HONGTHONHOI CHHI 10
10
Peter naiuso Kornelia
1Kaisaria nai khaiunia tsak nian nou Kornelia, sau Romhai süpai sübao tü lüko “Italia hai süpai” ta jonkü aniakei tsak noiküla. 2Apa don nai mongkiutsün khaiunia tsak; apa naiuso apa tsamkhaiu athumüh Goa amkhamkü noiküla. Apaüh lüko Yihudahai angja khaiuniahoi nouso tü hachukü piakü chhin naiuso Goa tü tsülaokü misaokü noiküla. 3Nyitso anyiwem yankü atao sümebaji thatso nai apaüh atsangshei tsak ep, nungko apaüh Goa hongthon tsak apa dongai shitsün tsangsheikü epkü apa tü nungti ngiom, “Kornelia!”
4Apaüh hong noutü ahatnai thapkü ngiom, “Nung ti noin, Apaou?”
Nai hong nou apatü ngiom, “Ni misao saotsün naiuso hoikü kiutsün nou Goa monglingiu naiuso amisao thalaau khemkü noin. 5Lo Jopa nai khaiunia ahong, naiuso Simon sautü Peter ta jonji apa nialokü ashi. 6Khiamnok sainai kihtsün Simon nian nou nyikhun shantsün tsamai apa mesan tsak saokü noin.” 7Nungaih tilai apatü ngiotsün aünhong nou pungekü khu, apaüh tsamki nime naiuso süpaihoi ongko asai apa yathsüokü noitsün don nai mongkiutsün tsak jon, 8naiuso apaüh ngüne tü nungso ngio apem ngiokütün phiai ngüso Jopa ai hong.
9Nungthannyi, ngüso yamai tsakeikü khutsünko Jopa shimkü shin, nungko Peter anyiwem thatso nai tsamkhaiu ai misaoau sungh. 10Apa naiujikankü chih heau aiu, naiuso ngüsoüh khemlotsün taoko apaüh atsangshei khuwan. 11Apaüh aün soppankü ep nungko thengkam tsak khekkü ne apon tsak ano püle ai hekü goumchiko saliantsün ep. 12Nung ne nouko ahok püle potsün thainian in apem goumchiko tsakeitsün naiuso koiai jeikeitsün waio nouso noiküla. 13Nungko sangh tsak nou apa tü ngiom, “Peter, achu, küta loatkü lühe!”
14Lüko Peterüh ngiom, “Apaou, nungti tsüde! Amkham yamko tsüsiokün tsüdekünai tsüyanthsüokün ngo tilaitso tsühe.”
15Nung sangh nou loüh apatü ngioshin, “Goa nou yanthsüokü noin ta ngiowantsün tilünou tsüyanthsüo ta lakankeishi.” 16Nung atao samjam ngoikü thawao, naiuso nungphiai nung ne nou aün ai laokü kankü sungan. 17Peterüh nung atsangshei ti alat ta ngalakü noitsünko, khaiunia sauhai Korneliaüh hongkü noiküla ngüsoüh Simon tsam epsan, naiuso ngüso lo bekhan khako tsakü noiküla. 18Nungaih ngüsoüh, “Simon Peter ta niankü nungko mesan tsak noimo?” ta jonkü sangh.
19Peterüh loüh nung atsangshei nou ti alat ta yanglukü noinai, Onthso nou apatü ngiom, “Anglu! Ni yamtsün khaiunia süme nungko noin. 20Nungtiphe khemloküta lüsao, naiuso ngüsoko aikü khuau lahenyi.” 21Nungtiphe Peter saoküta nung khaiunia nouso tü ngiom, “Asamüh yamtsün khaiunia nou nung ngü noin. Asam titita shin?”
22Ngüsoüh thalakü ngiom, “Sam tsom khaiuko Apaou Korneliaüh hongkü noin.” “Apa Goa tü amtsün Yihuda khaiunia chikü nou asuhat alomsan kiutsün, apa khaiunia amei tsak noin. Ni ngiotsün apaüh angluau Goa hong nou ni apa tsamai nialokü shiau apatü ngiom.” 23Peterüh nung khaiunia nouso apa tsamai niathio küta ngüso tü nungsoh nou nungko ashaman ta koja.
