T. LŪKÖS 12
12
Ṙô-ò Nö In Yip Mahanyatkö Elmat
(Mt 10.26-27)
1Hē e yik tö ṙōl köṅny tömaṙôngö nö hamūlöre nö pōyen, tön uroh nöng kö rööntökui höö, rĕhnyôre Anga-aṅ tö yik mahaköp nö ngö ṙô, Urĕh yin haṙēmngenre tö nup tö-aföhlöng ròtī i yip Feresī, ngam innyatkö-elmat. 2Rö-ö pöri nö tö hanyāti, öp töthameuktu min; ane inrē öt töhayunngörevö, öp töt ankahen min. 3Lökten yē nup yô-òv ṙô yīö el sinngūlö, hāngö anū-ö min nö el ngāṙö; ane inrē nup ṙô yīö el nang höö öi el urôhò, ngaich ahangka min nö i kui patī.
Achiö Ap Pinhe-eṅkūö
(Mt 10.28-31)
4Ngö ṙô Chin tö yīö, yī-ö hol chu, Uh yin pa-ekūö tö cha yip famëlngö ngam alaha, yip tötkô nö kanô-òṅvö tö kinheūṅtö tīre. 5Ve-eny nang yīö pöri Chu-ö, tö ngam pinhe-eṅkūö yīö, pa-ekūö yin tö Ò, ngam tömihôiṅ nö kavalhötnen yīö el chūök ötinkôlò; yĕn pòrô nö keuheūtötī nö fël. Hôṅ, pa-ekūö yin tö Ò, ngö ṙô Chin tö yīö. 6Röh nup nö taneui nòng röchö nö nët höt tak tö kun pësa? Ngaich öt hĕng hang nòng tö vāchiyö nö i kūö ngam Tēv. 7Kaheūki nun minë keūyö nö ṙòkhöre. Uh yin pa-ekūö; mööklö ṙôken ṙāi yin tö töṙōl nòng röchö.
Ameū-a Hēk Mamahngen Kristū
(Mt 10.32-33; 12.32; 10.19-20)
8Ngö ṙô Chin inrē tö yīö, i tumtaka vē vamënyen Chu nö i kūö tarik, cha-a min tövënyu tö ngòh Kūön Tarik, nö i kūö yip ma-ahānga kūön ngam Tēv. 9Vē mamahngen Chu nö i kūö tarik, cha-a min tömahayö tö Chu nö i kūö yip ma-ahānga kūön ngam Tēv. 10Ngòh töchōchö ṙô min nö i ngòh Kūön Tarik, aṙēlöng min anga-aṅ tö e; ngòh töt lamëḵkôre nö im Töhet Fanöinylö öt aṙēlöng min anga-aṅ tö e. 11Yē cha nö kēten yīö i kūö chūök vine-eṅkūö ngam Tēv, yip mā ane inrē kamhôṅka; ui röingölōn töṙôre sap ṙô cha min, tö töng ṙô yīö inrē. 12Pò ngam Töhet Fanöinylö min nö haköpten yīö tö nup ṙahônyö yīö ip hē e.
Inchōḵoṙô Im Tökòlò Töt Akāha
13Hĕng taka ök aṅ i yik tömaṙôngö, töngö ṙô tö Ò, Mahaköphöti; tölṙô ap mëm chu Man, nö katölhökūö ai tö nup amin ai, 14Ngö ṙô pöri Anga-aṅ tö ò, Achīö ap vamīlen Chu kamhôṅka ane inrē kamtölhökūö yīö? 15Ngaich ngö ṙô Anga-aṅ tö cha, Haṙēmngenre yin, kē-ĕngre ui im yinikhanga; pò ngih nômö ngòh tarik nö öt i ṙôken nup chehen mi-in ò.
16Ngaich hĕng ök inchōḵoṙô Ò nö in cha, nö ngö ṙô Öp tumlat öp töhĕng tak tökôlò tarik nö pōyen aṅ kūö. 17Ngaich anga-aṅ nö chöh ellōnre nö ngö ṙô, Sitih öich min? pò chu yih öt chūöku tī öich hachūökngö në ṙòng? 18Ngaich ngö ṙô anga-aṅ, Ngih ön min tī chu; tiṙōlngö minë chūök u chin min; ngaich vīlö töpōyö, in e tī ngaich öich hachūöklö minë sāiny, minë chehen inrē. 19Ngaich ngö ṙô chu-ö min tö ngih nômöre, pōyen chehen man, tö töṙōl samyeūheu nyā-aṅkūö, òk, haṙamlōnre. 20Ngö ṙô pöri ngam Tēv tö ò. Me-eṅ tötakaha, i ngih hatööm ap nômö meh min nö kē-ĕyö, nö ṙā-ang in meh. Chehen chīö ön min minë halēnken meh?
