LIPOH 30
30
1Ta Rachel-nü Jakob khyang azarü khüdusü münümüsujücho, hütsünü abükyünü afü nahmoh Jakob te yocho, “I khyang azarü khülo mahkhang Ih sünung.”
2Jakob-nü Rachel te zichüro yocho, “Ih Tsingrangba mah-o? Nüh azarü mülisohba tsü Abinüe.”
3Abükyünü yocho, “Hila I kulilarü Bilha lile; abükyünü I khyang azarü nümüsusohnung abükyü te mükhong.” 4Hütsüta abükyünü anii khyang Bilha jücho, ko abinü abükyü te mükhongcho. 5Bilha afü müdeng kangcho ko Jakob khyang azarü khüdu nümüsujücho. 6Hütsüde Rachel-nü yocho, “Tsingrangba-nü Ih khümko. Abinü I kihchicho yuchi I khyang azarü khüdu jüko” hütsünü abükyünü aneng Dan dsijücho. 7Adesü Bilha fü müdeng kangcho ko Jakob khyang azarü khüdu nümüsujücho. 8Rachel-nü yocho, “Ihfü Ihjü dee chitako, ta Ihnü kohko; hütsünü abükyünü aneng Naftali dsijücho.”
9Khode Lea-nü abükyü sihkakopü müdhecho, abükyünü Jakob khyang akulilatpü Zilpa jücho. 10Hütsüpü Zilpa-nü Jakob khyang azarü khüdu nümüsujücho. 11Lea-nü yocho, “Ih münguh liko” hütsünü abükyünü aneng Gad dsijücho. 12Adesü Zilpa-nü Jakob khyang azarü khüdu nümüsujücho, 13ko Lea-nü yocho, “Ih khütoi künyangro! Adelü khingkurütinü Ite künyanglatpü pü dsinung” hütsünü abükyünü aneng Asher dsijücho.
14Litoh maxa bekhyah Reuben-nü luhlang wücho ko mandrak#30.14: Mandrak: Hi za adong khüdu lile. Hiba asih mahkhang ara tsucho khu khingkurü azarü mülirü khyang re alaa jonü, azarü throkehrepü yudsire. ngu hütsü hilung atpa Lea khyang jücho. Hütsüde Rachel-nü Lea te yocho, “Yanglilüm nü tsurü yo mandrak tsü I khyangsü khürü khülo.”
15Lea-nü yocho, “Inii khyüchonü mükükyürü mah-o? Adesü I tsurü yo mandrak mii khyüjünung müküprü mah-o?”
Rachel-nü yocho, “Nühnü I khyang nü tsurü yo mandrak jükhang, shomülang Jakob te yüpnung kohle.”
16Khode Jakob anyüzehlang luhlangnü lungcho, Lea-nü wü abi mütohnü yocho, “Shomülang nüh Ite yüpnungbae, tunüo nü nengdang I tsurü yo mandrak jüko.” Achotsü abinü hütsü romang abükyü te yüpcho.
17Tsingrangba-nü Lea kihchicho lalingcho, ko abükyü fü müdeng kangcho ko Jakob khyang atsurü müngau nümüsujücho. 18Lea-nü yocho, “Tsingrangba-nü I khyang I jiyü jüko, tunüo Ihnü Inii khyang I kulilarü jücho” hütsünü abükyünü atsurü neng Isakar dsijücho. 19Lea adesü afü müdeng kangcho ko Jakob khyang atsurü adhüroh-u nümüsujücho. 20Abükyünü yocho, “Tsingrangba-nü I khyang jiyü atsa khüdu jüko. Adelü Inii nü Ih khyüchonung, tunüo abi khyang Ihnü adhrerü dhüroh nümüsujüko” hütsünü abükyünü aneng Zebulun dsijücho. 21Akhanglang abükyünü khingkurü khüdu nümüsujücho, ko abükyü neng Dina dsijücho.
