YOHAN 19

1Nungai Pailatüh Yisu nialükhunkü shiuh-in. 2Süpaihoi nou tsao nou thsa-ekü nokpao kandio tsak shan küta apa khaiu nai kei-i, naiuso anyakhao leng sheitho apa hao tho-in; 3ngüsoüh apa dongai shikü ngiom, “Yihudahai nokpao meikü lünoi!” Naiuso ngüsoüh apa da meshen pha nou la.

4Pailatüh müjam sungkü ngüso tü ngiom, “Ngü apa da ti tsümeikü tsüep ta asamüh ngeao thaiutha ngü apa asam dongai nialoukü sungji.” 5Nungtiphe Yisuüh thsao kandio keikü naiuso anyakhao leng sheitho tholoukü sung. Pailatüh ngüso tü ngiom, “Athaplu! Khaiunia nou nungai noin!”

6Tilai atengting mesonhoi naiuso nokshinghoi nou apa ep, ngüsoüh wekü ngiom, (Apa paiphu nai lülalut!)

Pailatüh ngüso tü ngiom, “Asamüh asam chija apa nialoukü khukü paiphu nai lülalut: tititenai ngü apa da ti aphio tsüep.”

7Yihuda haiüh apa tü thala, “Sam ngiokhem nou apa ekühao noin, tititenai apaüh meshen chija Goa Thso ta ngiom.”

8Nungtiphe tilai Pailatüh nung ngio lula, apa tekkü hatkü noiküla; 9naiuso apaüh nokpao tsamai müjam napkü Yisu tü ngiom, “Ni ti ainou?” Lüko Yisuüh apa hao ti athalatsün tsükiu. 10Nungtiphe Pailatüh apa tü ngiom, “Ni ngü ko tsüchitejiso? Ni sokao ngü da oukong noin, naiuso ni paiphu nai lalutao ngü da oukong noin, ta ni tsüngeso?”

11Yisuüh apa tü thala, “Halai nou ni hao tsükiu tünto, jü thako ni oukong ti tsü taiu-ela, lüko eh sauüh ni hao ngo thumkü kiu, apa angei songtso noin.”

12Nungüh Pailatüh apa sokao yam, lüko Yihuda haiüh wekü ngiom, “Ni nung khaiunia sok nai, ni Kaisar hai tsüde: sauhaiüh meshen chija nokpao iulaji, apaüh Kaisar thako chiteji!”

13Tilai Pailatüh nung ngio lula, apaüh Yisu nialoukü sung, naiuso lungpun nou lahtsün ta jontsün, (lüko Ibri ngio nou “Gabatha” ta thekü tsak ko mikhem kiutsün noikham nai apa noi.) 14Nung Aasantsün Sümai thaiutha akhemloutsünnyi noiküla; nai anyiwem chekü nime baji thatso noiküla. Nai apaüh Yihudahai tü ngiom, “Asam nokpao, athaplu!”

15Nungai ngüsoüh wen, “Apa lüluat! apa lüluat! apa paiphu nai lülalut!”

Pailatüh ngüso tü ngiom, “Ngü asam nokpao paiphu nai lalute süne?” Atengting mesonhoi nou thala, “Kaisar chiai sam nokpao sau tsünoi!”

16Nungtiphi Paiphu nai lalutao thaiutha Pailatüh ngüso hao Yisu thumkü kiuwan.

Yisu Paiphu nai Lalut

(Mat 27:32-44; Mrk 15:21-32; Luk 23:26-43)

Nungtiphe ngüsoüh Yisu da pha nou pu. 17Nai ngüsoüh Yisu nialoukü khukü apaüh meshen Paiphu kankü Ibri ngio nou “Golgotha” khaiuo goh ta jontsün athang tsak ai khu: 18nungko ngüsoüh Apa paiphu nai lalut naiuso apako amao khaiunia nime, uai tsak, tsatai tsak, ta Yisu awem nai thekü lalut. 19Loüh Pailatüh angela ao thsamsat tsak sat, küta nung paiphu chiai leplut. Nai nungko nung satkü noiküla. “NAZARET HAI YISU, YIHUDA HAI NOKPAO.” 20Nungtiphe Yihudahai piakü nou nung asat nou welu, tititenai Yisu paiphu nai laluttsün nok shimkü noiküla: naiuso nung Ibri, Grik naiuso Latin ngio nou satkü noiküla. 21Nungtiphe Yihudahai atengting mesonhoi nou Pailat tü ngiom, “Yihudahai Nokpao, ta lasat! lüko Ngo Yihudahai nokpao ta apaüh ngiom, nungti lüsat.”