21Ngati panchö ngòh mahamūl kanôlòre; ngaich nö ötkôlò nö i ngam Tēv.
Hayönglen Re Im Tēv
22Ngaich ngö ṙô Anga-aṅ tö yik mahaköp, Lökten Chin ngö ṙô tö yīö, Uh yin paṙūtalōn im nômö yīö, tö nup nya-aṅkūö yīö min; ui rēhĕn paṙūtalōn im alaha, tö hilā yīö min. 23Tön mööḵlö an ngam nômö tö ngam nya-aṅkūö; ngati ngam alaha tö ngam hilā. 24Yē ngëiṅchkö në chehechōn, töttameūich, ötrēhĕn nö hamūl; në töt urôhòv chūök nya-aṅkūö, ötrēhĕn nö chūöku tī tö patī; ngam Tēv pöri maha-aṅhaṅl u. Mööḵlö yin yī-ö tö në chehechōn. 25Achīö ap öre tö paṙūtalōn tö yīö, öp tö kô-òren nö ṙūölö rôta nômöre? 26Yē yīö öi ötkô rēhĕn vī tö kūöṅnen, pòyòh öi paṙūtalōn tö nup tahëng? 27Yĕh ngëichkö minë pūl, sitih sanīöpö ön; öt maharëtnyö elmatre nun, ötrēhĕn nö kupāt. Ngö ṙô Chin tö yīö, pòrô Sòlòmön nö i nup kanôlòre, ötrēhĕn nö ngati hinlāṙö nö sā u. 28Yē ngam Tēv pöri nö ngatī hilātī tö minë chōn, në töng tötaheui, ngaich huṙöichlöre, kavalhötvö anū-ö ngaich, nö i rit tanīöyö i ṙôkhöl tī Ang min tö hilā yīö, Ō yī-ö tö kūöṅnen mikah?
29Ui afēken nya-aṅkūöre, ui afēken òkre inrē, ui rēhĕn katöngalōn. 30Pò në taṙòkhöre chehen nö tö chöhö, tö vē taṙòkhöre tarik nö ing panam. Akahalōn pöri ngam Yöng yīö, tö yīö hòṅ chehevṙen tö në. 31Chöh ngam pūlngö Ò pöri yī-ö urĕh; ngaich ṙūöhtuṙen min në chehen, nö in yīö.
Kanòlò El Halīöngö
(Mt 6.19-21)
32Ui pa-ekūö, tökūöṅnen pököre; tön tölöök an nö lōn ngam Yöng yīö nö kē-ĕkūö yīö tö ngam pūlngö. 33Havahngö nup chehenre yin, ngaich alōnhöti; ngaich meukṙenre tö chūök rupīöre tö ap töthōḵ nö hōteh nö chehen, tötkinheūṅtuvö, aṅ el halīöngö, i chūök mu-ulāyö nö öt haröhtöre, ötrēhĕn maneui nö kat. 34Pòn yē chūök nup chehen yīö in e min ngam ellōn yīö inrē
Amāhati Kūön Alaha
35Hökngenre yin inmöptöheichṙat, nup ëāṅvö yīö inrē nöng hūkūö. 36Yī-ö inrē sā tarik hamöngkökūö yöngre, yē ò min nö havantöre nö ṙā-ang im inlānen inpihö, hòṅ ò yĕn yih ngaich kuröngkökūö inkūp, ilööṙen cha-a ngaich nö löpnyökūö ò. 37Tökôlò yip cha-a kūön, yip kanôtökūö ngam yöng nöng aṅhati. Tökô-ò ṙô Chin tö yīö, tö ò min nö halēnṙenre, ngaich ha-ūichngen cha nö nyā; ngaich yihtöre anga-aṅ nö meukṙen cha. 38Ngaich yē ò min nö yih im innët heuh inahaṅti, im linūöyö inrē; ngaich nöng kôtökūö tö cha nö ngatī, tökôlò yip cha-a kūön. 39Akahalōn pöri yī-ö tö ngih, yē ngam töpatī-ivö nö akahalōn tö ṙētak yanīhih ngam mu-ulāiya; ngaich aṅhati anga-aṅ, öt hökngen ngam patīre nö filāliyö. 40Lēntöheichṙen yī-ö inrē, tön hĕng heuh yin min öt lōnuvö tö yanīhih ngòh Kūön Tarik
Tö Akāha Hēk Töt Akāha Mahalanṙen
(Mt 24.45-51)
41Ngaich ngö ṙô Pītör, Mā; inchōḵoṙô Meh ön ngih nö in ih? i taṙòkhöre ṙöng?
