T. LŪKÖS 11

Haköptö ngam Vinë-ekūötēv ang Yāsū

(Mt 6.9-13; 7.7-11)

1Ngaich hē Ò nö ve-ekūötēv, nö hĕngkang chūök; keuheūthëṙen Anga-aṅ, hĕng taka ök mahaköp tö ngö ṙô tö Ò, Mā; haköpten ih Man tö vine-ekūötēv, sā Yôhan inrē nö haköptö yik mahaköp nö in ò. 2Ngaich ngö ṙô Anga-aṅ tö cha, Ngö ṙô yin yĕi ve-ekūötēv, Kayöngö aṅ el halīöngö; töhet an yēk ngam Minënyö Meh: yih an yēḵ ngam pūlngö Meh; sā ngam lōn Meh nö ngaich nö el halīöngö, ngati hökngen e yēḵ ing panam inrē. 3Kē-ĕti tö taheui, nup tö örheūheu nya-aṅkūö ih. 4Aṙē-ĕl tökööl ih, sā ih īhö inrē aṙē-ĕl yip töhötehevö nö in ih. Uh öi kētu im kinlaha: ṙānyen ih pöri ṙā-ang im tötlöök.

5Ngaich ngö ṙô Anga-aṅ tö cha, Achīö ap öre töhĕng tak hol tö yīö, ngaich yihtöre nö in ò tö chūöl hatööm, nö ngö ṙô tö ò, Hol chu, lūöi hata man haṙūönghökūö chu tö ròtī. 6Tön yamihiv chin töholre, mi-ip kinröönngöre: ngaich öich öt huveū-en meukṙen ò. 7Ngaich löknyö lātuhēt ṙô anga-aṅ, nö sapṙô ò, nö ngö ṙô, Uh chin asānkaṙen, löphakkūö an ngam inkūp; holtuṙah chin inrē tö vē nyīö, öich el chamamre. Öt kô chin choholre, öich kē-ĕkūö Meh. 8Ngö ṙô Chin tö yīö, pòrô anga-aṅ nö ötkô nö choholre nö kē-ĕkūö ò, pò ò nö hol ò; ngaich pò ò nöng iṙuhöṙô nö have-a, ngaich choholre anga-aṅ, nö kē-ĕkūö ò, sā tūmö lōn ò. 9Ngö ṙô Chin inrē tö yīö, Havë-a, ngaich kē-ĕvkūö min yī-ö; lūka, ngaich teūngen min yī-ö; kuröngkökūö inkūp, ngaich löpnyukūö min yī-ö. 10Pò ngòh mahavë-a nö teūngen; ngòh lamūka inrē, nö kôtökūö: ngòh kumröngkökūö inkūp inrē, nö löpnyukūö. 11Achiāp öre tö yīö yī-ö inyöngö, öp tö havëkakūö tö kūönre tö ròtī, ngaich kē-ĕkūö ò tö ihong? 12Hēk yĕn havëkö kāḵ, ngaich anga-aṅ nö kē-ĕkūö ò tö pēch nö ṙënngen ngam kāḵ? Hēk yē ò nö havëkö uhöö, kô-òren ang nö kē-ĕkūö ò tö tökanaptöritre? 13Yē yīö yī-ö yih, tö-ötlanöökuvö, öi akahalōn tö tölöök kahëtöre i më kūön yīö; i ṙôkhöltī ang öre ngam aṅ el halīöngö Yöng yīö, nö kētö ngam Töhet Fanöinylö nö i yip mahavë-a nö in Ò.

Yēsū Tö Pē-elsipul

(Mt 12.22-30; Mk 3.20-27)

