RIWÜRÜTI NGUCHI 3
3
Jingjahrü Khüdu Kyangjücho
1Nyümong khüdu Peter e Johan nyüh dangkhidangnang bekhyah anyüzehlang asang bekhyahla Amübükuh lang wüchi yacho. 2Hütsüla Atsah-atsa dsiba Trahtri te asuro denü jingjahrü nyüh khüdu pümcho. Amübü würüte thsi chingnung nengdang nyümong mükhu abi dhiwü hütsüla pümsohcho. 3Khode Peter e Johan nyüh züduchi ngucho, abinü anyüh te lango jüng pü chingcho. 4Anyünü abi chah nyeh-e dhingcho, ko Peter-nü yocho, “Ihrü chah dhing!” 5Achotsü abinü arüh chahnü lango ngunung longdinü dhingcho. 6Ta Peter-nü abi te yocho, “Ih taripi ko hon mühle, ta Ih tu liro hütsü nü khyang jonung: Nazaret-rü Jisu Khrista nengla shemüsu tsehnung Ihnü yuzeng jüre!” 7Hütsüpü abinü akheh tsalangnü marehpü shemüsusohcho. Hütsüde tsünü ajing ko lohla la re zehcho; 8abinü tsohmüsu yacho, ko tsehchicho. Hütsüpü abinü tsehchi, tsohchi, Tsingrangba nengse arüh yola amübükuh la züducho. 9Hütsüla nyitsarünü abi tsehchi Tsingrangba secho ngucho, 10ko khode arühnü hütsü Atsah-Atsa Trahtri la pümpü chingkichingnangbasüepü tsüpcho, arüh atümung abi chah tu tikehcho hütsü nengdang nehnü ko nyemüyangcho.
Amübükuh la Peter Yusi
11Nyitsarüba tsü Solomon kekhüm pü dsibala Peter ko Johan nyüh yola pümde, nyitsarü atümung dee nyemüyang arüh yanglang shibülungcho. 12Peter-nü hütsü ngude, abinü arüh te yocho, “Israelrü, tuepü nührünü hi nengdang nyemüyangro, ko nührü tuepü ihrü chah dhingro? Hi ihrü palu zii mahkhang müsachonü abi tsehsohchoeko nührünü lümrü mah-o? 13#Nüch 3.15Abraham, Isak ko Jakob Tsingrang, Ihsa ajü-amü Tsingrang-nü abi dikehrü Jisu khyang amüsa ahechi jüko. Ta nührünü abi yangbe khyang jücho, ko Pilat-nü müthehnung dhrongchehpü khanglang mii nührünü Pilat jingte abi mükhyüchocho. 14#Mat 27.15-23; Mrk 15.6-14; Luk 23.13-23; Jhn 19.12-15Abi Amüsa ko atsa thsacho, ta nührünü abi mükhyüchocho, ko amüpsehrü khüdu uthring müthehnung Pilat te chingcho. 15Akang lang nübong tsü nührünü müpsehcho, ta Tsingrangba-nü abi sücho lanü kanglisohcho ko hi nengdang yuzi ihrü lile. 16Abi neng ziinü hiba jingjahba khyang re jücho. Nührünü tu nguro ko müdhero hütsü abi nengla yudsinü nguchicho; nührü atümungnü ngucho roh-i, Jisu nengla yudsinü abi kyangjüko.
17“Ko ade jünirüti, nührü ko nührü langnürütinü Jisu chah tu nguchicho hütsü nührünü mümüdhechonüepü Ihnü müdhele. 18Tsingrangba-nü azikehrü khu papadenü Mesia tsü chongchabaepü choyohko; ko hiroh-i abinü tikehsohcho. 19Hütsüeko Tsingrangba-nü nührü münyi pehsohnung nengdang lasih thsamülang. 20Hütsükhang, Abüdongba chahnü anbü tase ronung, ko abinü nührü shulüm throchehba Jisu, sü Mesia liro abi müthehnung. 21Tsingrangba-nü abi amüsa azikehrü khu papadenü chocho kyo, lüpcho asi külüpchiba bekhyah mürode abi ninglanglih la linung. 22#Azk 18.15, 18Tunüo Mosa-nü yocho, ‘Abinü Ih müthehcho roh-i, Abüdongba nührü Tsingrang-nü azikehrü khüdu müthehnung, ko abi tsü nührübürü nyitsarü khüdu thsanung. Abinü nührü te tu nguchinung yonang nührünü nyibae. 23#Azk 18.19Sünü hütsüba azikehrü yu mühnyinang abi nyitsarü yolanü nücheh changsohnung.’ 24Ko azikehrüti Samuel ko abi khanglang rorüh atümung sürünü yusi hicho, arühnüsü chünye tikehba nengdang hi chocho. 25#Lip 22.18Azikehrü khu Tsingrangba anyengchocho tsü nührü nengdang lile, ko nührü jümürü te Tsingrangba-nü zengchochola nührü changtare. Abraham te abinü yocho kyo, ‘Nü chahnü trahchocho khu Ihnü limih chah lirü atümung müwajünung.’ 26Hütsünü Tsingrangba-nü abi dikehrü throchehcho, ko nührü müipi amütsa lang lanü ximüla nührü müwajünung nengdang, nührü yanglang akhu abi müthehcho.”
Currently Selected:
RIWÜRÜTI NGUCHI 3: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