42Ngaich ngö ṙô ngam Mā, Achīö ap rih, öp tökô-en tö-akaha inrē yōm chehen, öp töhamālöng tö ngam mā nö i patī ò, nö kameḵeṅkūö cha tö nya-aṅkūö ip hē nyina-aṅ? 43Tökôlò ön anga-aṅ kūön, ngam kanôtökūö ngam mā nö ngatī, yē ò nö yih min. 44Tökô-ò ṙô Chin tö yīö, tö ò min nö hamālen ò nö i nup taṙòkhöre chehen ò. 45Yē ngam kūön pöri min nö ngö lōn, nö ellōnre, Ha-āṅtö yanihihre ap yöng chu; ngaich anga-aṅ nö fël yip mahalanṙen kikōnyö, kikānö inrē; ngaich nya-aṅvkūö, ka-eūt, ngaich hiyōi; 46Hĕng sumkam yanihih min ngam mā, ip hē ò nö öt meūkken ò; ane inrē hĕng heuh öp ṙētak ò min, hē ò nö öt akahalōn. Ngaich fëli min anga-aṅ, ngaich hamūltuvö nö i yip tötakaha.
47Ngaich ngòh kūön, ngòh tö-akahalōn tö lōn ap yöngre, ngan rö-ö nö halēna, ötrēhĕn nö la-evṙen nö sā lōn ò, anga-aṅ min tö ṙōlhöt finôhò. 48Ngòh tötakahalōn pöri, ngaich la-evṙen tö nup löktö finôhòre; ngaich anga-aṅ nö öt ṙōlhöt finôhò. Ngòh töpōyen kine-eṅkūö, anga-aṅ min töpōyen invëkakūö. Ngòh kahe-ekūö cha, tö töpōyen, in ò min cha-a nö pōyen havëkö.
Lāinyngen Inrēvngö Ang Yēsū
(Mt 10.34-36)
49Yamih Chin Öich kavaltö tameūyö i kui ngih panam; sitih Öich min, yē e nö ha-ehangen nö ökngö? 50Vinôku pöri Chu-ö töp vinôköre; sitih kanihngen Öich hanöng saha kinheūṅten e? 51Yamih Öich tö lōn yīö, Öich kētö ap kumchikṙen ing panam? Ve-enynang yīö Chin, Rö-övö; inrēvngöre pöri. 52Pòn taneui taka min yip me-el tö hĕng patī nö harēvngöre; lūöi taka lā-al nap tö në taka, ane inrē nët taka lā-al yip tölūöi taka. 53Cha-a min maharēvngöre tö, ngam inyöngö lā-al ngam kūön, ane inrē ngam kūön lā-al ngam yöng; ngam yöng kikānö lā-al ngam kūön kikānö, ane inrē ngam kūön kikānö lā-al ngam yöng kikānö; ngam yöngpihö lā-al ngam kankūön, ane inrē ngam kankūön lā-al ngam yöng pihö.
Akaha El Mat Tö Ngam Ṙētak
(Mt 16.2-3)
54Ngaich ngö ṙô Anga-aṅ tö yik tömaṙôngö, Yē yīö meuk taṙul lamöklö lā sūng, ilööṙen yī-ö ngö ṙô, Kumṙah ön min; ngaich ngatī angū-ö. 55Yē yīö meuk kuföt lamöktö lā lòhngö, ngaich ngö ṙô yī-ö, Tölngö ṙanāchö öp min; ngaich ngatī angū-ö. 56Yī-ö mahanyatkö-elmat, huveū-eu ṙô yin ve-eny inlahen ngih tumlat, ngam halīöngö inrē; sitih ṙô öi pökeh öt huveū-eu ṙô öi ve-eny inlahen ngih ṙētak?
Halāmö Höö Nan Tö Ngam Hol Meh
(Mt 5.25-26)
57Pòyòh öi yī-ö kahngenre kahòkken ngam töhuveū-en? 58Yē meh kiröönngöre holtö ngam tökunyahaṅelmat töre i kūö ngam kamhôṅka; kalah me-eṅ el talöökö öm halāman. Yĕn öt ngatī, tūöktu min me-eṅ, i kūö ngam kamhôṅka; ngaich kē-ĕyö tö ò im mameukken; ngaich chaphötvö min me-eṅ el kinlōngö. 59Ngö ṙô Chin tö meh, öt kanôḵòṅvö man min kunyi-inyre, hanöngsaha kinëḵtö öp manā-aṅ pësa.
Currently Selected:
T. LŪKÖS 12: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
