LIPOH 29
29
Jakob Laban Kuh Chihcho
1Jakob-nü mütozah abi langla wücho ko Nyüchüro lih chii rocho. 2Thohdhünü rangmü la tsü kihkong khüdu san atii asangnü mükangtipü licho ro chihcho. San atii khyang tsü hiba kihkong lanü kih tii licho ko abekhüm chah lung amülah khüdu licho. 3Ko khode santi tsü hütsüla shibülungnang, san nyahrünü lung tsü dhipehpü arüh khyang kih tihcho. Hütsüpü thali lung tsünü dhitipücho.
4Jakob-nü san nyahrü te tsingdhingcho, “Shangrüti, nührü khüdenüo?”
Arühnü lalingcho, “Haran lanüe.”
5Abinü yocho, “Nührünü Nahor tsurü Laban mümüdheo?”
Arühnü yocho, “Müdhele.”
6Abinü tsingcho, “Abi tsa mülio?”
Arühnü yocho, “Abi tsa lile. Dhing hila atsulatpü Rachel abi san nüpü role.”
7Jakob-nü yocho, “Ade münyüzeh-e ko santi münorokyange, tuepü arüh khyang kih tihpü rangmülang thali münowüro?”
8Arühnü lalingcho, “Santi apüm münorokhangde ko lung tsü dhipehpü, kih mütihde nüli tsinung mütsa.”
9Hütsüta Jakob arüh te chotachi yade, Rachel tsü santi nüpü rocho. 10Khode Jakob-nü Rachel tsü aku Laban santi nüpü ro ngucho, abinü kihkong lang tsü wücho ko lung tsü dhipehpü kih tihcho. 11Hütsüpü abinü abükyü chah müthsüpcho ko akünyangchonü tracho. 12Abinü abükyü te yocho, “Ih nüurü tsutpurü Rebeka tsurüe. Achotsü abükyünü au te yonung shang wücho.” 13Ko khode Laban-nü ani tsurü Jakob yusi yuchicho, abinü shang wü abi mütoh, khyahripü abi chah müthsüp-pü kulang norocho. Khode Jakob-nü atikehcho lüpcho tsü Laban te yocho, 14Laban-nü yocho, “Ho, yuje, nüh Ipu shutsa ko I shüh lile.” Hütsüpü Jakob hütsüla choo yungtsa licho.
Rachel ko Lea Nyüh nengdang Jakob-nü Laban Dikehcho
15Laban-nü Jakob te yocho, “Tsutpurünye nühnü I nengdang amükangnü münguchinung. Angang khütoi khyünyüro?” 16Laban tsulatpü anyüh azitpü Lea ko azatpü Rachel licho. 17Lea chah anahtse amüruhnung kehcho, ta Rachel tsü münohripü atsah atsa thsacho.
18Jakob-nü Rachel müicho, hütsünü abinü yocho, “Nühnü I khyang Rachel khyüsohkhang Ihnü kang dhünyeh nüh dikehnung.”
19Laban-nü yocho, “Ihnü abükyü aparü khyang jünung tenülü nü khyang uthring jünung; hila Ite lieng.”
20Hütsünü Jakob-nü Rachel khyünung nengdang kang dhünyeh dikehcho, ta hütsü abi nengdang nyümongti akhikyah roh-i du licho, tunüo abinü Rachel dee müicho.
21Hütsüpü Jakob-nü Laban te yocho, “Kang pisako; nü tsulatpü I khyang khyüsohng.” 22Achotsü Laban-nü kukangba thsüti rungnümpü atümung dsiyohcho. 23Ta hütsü romang, Laban-nü Rachel mahpü Jakob khyang Lea nowü jücho, ko Jakob-nü abükyü te mükhongcho. 24(Laban-nü atsulatpü Lea khyang akulilarü Zilpa abükyü dikehnung jücho.) 25Nyangnyü khüu tsingsepü du Jakob-nü hütsü Lea-epü rangchehcho. Achotsü abinü wü Laban te yocho, “Tuepü Ite hita nguchicho? Ihnü Rachel nengdang nüh dikehcho. Tuepü Ih kihyochücho?”
26Laban-nü yocho, “Hila ayahnü afü müngu ani xengnung mümülare. 27Kuthriba nyükhih hi khusohng, ko nühnü adesü kang dhünyeh Ih dikeh-ekhang, Ihnü Rachel-sü nü khyang jünung.”
28Jakob-nü hütsü nyengchocho ko kuthriba thsüti khuko khanglang, Laban-nü Jakob khyang Rachel anitpü thsanung jücho. ( 29Laban-nü atsulatpü Rachel khyang abükyü dikehsohnung akulilarü Bilha jücho) 30Jakob-nü Rachel tesü mükhongcho ko abinü Lea tenü Rachel alaa müicho. Hütsüpü abinü adesü Laban kang dhünyeh dikehcho.
Jakob Tsurüti
31Khode Lea tsü Rachel tenü amümüibaepü Abüdongba-nü müdhecho, abükyü khyang azarü lisohcho, ta Rachel pümdongsohcho. 32Lea afü müdeng kangcho ko azarü khüdu nümüsucho. Abükyünü yocho, “Abüdongba-nü I chongcha nguko ko adelü Inii nü Ih müinung” hütsünü abükyünü aneng Reuben dsijücho. 33Adesü afü müdeng kangcho ko azarü khüdu nümüsucho. Abükyünü yocho, “Ih mümüirepü Abüdongba-nü müdhe I khyang azarü hisü jüko” hütsünü abükyünü aneng Simeon dsijücho. 34Adesü abükyü fü müdeng kangcho ko azarü khüdu nümüsucho. Abükyünü yocho, “Adelü Inii tsü Ite alaa khüdu kang linung, tunüo Ihnü azarü asang nümüsujüko” hütsünü abükyünü aneng Levi dsijücho. 35Adesü abükyü fü müdeng kangcho ko azarü khüdu nümüsujücho. Abükyünü yocho, “Adelü Ihnü Abüdongba neng senung” hütsünü abükyünü aneng Juda dsijücho. Hütsükolü abükyü tsü sihkacho.
Currently Selected:
LIPOH 29: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
