehnung licho, hütsü nyüm arüh shibülungcho. 29Hütsüeko ade, Abüdongba, arühnü ihrü nyüm bichiba tsü dhing, ko ihrü nü dikehrütinü nü yusi müci mülah chonung mülajüng. 30Nü Amüsa Kulirü Jisu nengla amüdhethsa ko thsayahiya nguchinung mülajüng ko kyangjünung nü kheh müyungchüng.”
31Arüh dangkhidangnangkade, arüh pümba müdüm tsü shühchicho. Arüh atümung Anbü Amüsanü jeng müci mülah Tsingrangba yusi sobhonung dikehcho.
Yudsirütinü Arüh Kuthsi Changtacho
32 #
R. Ngu 2.44-45
Yudsirü mülung tsü arüh lasih khüdu thsapü licho. Sünüsü abi licho tsü apu yoepü müyocho, ta arüh atümungnü arüh licho tsü khüdunü khüdu te changtacho. 33Zii amülahla riwürütinü Abüdongba Jisu kangchehlicho yuzi jücho, ko arüh atümung chah Tsingrangba-nü amüwa khütang mükhakehjücho. 34Arüh yola süsü müdsimüku mülicho. Tunüo sürü alih mahkhang kuh licho arühnü hütsüri icho, 35ko aichehcho thsi tsü hiro riwürüti khyang jücho; ko thsi tsü nyitsarü müipi khyang palu dhsütah aichi changtacho.
36Hütsüta Josef, Cyprus la surocho Levirü khüdu süte riwürütinü Barnabas ko dsicho (adüzü “athsüchirü”), 37abi luh khüdu licho, hütsü ipü thsi tsü riwürüti khyang hiwü jücho.
Currently Selected:
RIWÜRÜTI NGUCHI 4: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