14Ngaich ahōngö sī-ö Anga-aṅ nö ik tötkô nö ṙô-òv. Ngaich chuhhë ngam sī-ö, ngaich ngam tarik tötkô nö ṙô-òvö, nö kahôka, Ngaich më tömaṙôngö nö pingangkūö. 15Rēvre pöri yik aṅ in cha, tö ngö ṙô, Pĕ-elsipūl an ngam mākūö vē sī ö, aṅtī Ò nö ahōngö sī-ö. 16Ngaich tahëng yik kamlahan, ve-ekūö Ò tö min kahngö aṅ el halīöngö. 17Akahalōn pöri Anga-aṅ tö ellōn cha, ngaich ngö ṙô tö cha. Ötkôlò nun në pūlngö tö tīre, yē u nö surīkhen höö. 18Yē ngòh Sātān nöng surīkhöre, sitih höng nganöhö öng ngam pūlngö ò. Pò yīö ṙô-òv tö Chu, Öich lökten Pĕ-elsipūl tī ahōngö sī-ö. 19Yē Chu, lökten Pĕ-elsipūl tī Öich ahōngö sī-ö; lökten in chīö tī yip kūön yīö nö ahōngen cha? Lökten yip min nö kamhôkken yīö. 20Yē Chu pöri aṅtī tö kuntī ngam Tēv Öich ahōngö sī-ö; ngaich ngam pūlngö ngam Tēv nö yih nö in yīö. 21Yē ap tökalēḵ tarik nö aṅhaṅv eltī nö aṅtö patīre, ngaich kuchīken minë inlānen ò. 22Yihtöre pöri ap tökalēḵ tö ò, nö in ò, ngaich mihôiṅ tö ò, kē-ĕyö ngaich nö ṙòkhöre nup aṅtī ò, nup chūök ò nö hayönglenre; katölhukūö cha-a ngaich tö nup chehen tö ò. 23Ngòh töt mi-in Chu, tö sumrīk tö Chu; ngòh tötmahamūltöre nö in Chu, töng parāta.

Invānö Ngam Tötlöök Sī-ö

(Mt 12.43-45)

24Yē ngam tötlöök sī-ö nö kunyī-inyre nö ṙā-ang i tarik, ngaich lök ël ap chūök tötmākuvö, chöh chūökre nö heūheure. Ngaich öt kanôtukūö, ngaich ngö ṙô; Hòṅ havantöre chin ip patīre ṙahāngö chu. 25Chalôhë anga-aṅ, ngaich kôtökūö tö e, nö fôhòh hanyötö inrē. 26Ngaich kiröönngöre anga-aṅ, sat tak kahëḵ tö tahëng holre tö yip tömööḵlö ötlanöökö sī-ö tö ò; kuhēthötre cha-a ngaich nö iyöng in e. Ngaich ngam manā-aṅ inlahen ngam tarik, nö mööḵngöre ötkanôlò tö ngam mu-urĕh.

Tökò-en Ṙanāmölōn (Inkòlò)

27Ngaich hē ṙô Ò tö u, hĕng tak ök kikānö aṅ i yik tömaṙôngö, hamūḵa nö ngö ṙô tö Ò, Tökôlò ap chūökkanūönö, ap chūök Meh; nup pahōḵ Meh inrē teh. 28Ngö ṙô pöri Anga-aṅ, Hôṅ kô; tökôlò yin vē hamang ṙô ngam Tēv, ngaich haköpö e.

Lōn Tö Minkahngö

(Mt 12.38-42)

29Ngaich hē yik tömaṙôngö nö hamūlöre nö in Ò, ngaich rĕhnyôre Anga-aṅ nö ngö ṙô, Tötlöök ön ngih tūmö; chöh minkahngö ön; öt kē-ĕvkūö pöri angū-ö min tö minkahngö Yôna. 30Pòn sā Yôna nö ngaich nö minkahngö, nö i yik aṅ Ninēvē, ngatī min inrē ngòh Kūön Tarik nö i ngih tūmö. 31Ngam rānī aṅ lā lòhngö choholre min, nö im kinṙôka, nö hol vē tarik ngih tūmö, ngaich öthakôlò cha min; pò ò nö yihtöre nö ṙā-ang ip manā-ang kūö ngih panam, nö hang mikah Sòlòmön; yĕh meuk, ngòh ihih tömööḵlö ṙôkö tö Sòlòmön. 32Sök löre min yip tarik aṅ Ninēvē nö hol ngih tūmö, ngaich öthakôlò e min; pò cha nö havöötö ellōnre nö i ṙô Yôna nö mumkahten; yĕh meuk, ngòh ihih tömööḵlö ṙôkö tö Yôna.

Ëāṅvö Ngam Alaha

(Mt 5.15; 6.22-33)

33Öt tarīkuvö tamôttökūö eāṅvö, ngaich ṙātö e nö i chūökre nö öt maneūken, ötrēhĕn nö elkatòh kuvôkö; i kui ngam tösökhak pöri, hòṅ vē kumhēthötre nö meuk ngam hanātö. 34Ngam mat meh an eāṅvö ngam alaha meh. Yē ngam mat meh nö hēngö maheuṅk, ngaich ṙòkhöre ngam alaha meh nö hat. Yē e pöri nö ötkôlò, ngaich ṙòkhöre ngam alaha meh nö sangūla. 35Ngëicha man lökten, yē ngam hanātö in meh nö öt sinngūlö, 36Lökten yē ngam alaha meh nö ṙòkhöre nö hat, nö öt sinngūluvö, ṙòkhöre min angū-ö nö hat; sā kūö ngam töhūkūö eāṅvö nö kētö hanātö mat meh.