22Hütsüpü Tsingrangba-nü Rachel lümchehcho, ko abükyü dangkhidangnang laling azarü lisohcho. 23Abükyü fü müdeng kangcho ko azarü khüdu nümüsucho. Abükyünü yocho, 24“Tsingrangba-nü I khyang azarü khüdu jo I ashah hitsijüko; ko abükyünü aneng Josef dsijücho, ko yocho, Abüdongba-nü adesü I khyang azarü apa khüdu jüngtü!”
Laban te Jakob-nü Rehtacho
25Josef suropü khanglang Jakob-nü Laban te yocho, “Ihrü lih yang thali tsisohng. 26Ihnü nüh dikeh shehcho I tsurü nitpürü I khyang jüng, ko Ih tsinung. Ihnü nüh khütoi dikehcho nühnü müdhele.”
27Laban-nü abi te yocho, “Ihnü hi yore: Abüdongba-nü nü khyanglangnü Ih müwajüchoepü zii khunü Ihnü müdhele. 28Nüyo amii Khütoinang young, Ihnü jünung.”
29Jakob-nü lalingcho, “Ihnü nüh khüta dikehcho ko I pohki nü santi khüta dhingyeh zikeh kangchonang nühnü müdhele. 30Ih müroede nüh san azikyah du licho, ta ade khütango kangko, ko Abüdongba-nü Ih khüdederü wüchonang müwajücho. Ta adelü Ipu kukhi nengdang nguchinung akyange.”
31Laban-nü tsingdhingcho, “Ihnü nü khyang tu jünung?”
Jakob-nü lalingcho, “Ihnü angang tu mükhyünung. Ko alümcho hi nühnü hekhang Ihnü mütozah nü san xükümnung. 32Ihnü chünye nü santi apüm lanü dhingpü san anyah apüm lapha kehcho, ko xubongtüyah kehcho miza apüm throcheh Ih khyünung. Ihnü amii tsü hütsü du khyünung. 33Aronungla hütsü khu Ih yuje müchocho mülakhüti rangchehnung. Nühnü khode I shehcho dhingnung ronang, miza khürü xubongtüyah ko lapha mükehpü ko san khürü anyah tenü apa zehkhang, hütsü afühchoepü nühnü müdheing.”
34Laban-nü yocho, “Nyengchore. Nühnü yocho roh-i thsanung.” 35Ta hütsü nyümong Laban-nü miza amüdri ko lapha kehcho apung apüm, xubongtüyah kehcho atrüh apüm; ko san anyah apüm throcheh atsurü khyang jücho 36ko hiri santi tsü nüpü nyümong asang langtsehla Jakob tenü za tsisohcho. Ko Jakob-nü Laban san anyingcho tsü nyahcho.
37Jakob-nü Poplar, almond ko Plan singdongti chahnü ajengza axeng hirocho ko müdrimütrahnü aküp khohcho. 38Abinü singjengza hiri tsü santi bete arüh kih yongchah yohpüjücho. Abinü arüh tsü hütsüla yohpüjücho, tunüo kanglungrüti kih yongnung rode tungtacho. 39Hütsünü khode miza tsü singjengza yola tsü mütrünang, arühnü xubongtüyah kehcho, amüdrimütrah ko lapha kehpü mütrücho.
40Jakob-nü san ko miza pathsa yohpücho ko Laban miza anyah ko xubongtüyah kehchoti lahpi be pisohcho. Hütsüta abinü abi santi zikehsohcho ko Laban san tenü pathsa yohpücho.
41Khode kanglungrü anyünyeh tungtacho, Jakob-nü kihyongla tsü arüh bete singjengza tsü yohjücho, ko hütsü michah tsü mütrüsohcho. 42Ta re müzeh kanglungrü betelü singjengza tsü müyohjücho. Hütsüta tunyah mülipü re müzeh kanglungrü apüm Laban yo kangcho ko anyünyeh apüm Jakob yo kangcho. 43Hütsüta nguchi Jakob tsü khütang alirü kangcho. Abi san, kulirü, ut ko gadu khütang kangcho.
Currently Selected:
LIPOH 30: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
