T. LŪKÖS 13
13
Havöötö Ellōnre Hòiṅ Öt Kapah
1Rēvre yik mu-umuh hē e vame-enynang Ò tö yik aṅ Këlelī, tö katĕhtu mahām tö Pailĕt, nö i nuk kahëtö cha. 2Ngaich ngö ṙô Anga-aṅ nö sapṙô cha, Tömööḵlö kanöölö fālen aich cha-a, tö cha nö aṅ Këlelī, nö ṙòkhöre tö lōn yīö; pò cha nö ngatī ötkanôlò? 3Ve-enynang yīö Chin, Rö-övö; yē yīö öt havöötö ellōnre, ngati ötkanôlò yin min yī-ö. 4Hēk yik tö hëvhöre sīön taka töfukkui tök kaha Sīlōm, ngaich kapahakūö tö cha; kūöre aich cha-a nö tömööḵlö höteh tö yip taṙòkhöre tarik mi-iyöng Yerūsalem, tölōn yīö? 5Ve-enynang yīö Chin, Rö-övö, yē yīö öt havöötö ellōnre, ngatī ötkanôlò yin min yī-ö.
Inchōḵoṙô Im Tötṙôngu Anychīr Chōn
6Ngaich ngih ṙô Ò inchōḵoṙô, Hĕng taka ök tarik töchōnuvö tö anychīr ök töteūchtuvö nö el ök panô-òṅ angkūr. Yihtöre Anga-aṅ ngaich nö chöhkö ṙòng ò, ngaich öt maheūṅku. 7Ngaich ngö ṙô Ò tö ngam yōm panô-òṅ, Yĕh meuk; lūöi samyeūheu chin ngaich yihtöre chöhkö ṙòng ngòh anychīr; ngaich öt maheūṅku. Kūölten ò man; kūöyòh ang inrē nö yëḵngen kūö töng tumlat? 8Ngaich anga-aṅ nö sapṙô ò, nö ngö ṙô, Mā; hökngen ò man yĕh i ngih samyeūheu inrē; hanöng saha tī chu ul rööntö ò, öich tūitö sôḵ nuā inrē. 9Yē ò nö ṙônguvö min; ngaich yĕn rö-övö, ngaich kūölten ò me-eṅ.
Halanken Ök Tösinguṅt Kikānö El Töhet Sakāmö Ang Yēsū
10Ngaich Anga-aṅ nö mumkahten nö el ök chūök vine-eṅkūötēv, hē ngam töhet sakāmö. 11Ngaich hĕng taka ök kikānö, ök tötkalēḵ alaha, töhëvhöre sīön samyeūheu, tökeuheūtngöre ök nöng singut, öt kanô-òṅvö anga-aṅ nö kahngenre nö hachiplöre. 12Höng meuktöre Yēsū tö ò, ve-ekūö ò ngaich Anga-aṅ; nö ngö ṙô tö ò, Me-eṅ kikānö, ṙānyu man ngaich, im ötkumlēḵ. 13Ṙātö eltīre Anga-aṅ ngaich nö in ò; ilööṙen anga-aṅ ngaich nö chiplöre; ngaich ha-öiny ngam Tēv.
14Ngaich ök mākūö ngam chūök vine-ekūötēv, nö līn pò Yēsū nö halanken tövahavö hē el töhet sakāmö, ngö ṙô an nö i yik tömaṙôngö, Tafūöl sumkam nup hē tarik nö la-evṙen, hē u yin yĕh lökten halankaṙen invah; rö-övö pöri nö hē el ngih töhet sakāmö.
15Ngö ṙô pöri ngam Mā nö sapṙô ò, Yī-ö mahanyatkö-elmat, röh öi yī-ö luhlö nuā ane inrē köttö hē el töhet sakāmö, öi ṙā-ang im chūök u, ngaich hachōḵngö u ip chūök u nö òk mak? 16Sōtu ang ngòh kikānö ngòh kūön Aprahām, ngòh tönyëki tö ngam Sātān nö hëvhörsīön samyeūheu, nö luhnyuvö hē el töhet sakāmö? 17Ngaich hē Ò nö ngatī ṙô tö u, ṙòkhöre yik tökunyahaṅelmat tö Ò nö sumrōngikūö; ṙòkhöre pöri yik tömaṙôngö nö ṙāmölōn, töpòkūö nup taṙòkhöre tökôlò tī Ò.
