Zenez 31
31
Zakob I Sove kot Laban
1Zakob ti antann konversasyon bann garson Laban. Zot ti pe dir: Zakob in pran tou sa ki pour nou papa. Se avek byen nou papa ki i'n ganny tou son larises.
2Zakob ti remarke ki latitid Laban anver li, ti nepli parey avan. 3Alor, SENYER ti dir Zakob, “Retourn dan pei ou zanset, dan pei kot ou sorti e mon ava avek ou.”
4Zakob ti fer apel Rasel ek Lea ki ti dan lakanpanny avek bann troupo mouton. 5I ti dir zot: Mon remarke ki zot papa napa menm lestim pour mwan parey avan. Me Bondye mon papa in avek mwan. 6Zot konnen zot menm ki mon'n servi zot papa avek tou mon lafors. 7Me zot papa in esey tronp mwan e in sanz mon lapey dis fwa, me Bondye pa'n permet li fer mwan dimal. 8Sak fwa ki i ti dir: Bann zannimo pitakle i ou lapey, tou bann zannimo dan troupo ti ganny piti pitakle. Si i ti dir: Bann zannimo avek reye i ou lapey, tou zannimo dan troupo ti ganny piti reye. 9Se dan sa fason ki Bondye in pran troupo zot papa e in donn mwan. 10Ler bann zannimo dan troupo ti an sezon, mon ti lev lizye, e dan en rev, mon ti war ki bann mal ki ti pe akouple ti swa pitakle, oubyen reye. 11Apre, lanz SENYER ti dir mwan dan sa rev: Zakob!
Mon ti reponn, “Wi! La mon la.”
12I ti dir, “Lev ou lizye e gete! Ou ava war ki tou bann bouk ki mont lo bann femel i pitakle. Mon'n war tou sa ki Laban pe fer ou. 13Mwan menm Bondye ki ti aparet avek ou Betel, kot ou ti vers delwil lo sa ros pilye sakre e kot ou ti fer en ve anver mwan. Aprezan leve! Kit sa pei e retourn dan pei kot ou ti ne.”
14Rasel ek Lea ti reponn li, “Nou nepli annan okenn par dan lakaz nou papa. 15Pa i konsider nou koman bann etranze? I'n vann nou e i'n manz tou sa larzan. 16Tou sa larises ki Bondye in pran avek nou papa i pour nou ek nou bann garson. Aprezan, fer tou sa ki Bondye in dir ou.”
17Zakob ti leve. I ti pran son bann zanfan ek son bann fanm e met zot lo samo. 18I ti pran tou son troupo ek tou son byen ki i'n gannyen, troupo ki i ti'n aste Padann-Aranm e i ti al kot son papa, Izaak, dan pei Kanaan.
19Laban ti'n al koup lalenn lo son bann mouton e Rasel ti profite pour vol bann pti stati dan lakaz son papa.
20Zakob ti tronp Laban, sa Arameen. I ti sove san dir ki i ti pe ale. 21I ti sove avek tou sa ki ti pour li. I ti travers larivyer e pran semen ki al dan direksyon rezyon montanny Galaad.
Laban I Pourswiv Zakob
22Trwa zour plitar, Laban ti aprann ki Zakob ti'n sove. 23I ti pran son bann zonm e pourswiv li pandan set zour ziska ki i ti zwenn li dan rezyon montanny Galaad. 24Me aswar, Bondye ti aparet avek Laban, sa Arameen, dan en rev. I ti dir li: Fer atansyon ou pa dir nanryen Zakob, ni an byen ni an mal.
25Laban ti zwenn Zakob ki ti'n enstal son latant dan montanny. Laban li, avek tou son lantouraz ti al kanp Galaad.
26Laban ti dir Zakob, “Ki ou'n fer? Ou'n tronp mwan e ou'n pran mon bann fiy konmsi bann prizonnyen lager. 27Akoz ou'n sov an kasyet, e tronp mwan san dir mwan? Mon ti ava les ou ale dan lazwa ek sanson, e avek lakonpannyman lenstriman lanmizik. 28Ou pa'n ni les mwan anbras mon bann garson ek mon bann fiy, ni dir zot orevwar. Ou'n azir dan fou. 29Mon ti ava kapab fer ou dimal, me Bondye ou papa in koz avek mwan yer swar. I'n dir mwan: Atansyon, pa fer nanryen Zakob, ni an byen ni an mal. 30Menm si ou ti anvi retourn kot lakaz ou papa, akoz ou'n vol mon bann pti stati?”
