HONGTHONHOI CHHI 11
11
Peterüh Yirusalem Donthe nai Ngiongem Kiuji
1Melemaohaiüh lüko Goa Ngio lu-iu ta hongthonhoi naiuso Yihuda apemai noitsün amonglamhoi nousoüh lula. 2Tilai Peter Yirusalemai sungh, melemaohaiüh lüko atippantsün louau noin ta monglamtsünsoüh apa lochikü ngiom, 3“Ni tsütippankün melemaohai tsamai mesan tsak noiküla, naiuso ni ngüsoko aikü lüko heshiuhan!” 4Nungtiphe ayanai yakü ti thawaokü noiküla nung thaiutha ngiongem apem Peterüh ngüso hau kiu:
5“Tilai ngo Jopa noknio nai misaokü noiküla, Ngo atsangshei tsak ep. Nungaih thengkam tsak khekkü ne asong tsak anuo püle ai semkü aün ainou saotsün ngo ep, küta nung jüdongko laowan. 6Ngü nung tü tsüokü amongai thapnai nungko tsam thainian liuthainian, chajeen naiuso ajeikeitsün waio nouso ep. 7Nungaih ngo sangh tsaküh ngütü, ‘Peter, achu, küta nungso loatkü lühe!’ ta ngiotsün lula. 8Lüko ngü ngiom, ‘Apaou, nungti tsüde! Amkham yamko tsüsiokün tsüdekünai achinyan eheshiu tilaitso jüsonai monap.’ 9Aün ainou sangtsaküh loühjam ngioshin, ‘Ti Goa nou losiokü taiukiu nungtü ni tsüsio ta lavesan.’ 10Nung samjam ngoikü thawao, naiuso athon nai nungso apem aün ai tenkü sungan. 11Nungtaotengko nai Kaisaria ainou khaiunia süme jüdongai hongshitsünso ngü noitsün tsamai shisaom. 12Onthso nou ngü ngüsoko tsühenyikü aikü lükhu ta ngiom. Nung Jopa ainou shitsün amonglam deisiniohoi khaiunia luok nouso ngüko hakü Kaisaria ai khu, naiuso sam apem Kornelia tsamai nap. 13Apaüh sam hau aünhong tsak apa tsamai titi tsakü noiküla nung chiten, nung hong nou apatü ngiom, ‘Simon Peter nian nou khaiunia tsak thaiutha Jopa nai khaiunia jantso ahong. 14Naiuso ti ngio nou ni naiuso atsammong apem kipsane, nung apaüh ni tü ngio-e.’ 15Naiuso ngo tilai ngiochiteau tsalo, chongting nai sam chiai saotsünli Asio Onthso nou ngüso chiai saom. 16Nungaih ‘Yohanüh khiam nou limkiu, lüko asam Asio Onthso nou limkiu-e.’ Ta Apaou nou ngiotsün ngü yangsan. 17Nungtiphe tilai samüh Apaou Yisu Khrista da monglam, sam hau paopei kiutsünli Goa nou ngüso hau lüko wekü kiunaito Goa lolaoau shiotsün ngü sau!”
18Tilai ngüsoüh nung lula, ngüsoüh khengshitsün laoloküta Goa lomsankü ngiom, “Naito melemaohaiüh lüko aa epau thaiutha mongphokleau aküo nou Goa nou kiu!”
Antiok nai Donthe
19Stephan loatkü ajeiat thawaotsünko amonglamhoi sauhai Fonika, Kupra, naiuso Antiok saokü nung ngem Yihudahai tü lu chitekü nok meankü pengkü khu. 20Lüko amao amonglamhoi nouso sauhai Kupra naiuso Kurini ainou noiküla, ngüso Antiok nai khukü Apaou Yisu thaiutha Ngem Amei nou Melemaohai tü lüko chimkiu. 21Apaou oukong ngüsoko hakü noiküla, naiuso piakü nou monglamkü Apaou dongai phokle.
22Nung ngiongem nou Yirusalem nai noitsün donthe shisaom, nungtiphe ngüsoüh Barnaba Antiok nai hong. 23Tilai apa shisaokü Goa nou khaiuniahoi nouso titi oukkiu nung ep, apa monglingkü ngüso apem tü mong apem nou Apaou nouko mongkiukü noiau kojakü lotsüokiu. 24Barnaba nung amonglam naiuso Asio Onthso nou meankü noitsün khaiunia amei tsak noiküla, naiuso khaiunia piakü Apaou dongai niakü shin.
25Nungai Barnaba Tarsa ai Saul tü yamkü khu. 26Tilai Barnabaüh apa epiu, apaüh Saul Antiok nai nialokü shin, küta ngüneüh donthe nouso tü naiuso hoi asong tsak tü tsandekü noi. Antiok nai nung amonglamhoi tü ayating Khristan ta jon. 27Nungtao thatsokonai E-pohoi ajantso Yirusalem ainou Antiok ai saom. 28Ngüso ongko Agaba ta niankü e-po tsak tsaküta Onthso oukong tsangkü goumchi apem nai athsüoting naiusile tsak shi-e ta ngiokiu. (Nung Klaudia vetaoko shithawao.) 29Sahoi nouso khaiunia pungkü nou meshenüh shiotsün lektso Yihuda goumchi ai noitsün amonglam deisinioso tü hachuau thalo. 30Ngüsoüh nung chhiküta tangka nou Yihuda goumchi ai noitsün donthe petche nouso dongai Barnaba si Saul ne tsangkü hong.
Currently Selected:
HONGTHONHOI CHHI 11: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