Inchōḵoṙô Im Kun Kulöl
(Mt 13.31-32; Mk 4.30-32)
18Lökten Ò nö ngö ṙô, Sā yòh öng ngih pūlngö ngam Tēv; Sitih tī Öich min asātö e? 19Sā nup kun kulöl an tö kē-ĕ tö tarik, tūyih ngaich nö el panô-òṅ, sīöp ngaich, ngaich tökiröng nö chōn, iyöngö pak ngaich tö chehechōn.
Inchōḵoṙô Im Tö Afölöngö Ròtī
(Mt 13.33)
20Hēk Anga-aṅ nö ngö ṙô, Sitih tī Öich min asātö ngam pūlngö ngam Tēv? 21Sā tö-aföhlöng an ròtī, öp tö kē-ĕ tö kikānö, ngaich hayūniyö nö lūöi hang nyanum, hanöng saha e nö ṙòkhöre nö föhlö
Ngam Töcheūkti Kūö Inkūp
(Mt 2.13-14,21-23)
22Kiröönngöre Anga-aṅ ngaich lök i nup panam, tuhēt inrē, mumkahten; nöng kiröönngöre nö chuh Yerūsalem. 23Ngaich hĕng taka ök tö ngö ṙô tö Ò, Mā; höng harohtumtaka yip kan töhayöökaṙen? 24Ngaich ngö ṙô Anga-aṅ tö cha, Kalah yin kuhēthötre, lökhöt im töcheūkti inkūp. Ngö ṙô Chin tö yīö, maṙôngö yip min chamöh talöököre, nö kuhēthötre nö in e; ngaich rö-ö min nö kô. 25Yĕn hĕng heuh ngam töpatī-ivö nö choholre, nö löptökūö ngam inkūp; ngaich yī-ö sökhaka elkahôiṙen öi kuröngkö uk ngam inkūp, öi ngö ṙô, Mā; löpnyökūö ih. Ngaich ngö ṙô min Anga-aṅ nö sapṙô yīö, Öt akahakūö Chin töp ṙahāngö yīö. 26Ngaich yī-ö hēk ngö ṙô min, Nya-aṅvkūö in misī, ane inrē òk, i kūö Meh. Ngaich Me-eṅ inrē misī mumkahten el talöökö ih. 27Ngaich ngö ṙô Anga-aṅ min, ve-enynang yīö Chin, öt akahakūö Chin töp ṙahāngö yīö kiröönngöre yin ṙāngen chu yī-ö taṙòkhöre töla-evṙen tö tökööl. 28Ngaich min öp pineūinyö ane inrē kinapkui kanap, yē yīö meūkö Aprahām, Isak, ane inrē Yāköp, ṙòkhöre yip pròfĕt inrē, nö im pūlngö ngam Tēv; ngaich yī-ö kavāliyö elkahôiṙen. 29Ngaich cha-a min nö yihtöre nö löktö lā chuhöt, ane inrē lā sūng, löktö lā kapā, ane inrē lā lòhngö; ngaich ūichngöre min nö im pūlngö ngam Tēv. 30Ngaich, yĕh meuk, yip mu-unôich min nö urĕh; ane inrē yip mu-urĕh min nö unôich.
Hāngenlōn Yēsū Tö Yeruselem
(Mt 23.37-39)
31Hē e nö yihtöre yik Feresī, nö ngö ṙô tö Ò, Kē-ĕngre Man; ṙuhöngre, tön hòṅ fëlngen Meh ap Hērôt. 32Ngaich ngö ṙô Ang-aṅ tö cha; Kuṙòh; ngö ṙô yin tö ngam am aṅ el-inchōn. Yĕh meuk, ahōng sī-ö Chin, ane inrē halanken invah tötaheui, huṙöich inrē im linūöi sumkam Chu-ö min teungten. 33Kiröönngöre pöri Chu-ö tötaheui, öich kū-ötö kū-öre; huṙöich inrē, ip tamömrit u inrē; pòn öt kô nö hĕng tak pròfĕt, nö öt i Yerūsalem ötinkôlò.
34Ō Yerūsalem, Yerūsalem, famëlngö yik pròfĕt, kumlehe cha yip tötīnyö nö in ò! Ām heuh Öich min hamūl më kūön meh, Öich höng sā yönghayöm nö hamūl kūönre nö elkëlre, ngaich yī-ö sōḵ. 35Yĕh meuk, ṙā-ayö an ngam patī, nöng ötkôlò. Ngö ṙô Chin tö yīö, Öt meūkö Chu yin min hanöng saha ṙô yīö, öi ngö ṙô, Tökôlò Anga-aṅ yamih nö i Mine-eny ngam Mā Tēv.
Currently Selected:
T. LŪKÖS 13: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