Ötlēka El Nang Yik Feresī Tö Yik Mahaköptö Minë Chöngö Ang Yēsū

(Mt 23.1-36; Mk 12.38-40)

37Hē Ò na ṙòngmö ṙô-òvö, hĕng taka ök Feresī mahavëken Ò nö nyā nö holkūö ò. Kuhēthötre Anga-aṅ ngaich, ngaich ūichngöre nö nyā. 38Höng meuktöre ngam Feresī tö e, uṙeh anga-aṅ ngaich tö Ò, nö öt urĕh nö söichlöre, urēhĕkūö ngam nyina-aṅ. 39Ngaich ngö ṙô ngam Mā tö ò, Yi-ö Feresī ma-ahet lö uk chūökkūö amòk, ane inrē pingāṅl; tööḵlö pöri ap lamātuhēt yīö, tö kinīlö ane inrē ötlanöökö. 40Yī-ö tötakaha, röh ang ngam vamī ngam lā-uk nö vī ngam lā ël inrē? 41Kētö nup lamā tuhēt pöri nö inlōnti; yĕh meuk ṙòkhöre nun në chehen nö het nö in yīö.

42Tötkôlò yin yī-ö Feresī, pò yīö hĕnghata i nup tö söm tötahūsa, tö angu-övö inrē, nup töṙōlkangen rōichōn inrē; ngaich yī-ö chööḵngö kui tötmichūṙen kinṙôka, ane inrē hanāngenlōn ngam Tēv. Anū-ö pöri öre la-en yīö; un ṙā-ai minë tahëng. 43Tötkôlò yin yī-ö Feresī, pò yīö hāngenlōn hòṅ ël nup lamākūö anūchö el chūök vine-eṅkūötēv, ane inrē tö hòṅ salāmö el talöökö. 44Tötkôlò yin yī-ö, pò yīö sā nup kuikupah nup tötmeūkö, ngaich vē tarik lamök kui u, nö öt akahalōn.

45Ngaich hĕng taka ök mi-i yik mahaköptö chöngö samap ṙô Ò, nö ngö ṙô, Mahaköpti; sumrōngökūö ih Man inrē īhö, in e angū-ö ṙô Meh. 46Ngaich ngö ṙô Ò, Tötkôlò yin yī-ö inrē, mahaköptö chöngö; pò yīö tötkaneūnen; ngaich yi-ö ötrēhĕn lūölkö u, öi hĕng nòng kuntī. 47Tötkôlò yin yī-ö; pò yī-ö vī-il nup kui yik pròfĕt yik fahëlngö yik yöng yīö. 48Lökten yin yī-ö mameuk ane inrē hamôḵòṅ nuk la-en yik yöng yīö; pò cha cha-a nö fëlngen cha, ngaich yī-ö vī-il nup kui cha. 49Lökten inrē nö ngö ṙô ngam mikah ngam Tēv, Tīntö pròfĕt Chin min in cha, ane inrē tanīnöṙô; ngaich rēvre yip töfëli min tö cha ane inrē töthakôlöngṙô. 50Hòṅ nup mahām yip taṙòkhöre pròfĕt nuk tö kitaktu i ranehlö ngih panam, nö havëka nö i ngih tūmö. 51Ranehten tök mahām Apĕl, söl ik mahām Sakariā, ök tö kapah nö i hôi ök chūök tökētuvö tö ngam patī ngam Tēv. Tökô-ò ṙô Chin tö yīö, I ngih ap min tūmö nö havëka.

52Tötkôlò yin yī-ö, mahaköptö chöngö, pò yīö kēḵngö ngam tinkīök ap mikah, ngaich rö-ö yī-ö kuhēthötre, ngaich yip tö hòṅ kuhēthötre nö asānkaṙen tö yīö.

53Kunyī-inyre ngaich Anga-aṅ nö ṙā-ang in e, ngaich yik kamūich, yik Feresī inrē, nö kalēḵĕṙô nö hōten Ò, nö harunnyö ṙô Ò nö hēk nö pōyen ṙô; 54Pò cha nö hòṅ löknyuṙô; hayūnan cha-a inrē, pòn hòṅ kēḵ nup ṙô lamöknyö elvāng Ò.

Currently Selected:

T. LŪKÖS 11: CANIBSI

Highlight

Copy