HONGTHONHOI CHHI 13
13
Barnaba si Saul ne Chosan küta Hong
1Antiok nai noitsün dontheko E-po naiuso hongthonhoi ajantso noiküla, Barnaba naiuso Niker ta jontsün Simon Kurinihai Luküh lüko Herod nokshingpaou nouko tsadsan nou nio Manaen, naiuso Saul. 2Nungko ngüsoüh Apaou yathsüokü naiuso keithonkü noinai, Asio Onthso nou ngiom, “Barnaba naiuso Saul ne Ngü jontsün chhi chhiau jü thaiutha mothikü ataiu.”
3Nungtiphe ngüsoüh keithonkü misao sao, naiuso ngüso pha nou ngüne tü thangküta ngüne hong an.
Kupra nai
4Nungtiphe Asio Onthso nou ngüne hongkü Selukia ai saom. Nung ainou ngüne kheng nouko Kupra ai khu. 5Tilai ngüneüh Salami ai shisaom, ngüneüh Yihuda kamthang nousoko Goa Ngio chim. Naiuso Yohan sautü Mark ta jonji apa ngüsoko chhi nai hachuau hakü noiküla.
6Tilai ngüne khiamjet apem thsatkü Pafa saokü khu, atsüotsüdekün e-po Yihudahai khaiunia tsak nian nou Bar Yisu, ngüsoüh ep. 7Serki Paulus sau khüyitsüo khaiunia nung apa khiamjet nai nokshingpaou hai tsak noiküla. Nung nokshingpaou nou Barnaba naiuso Saul tü Goa Ngio ang-au aiukü apa khako jon. 8Lüko e-po Elumaüh ngüne kiapkü nokshingpaou nou amonglam tsülo-iuau kowe. 9Lüko Saul sautü loüh Paul ta lüko jonji apa Asio Onthso nou meankü apa tü langlutkü thap. 10Naiuso ngiom, “Phoklelaple apem nou meantsün ni biya thso! asio apem thako eh, ni Apaou atsüoting yam lokiangau thaiutha tsülao-e süne! 11Apaou pha ni da lo sao-e, naiuso atao tsak thaiutha awon tsüepkü ni niopek iula-e. Nungailu khiamle naiuso anya nou apa tü shisao, naiuso apa pha nai thalokü nialoau thaiutha apaüh ajantso yamkü khu. 12Tilai nokshingpaou nou nung athawaotsün ep, nungai apaüh Apaou nou tsandetsünko ngakü monglam.
Antiok naiuso Pisidia nai
13Paul naiuso apa haiso Pafa ainou Pamfulia nai noitsün Perga noknio ai kheng nouko shin, nungko Yohan sau tü Mark ta jon, apaüh ngüso letaiukü Yirusalemai laokü khu. 14Lüko ngüsoüh Perga ainou khukü, Pisidia ai noitsün Antiok ai shin, nungko ngüsoüh Yihuda Anuonyi Yihuda kamthang nai sungkü moknoi. 15Naiuso ngiokhem si E-pohoi thsam velukütünai, Yihuda kamthang nai nokshinghoi nousoüh ngüso dongai hongkü ngiom, “Deisinioso, asamüh khaiunia nouso thaiutha alutsüo ngio noi nai angiosai.” 16Paul tsaküta apa pha loksankü chiteau yachu:
“Israel thsoso, naiuso Goa amkhamtsün melemao nouso chikü: ngütü anglu! 17Ijip goumchi ai gohmao khaiuniahaili kihtsün tao Israel mele Goa nou sam paosiposo mele asong tsak shankiu. Goa nou ngüso Ijip goumchi ainou apa oukong asong tsangkü niasan. 18Naiuso pon aopüle liutsa nai apaüh ngüso methsohaili tsadkü paosan. 19Apaüh Kanan goumchi ko kau chinyat mowan-ikütünai ngüsoko nou pon 450 thatso ngüso hau tengkam kam-i. 20Nung yanlükhunkütünai E-po Samuel tü yangkü apaüh ngüso hau mikhemhoi nouso kiu. 21Naiuso tilai ngüsoüh nokpao tsak saom, Goa nou Benjamin kau ainou Kishi thso Saul ngüso nokpao pon aopüle theau thaiutha kiu. 22Saul wankütün phiai Goa nou David ngüso nokpao theau shingsan. Goa nou David thaiutha nungti ngiom, ‘Jümong tsamtsün naiuso jümongchiutsün apem chhiau Jese thso David Ngo epiu.’ 23Apaüh thalotsünli Goa nou sau David ainou nyimsantsün Israel mele aasanau chosan, nung Yisu noin. 24Apa khako Yohanüh mongphoklekü limkiutsün Israelhai apem tü aya chim. 25Naiuso Yohanüh apa khemkü shinai ngiom, ‘Asamüh ngo sau ta yangji? Ngo apa tsüde. Lüko anglu, jüphiai tsak sau hokkhut auo sokau lüko ngo tsütin apa shiji.’