22Pailatüh thala, “Ngü ti satiu nung ngü satiu.”

23Nungtiphe süpaihoi nou Yisu paiphu nai lalutküta apa nese püleao janekü ngüso pungkü haoson tsak tsak lou: lo nekhut nou achiotsünthang tsüpokü achi ainou athon saokü alatsün noiküla. 24Nungtiphe ngüso tsaküh tsak tü ngiom, “Samüh nung lachipeko, lüko nung sau ün the-eko, nung thaiutha phung deluko.” “Ngüsoüh jü nese ngüso ongko janelou, naiuso jünekhut thaiutha ngüsoüh phung delu ta Asiongio nou ti ngiom, nung shinapao thaiutha nung sungh.” Nungti süpaihoi nou chhin.

25Lüko Yisu paiphu shimkü apa nyiu naiuso apa nyiu ün nio, Klopa tsamko nou Mari, naiuso Mari Magdalin tsakü noiküla. 26Tilai Yisuüh apa nyiu naiuso apaüh tsüojintsün sahoi shimkü tsakü ep, apaüh meshen nyiu tü ngiom, Nyiuhai, “athso athaplu.”

27Nungai apaüh sahoi tü ngiom, “Anyiu athaplu! nung taoko sahoi nou apa meshen tsamai nialoukü khu.

Yisu Eantsün

(Mat 27:45-56; Mrk 15:33-41; Luk 23:44-49)

28Yisuüh loto chhi apem khemiu ta ngekü, Asiongio shinapao thaiutha, “Ngo leji” ta ngiom.

29Nungko ehejek khiam nou meankü lak tsak noiküla: nungtiphe ngüsoüh ehejek khiam nou lüpoi tsak esop pai nai lolutkü apa son nai chilut kiu. 30Nungti ehejek khiam nou shiukütü Yisuüh ngiom, “Nung khemlou-iu!” nai Apa khaiu ngamkü napkü ean.

Yisu tü Tsoki nai Chi

31Nung sümai thaiutha akhemlutsünnyiphe, Yihuda Anonyi nai e mea nou paiphu nai tsütaiukü hao (tititenai nung Yihuda Anonyi ajekhaiu asong noiküla.) ngüso hok longekkü pem nou kankü khuao thaiutha Yihuda haiüh Pailat tü ngiokhem saolou. 32Nungtiphe süpaihoi nou shikü ayating khaiunia nou naiuso amao sau apa ko paiphu nai lalut ngüso hok nou longek kiu: 33lüko tilai ngüso Yisu dongai shi, ngüsoüh apa eankü ep, nungtiphe ngüsoüh apa hok tsülongek: 34Nungti lüko süpaihoi ongko tsaküh lai nou apa tsoki nai chi, naiuso nungailu she naiuso khiam hongshin. 35Sauüh ep, apaüh mitha kiu, naiuso apaüh mitha kiutsün atsüoting noin: naiuso asamüh lüko monglamao thaiutha, apaüh ti ngiom nung atsüoting naiuso apaüh nung atsüoting ngio chiteji ta ngen. 36“Tititenai apa ou tsaktsüo tsülouthekiu,” ta Asiongio nou ngiotsün shinapao thaiutha nung chhin. 37Naiuso loüh Asiongio ajantso ko ngiom, “Sau da ngüsoüh lai nou chi, ngüsoüh apa eppe.”

Yisu Mea Khanji

(Mat 27:57-61; Mrk 15:42-47; Luk 23:50-56)

38Nung phiai Yosep sau Arimathia noksong ainou noiküla, apaüh Pailat tü Yisu mea loao sang, (Yosep nung Yisu sahoi tsak noiküla, apa Yihudahoi nokpao nokshing lun hat nou asu ai sanglu.) Pailatüh loao shio-e ta ngioküta Yosep khukü Yisu mea lokloukü khu. 39Nikodima sau ayanai Yisu dongai asu shiküla, apaüh lüko anganyam nyamtsün thangkoinek naiuso anganyam pai lao-etsün tsoi aupungo thatso kankü shin. 40Nungtiphe ngüsoüh Yisu pem nou loukü Yihudahai khantsün saili, angannyamtsün jengtsaiu nouko nung ne ashethop nai tsan. 41Apa paiphu nai laluttsün athang tsakko aimong tsak noiküla; naiuso nung aimong nai loüh khaiunia laitsüo tsütaiutingkü etam ayan tsak noiküla. 42Nung Yihudahai sümai thaiutha akhemlou ajekhaiuphe, naiuso nungko etam shimkü noiphe, ngüsoüh Yisu nungai taiukiu.

Currently Selected:

YOHAN 19: KHIABSI

Highlight

Copy