31Zakob ti reponn Laban, “Mon ti per. Mon ti krwar ou pou vin aras mwan ou bann fiy. 32Me sa enn avek ki ou ava war ou bann bondye, pou perdi son lavi. Dan prezans ou bann zans, gete kwa ki pour ou e pran.” Zakob pa ti konnen ki Rasel ti'n vol sa bann bondye.
33Alor, Laban ti antre dan latant Zakob, dan latant Lea, e dan latant son de servant, me i pa ti trouv nanryen. I ti sorti dan latant Lea, e antre dan latant Rasel. 34Rasel ti'n kasyet sa bann pti stati anba lasel samo e i ti'n asiz lo la. Laban ti rod dan latant, me i pa ti war nanryen. 35Rasel ti dir son papa, “Pa ankoler si mon pa leve devan ou, akoz mon annan en lendispozisyon ki bann fanm i gannyen.”
Alor, i ti rode, me i pa ti war son bann stati.
36Zakob ti ankoler, e repros Laban. I ti dir Laban, “Ki mon'n fer ou? Ki pese mon'n fer, ki ou'n pourswiv mwan konmsa? 37Ou'n fouy dan tou mon keksoz, eski ou'n trouv keksoz ki pour ou? Met li devan mon bann zans, e demann zot zizman ant nou de. 38Mon'n avek ou pandan 20 an, okenn ou bann kabri ek mouton pa'n avorte. Ou ti fer mwan rann kont sa ki ti ganny vole aswar koman lizour. 39Mon pa ti anmenn kot ou, okenn zannimo desire par bebet sovaz. Mon ti kouver tou fre mwan menm. Mon ti pran responsabilite, menm si i ti ganny vole aswar oubyen lizour. 40Lizour, mon ti soufer lasaler, e aswar lafreser. Mon pa ti ganny sonmey. 41Mon'n fer 20 an kot ou, mon'n servi ou pandan 14 an pour ou de fiy, e 6 an pour ganny bann troupo. Ou'n sanz mon lapey 10 fwa. 42Si Bondye mon papa Abrahanm, ki osi Bondye Izaak, pa ti lo mon kote, sirman ou ti pou fer mwan al lanmen vid. Bondye in war mon soufrans e travay ki mon'n fer. Yer swar in rann zizman dan mon faver.”
Zakob I Fer En Lalyans avek Laban
43Laban ti reponn Zakob, “Sa bann fiy se mon bann fiy, sa bann zanfan se mon bann zanfan, sa bann troupo se mon bann troupo, e tou sa ki ou war i pour mwan. Me ozordi ki mon kapab fer pour mon bann fiy oubyen mon bann zanfan ki zot in donn nesans? 44Annou fer en lalyans ant ou ek mwan. Sa lalyans ava vin en temwen ant ou ek mwan.”
45Zakob ti pran en ros e plas li koman en pilye sakre. 46I ti dir son bann zonm, “Ranmas ros.”
Zot ti ranmas ros e met zot an ta; zot ti manz lo la. 47Laban ti apel sa landrwa Yegar-Sahadouta, me Zakob ti apel li Galeed. 48Laban ti dir, “Sa ta ros i en temwen ant ou ek mwan ozordi.” Pour sa rezon i ti ganny apele Galeed. 49I ti osi apel li Mispa, akoz i ti dir, “SENYER ava veye ant ou ek mwan, kan nou lwen e nou pa war avek kanmarad. 50Si ou maltret mon bann fiy, si ou pran lezot fanm, pa avek zonm ki ou annan zafer, me Bondye i temwen ant ou ek mwan.”
51Apre, Laban ti dir Zakob, “Get sa ta ros ek sa pilye sakre ki mon'n etabli ant ou ek mwan. 52Sa ta ros i en temwen e sa pilye sakre i en temwen ki mon pa pou depas li pour vin kot ou, e ni ou, ou pa pou depas sa pilye pour vin fer mwan ditor. 53Bondye Abrahanm e Bondye Nahor, ki osi Bondye zot papa, ava ziz ant ou ek mwan.”
Alor, Zakob ti fer serman devan Bondye Izaak son papa. 54Zakob ti ofer en sakrifis lo sa montanny e i ti envit son bann zonm pour manz dipen. Zot ti pas tou lannwit lo montanny.
55Laban ti leve granmaten, anbras son bann pti zanfan ek son bann fiy. I ti beni zot, e i ti retourn se li.
Currently Selected:
Zenez 31: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