26“Deisinioso, Abraham ainou nyimsan thsoso, naiuso asam ongko Goa suhattsünso sam dongai nung aasan ngio hongiu! 27Tititenai Yirusalem nai noinso naiuso ngüso nokshing nousoüh apa tsünge, tsüdekünai Yihuda Anuonyi pungkü misao saotsün E-po ngio tsüngelaphe, apa da aphiu nou lolutkiukü nung ngio ngüsoüh shinap-in. 28Naiuso apa eau apa tü aphiu tsüepsan lüko ngüsoüh Pailat tü apa loatau sangh. 29Naiuso ngüsoüh apa thaiutha satkü noi nou apem shinapkütünai ngüsoüh apa paiphu ainou losankü etam nai taiu. 30Lüko Goa nou apa ee ainou ahkü shi-in; 31naiuso Galil ainou Yirusalem ai sauhai apako tsakeikü noiküla, ngüso tü piaküjam apa tsangsheikü sungkü han. Ngüso lo Israel mele tü apa thaiutha mitha nouso noin. 32Naiuso sam paosiposo tü thalotsün thaiutha, 33Yisu ahkü shiphe, Goa nou nung sam thsoso hau shinappi; Nianlom Jih haove nime nouko satkü noitsünli:
‘Ni Jü Thso,
lonyi ngo Apo au iula-iu.’
Nung Ngem amei samüh asam dongai kankü shiji.
34Naiuso apaüh apa ee ainou ahkü shitsün thaiutha loto choikü tsükhuau nungti chite-iu;
‘David hau kiutsün asio naiuso atsüoteng ouk nouso ngo ni hau kiu-e.’
35Tititenai apaüh loüh Nianlom Jih haove amao tsakai ngioji:
‘Thumkü kiukü yathsüotsün ni
etam nai choikü tsükhu-i-e.’
36Tititenai Davidüh meshen vetaoko Goa athatsan yathsüokütünai, apa ean, naiuso apa paosiposoko taiu naiuso choikü khu. 37Lüko Goa nou sau ahkü shi-in, apa choikü tsükhu. 38Nungtiphe deisinioso, asamüh nung lüngelo, nung khaiunia tsangkü angei wankiutsün asam tü ngiopeng kiuji. 39Naiuso ti ainou Mosa Ngiokhem nou asam penkiuau tsüshio, apa tsangkü nung apem ainou amonglamhoi pungkü penkiuji. 40Nungtiphe E-pohoi thsam nai chitetsün ngio asam da tsüshinapau asam lütsüolo.
41‘Asam alotsaotsünso athaplu!
Lekkatküta lü-ean! Tititenai ngü lonyi ti chhiji tilai khaiunia ajantsoüh nung chite lüko,
asamüh nung da tsümonglame!’”
42Tilai Paul naiuso Barnaba ne Yihuda kamthang ainou khu, khaiuniahoi nou nungso thaiutha ngüso tü loüh ashiau nou Yihuda Anuonyi shishikü ngüso tü chite ta sang. 43Lo Yihuda kamthang nou tilai wonan, Yihudahai naiuso melemaohai Yihuda don nai tsüojinkü monglamtsünsoüh Paul naiuso Barnaba phiai hoilut. Ngüsoüh ngüso tü Goa atsüojin nai tsülaokü noiau lotsüo.
44Ashiau Yihuda Anuonyi noksong nai khaiunia apia Goa Ngio angau aikü kamshikü noiküla. 45Lüko tilai Yihudahaiüh hoi nou ep, ngüso aluau tsüaiukü mongkhemkü sungh, naiuso Paulüh chitetsün ngio nouko ngematkü lotsao. 46Nungai Paul naiuso Barnabaüh mongsongkü chitekü ngiom, “Goa ngio asam tü chong chiteau noiküla, lüko asamüh nung wantsün naiuso asaita aa thaiutha tinkü tsüde ta asamüh asam chija ngemattsün epkü, athaplu, sam melemaohai dongai phokleji.
47Tititenai Apaou nou nung athoiluttsün sam hau kiukü taim;
‘goumchi apem aasanau,
Melemaohai thaiutha ngü ni awon tsak shankiu-iu.’”
48Melemaohaiüh nung lulakü mongling naiuso Goa Ngio ajinka-i. Naiuso asaita aa thaiutha titso ngemtaiukiukü noiküla, ngüsoüh monglam.
49 Apaou ngio apemai nok meankü khu. 50Lüko Yihudahaiüh noknio aniakei khaiunia nouso naiuso melemao nyiuhai sauhai Goa amtsün nai aniakei noiküla nungso lotsüo. Ngüsoüh Paul naiuso Barnaba thako ajeiat kiutsün tsalo, naiuso ngüne ngüso goumchi elung yankü koman. 51Luko ngüneüh ngüso thako ngüne hokkhem ai pu pattan, naiuso Ikonia saokü shin. 52Sahoi nouso amongling naiuso Asio Onthso nou mean.
Currently Selected:
HONGTHONHOI CHHI 13: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