Nungthannyi apa tsalokü ngüsoko aikü khuha naiuso Jopa ai noitsün amonglamhoi ajantso apako khuha. 24Nungthannyi nai apa Kasaria ai shingoinai, Kornelia apa tsammonghoi naiuso apaüh jonkamtsün haimeiteng nousoko aikü apa tü taiukü noiküla. 25Peter tsamai naptaoko, Kornelia apako pheteküta apa khako kaukü am. 26Lüko Peterüh apatü, “Atsa,” “Ngo lüko khaiunia tsaklu noin” ta ngiom. 27Korneliako chitechitekü apa tsamai napnai apaüh khaiunia piakü kamshinoikü ep. 28“Yihuhaiüh melemaohai tü sailuau tsüdekünai aikü kamkü tsakeiau apa donyam nai ayam tsünoi ta asamüh asam chija meikü ngen. Lüko ngo khaiunia ajantso amkham yamko tsüyanthsüo si tsüsio ta tsüvesanau Goa nou ngü hau haniu. 29Nungtiphe tilai asamüh ngü jonau hong, ngü ti aletlo tsünoikü shin. Naito ti thaiutha asamüh ngo jonau hong ta ngü asam tü sangji?” 30Korneliaüh ngiom, “Samnyi khako lotao thatsoko nai, sümebaji nouko ngo jütsamai misaolokü noiküla. Alekta neshe sheitho laplapkü thokü khaiunia tsak jükhako tsa 31kü ngiom: ‘Kornelia! Ni misaotsün Goa nou lula-iu naiuso ni mehau amai tsüyangkü kiutsün Goa khako yangsankü noin. 32Jopa nai Simon Peter ta jonkü noitsün khaiunia tsak dongai khaiunia ajantso lühong. Apa nyikhun chiutsün khaiunia Simon sau khiamnok sainai kihji apa tsamai mesan tsak thekü noin.’ 33Nungtiphe nungailu ngo ni jonau hong, naiuso ni shitsün nung mei. Nungtiphe lo sam Apaou nou ayamhantsün tilünou luloau sam chikü Goa khako kamkü noin.”
Peterüh Chimtsün
34Peterüh chiteau yachu: “Goa da phaphi phamong tsünoi ta lo ngo atsüoteng seisanji. 35Sauhaiüh apa amkhamji naiuso ayamtha nou chhiji ngüso ti mele noilünou apa khako aloau tinkü naiuso maikü noin. 36Sau apem khaiuko Apaou noin nung aalo Ngem Amei Yisu Khrista tsangkü Israel thsoso dongai apaüh hongtsün nung ngem asamüh ngen. 37Yohanüh chimkü limkiutsün yanlükhunkütün phiai, Galil ai yakü Israel goumchi apemai ti chhi asong shinap nung asamüh ngen. 38Nazaret hai nou Yisu tü Goa nou Asio Onthso naiuso Oukong titi kheplutkiu nungh thaiutha asamüh ngen. Apa chhi amei chhikü naiuso Biya oukong nai noinso lomeikiukü alumai tsakei, tititenai Goa apako hakü noiküla. 39Apaüh Israelhai goumchi ai naiuso Yirusalem nai chhitsün apem thaiutha sam mitha noin. Küta ngüsoüh apa paiphu tsak ta lalutkü loatkü wan. 40Lüko Goa nou apa samnyi phiai ean ainou ahkü shi-in, naiuso epi-in, 41nung khaiunia pungkü hau tsüde, lüko Goa nou sauhai mitha kiuau chosanankü noiküla, nungh sam apa ee ainou ahkü shiküta samko aikü he naiuso shiukü noiküla nungso dongai sungh. 42Khaiuniahoi nouso tü Ngem Amei chimau naiuso ee si aa nouso tü mikhemau Goa nou oukong kiutsün tsak nou apa noin ta mitha kiuau sam tü thoilut. 43Sauhaiüh apa da monglame apa nian oukong tsangkü ngüso apemüh chaithewan eppe ta ngiokü e-pohoi nouso apemüh apa thaiutha chiten.”
Melemao Haiüh Asio Onthso Louji
44Peterüh ngio chitekü noitsünko apa ngio angkü noitsünso apem chiai Asio Onthso saom. 45Yihudahai amonglamhoi nouso sauhai Jopa ainou Peterko hakü shikü noiküla ngüsoüh melemao hai chiai Asio Onthso kheplutkiutsün epkü ngüso ngawan. 46Tititenai ngüsoüh lüko amaohai ngioko Goa Asong nou lomsankü chitekü lula. Peterüh ngiom: 47“Samüh lokü shitsünli, nung khaiunia nousoüh lüko Asio Onthso nou lou-iu. Naito, ngüso khiamai limkiuau ainou lolaokü taiuau ajantsoüh shio-e süne?” 48Nungtiphe apaüh ngüso Yisu Khrista nianko khiamai limau ngiokiu. Nungaih ngüsoko ajekhaiu intso noihaau ngüsoüh apatü koja.
Currently Selected:
HONGTHONHOI CHHI 10: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
