HONGTHONHOI CHHI 8
8
Saulüh Donthe Jeiat-iji
1Saulüh Stephan e-iau mongchiokü noiküla. Nung ajekhaiutengko Yirusalem nai donthehoi thatü thsüokü ajeiat sungh. Hongthon nousolu noikü amonglamhoi apem Yihuda naiuso Samariahai singtap apemai thappekkü pengkü khu. 2Nungko don nai mongkiutsün khaiunia ajantsoüh Stephan thaiutha sangh songkü vekü mongsaiu küta apa khanan.
3Lüko Saulüh tsam pungkü nai napküta amonglamhoi melo si menyiu tenkamkü akhotsamai thiokü donthe lothekiuau kowekü noiküla.
Samaria nai Ngem Amei nou Chim
4Amonglamhoi pengkü khukü noinsoüh alumai Ngem Amei nou chimkü khu. 5Philip Samaria noknio ai saokü nungaih noitsün khaiuniahoi nousotü Khrista thaiutha ngüso tü chim. 6Tilai ngüsoüh Philipüh chitetsün lula, naiuso apaüh chhitsün ii nou ep, hoi nou mongkiukü apa tü ang. 7Tititenai angei onthso suntsün piakü ainou angei onthso nouso sangh asong nou vekü sungkhuwan. Akelakia suntsün naiuso chiune piakü lomeikiu. 8Nungaih nung noknio nouko amongling asong noiküla.
9Nung noknio nai Simon nian nou khaiunia tsak alonga chhitsün atao tsakko kihkü noiküla. Apa lüko asong tsak ta yang. 10Naiuso noknio nai noitsün pungkü, hoi amomo apem ainou apa tü mongkiukü ang. Ngüsoüh ngiom, “Oukong Asong ta ngiokü shitsün Goa oukong nou apa noin” 11Ngüsoüh apatü ang, tiautenai atao laiukü aita apaüh apa alonga chhi nou ngüso ngawan-in. 12Lüko tilai Goa nokshing thaiutha Ngem Amei naiuso Yisu Khrista nian Philipüh chimtsün tü ngüsoüh monglam, ngüso pohai si nyiuhai limkiu. 13Simonüh lüko monglam naiuso limkiukü Philipko tsakei, nungai ii naiuso athanga asong chhitsün epkü apa ngawan.
14Tilai Yirusalem nai noitsün hongthonhoi nousoüh Samariahaiüh Goa Ngio nou lou-iu ta lulan, ngüsoüh Peter si Yohan ne ngüso dongai hong. 15Tilai ngüne shisaom, ngüneüh amonglamhoi nousoüh Asio Onthso loau thaiutha misao sao. 16Tititenai ngüso sau da tso Asio Onthso mosaokü ngüso Apaou Yisu niankolu limkiukü noiküla. 17Nungaih Peter si Yohan neüh ngüso chiai pha nou thang, nai ngüsoüh Asio Onthso lo.
18Hongthon hoi nousoüh ngüso pha amonglamhoi tü thangnai Asio Onthso kiutsün Simonüh ep. Nungtiphe apaüh Peter si Yohan nehau tangka, 19kiukü ngiom, “sauhai da ngü jüphaüh thange, apaüh Asio Onthso loaulümeikü nung oukong ngü hau lüko akiu.”
20Lüko Peterüh thalakü apatü ngiom, “Ni naiuso atangka niko lümowan, tititenai Goa ün paopei tangka nou tuh au shio-e ta yangji! 21Sam chhi nouko ahaoson titso tsünoi, tiautenai amongpem nung Goa khako thakü tsünoi. 22Nungtiphe apim angei ayang ainou mong lüphokle, küta nungti yangtsün thaiutha awankiu ta Apaou tü awan saokü misao lüsao. 23Tititenai ni thatü thsüokü achinek naiuso angei nou kepokkü noin ta ngo epji.”
24Simonüh Peter si Yohan netü ngiom, “Ni chitetsün ngiotsakühlu lüko ngü tü tsüshithawaokü hau Apaou noutü ni jüthaiutha misao asaokiu.”
25Ngüsoüh ngüso mitha kiukü naiuso Apaou ngiongem chimkütün phiai, Peter naiuso Yohan Yirusalemai laokü khu. Ngüso khutsün yamko Samaria nok piakü nai ngüsoüh Ngem Amei nou chim.
Philip Naiuso Ithiopiahai Asong Khaiunia
26 Apaou aünhong tsaküh Philip tü ngiom, “Akhemlo, küta ajepekki nai Yirusalem ainou Gaza ai khutsün yam tü lüsao.” (Lonyi lühom nung yam ta tsükeishiji.) 27Nai apa tsalokü khunai, Ithiopiahai menyiu nokpao tsamai jengtsaiu apem khaiuko asong thetsün nung Ithiopiahai nou ashantsün khaiunia sau asonghoi ongko atengting tsak apa meshen tsamai akhu noiküla. 28Apa Yirusalemai Goa amkhamau khuküta meshen tsamkei ko noikü tsamai laokü shikü noiküla. Apa tsamkei nai noikü khu taoko apaüh E-po Isaia thsam ainou vekü noiküla. 29Asio Onthso nou Philip tü ngiom, “nung tsamkei dongai khuküta apa shimkü lünoi.” 30Philip apa dongai kopkü khunai apaüh E-po Isaia thsam ainou vetsün lula. Nungai Philipüh apa tü sangkü ngiom, “Ni vetsün nung ngelajimo?”
31Asonghai nou thalakü ngiom, “Khaiunia ajantsoüh ngü hau nung sasakü tsüchitekün lektsoto ngo nung titi thekü ngelaau shio-e?” Naiuso apaüh Philip tü tsamkei chiai apa shimkü sungkü amoknoita jon. 32Apaüh vekü noitsün asiongio ahoi nou nung noiküla:
“Aloat au kanlükhuntsün onnemok tsak khekkü apa noiküla,
apon tippan taoko tsüshikü tsamkü noitsün onnemokthso tsak khekkü apaüh meshen sonkou sopkü ngiotsaktso tsüngio.
33Apa lomiamkiu, naiuso ngiotsüo apen nou apa thaiutha tsüchhi.
Sauühlünou apa thsaosithsoso thaiutha tsümonchite-e,
tiautenai apa aakih goumchi ainou athon shi-iu.”
34Nung ashantsün khaiunia nou Philip tü sangkü ngiom, “E-po nou sau thaiutha nung ngioji ngü hau achite? Apa thaiutha süne tsüdekünai khaiunia ajantso thaiutha nung ngioji?” 35Nungai Philipüh nung asiongio ahoi ainou yalokü apa hau Yisu thaiutha Ngem Amei nou chiten. 36Nungti ngüne saokü yamai tsakeikü noinai, ngüne khiam noitsün athang tsakai shisaom, nungai asong khaiunia nou ngiom, 37“nungai khiam intso noin. Ngo khiam limkiutsün ainou akiap noi-emo?”
38Nai asong khaiunia nou tsamkei nou laoau ngiom, naiuso Philip si ashantsün khaiunia ne haiu ai saokü Philipüh apa limkiu. 39Tilai ngüne khiam ainou sung, Apaou Onthso nou Philip kankü khuwan. Nungko ashantsün khaiunia nou Philip tsüepshi, lüko apa meshen yamai amongling nou meankü laokü khu. 40Lüko Philip Azota nai noikü ngesan, loüh apa Kaisarea nai khutsün ko noksong pungkü nai Ngem Amei nou chim.
Currently Selected:
HONGTHONHOI CHHI 8: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
