NASEPTE 2
2
Thagau Thiangtho Hung Tunna
1 #
Thp 23.15-21; Dan 16.9-11 Pentikost ni a hung tun phatin, amau chu a leng un mun khat in a la um khawm un.
2Thakhat in van ah kipat hui hât tak gi tawhbang a hung tung ah, zia chun a kichutna Insung uh chu a lua dim ta’n.
3Meikuang gual ah kilang lei a hung um ah, a hung kihawmjak ah, amau haw a chang chiat tau a.
4A leng un Thagau Thiangtho in a hung dim tau a, Thagau in a pausak dungzui in pau dangte’n a hung pau tau ahi.
5Van nuai nam tin lak ah kipat Juda mi Pathian ho-te chu Jerusalem in a um un.
6Zia husa ziak ah chun mipi a hung khawm tau ah, a thugen uh chu mitin chun amau pau chiat ah a het ziak un, a lungkham ma ma tau a.
7Mak leh lungkham um a sak ziak un, “Zia thugente zosia hi Galili mi hilo a hiu em?
8Aleh, bangatia I leng ua I pianpi pau chiat ua he ziang I hiu em?
9Parthai mite, Mid mite, Elam mite leh Mesopotamia gam, Judea gam, Kappadokia gam, Pontus leh Asia gam ah chêngte leh,
10Phrugia leh Pamphulia, Aigupta leh Kurini kîmvêl ah Libia ah chêngte leh, khenkhat Rom ah kipat hung khualzin Juda phungkâite,
11Kret mite leh Arab mite I hiu ah, I leng un Pathian thilhi lopite a gen uh chu eimau pau chiat in I he ziang un,” a tiu a.
12A leng un mak a sau ah, a ngaina a hepuau ah, “Zia um zia hi bang a hem?” a kiti tua chiat tau hi.
13Himaleh, khenkhat in a nuisan un, “Uain thak kham a hiu hi,” a tiu a.
Pentikost Ni Peter Thugen
14Ahi’n, Peter chu sawm leh khatte tawh ding khawm in, aw ngai tak in a kiang un thu a hun gen ta’n: Judea mite leh Jerusalem ah chêng zosiate haw, zia hi a la hiau inla, ka thugen hi ngai un;
15Ziate hi la ginchâk gual ua zukham ahi puau hi, jingkal dak kua bep ahi nalai ngal a.
16Zia hi Jawlnei Joel in a gen kha ahi zawi:
17 #
Jol 2.28-32
Pathian in, ni nunung lam leh,
mizosia chung in ka Thagau buntha’ng ka tin;
chutichun, la chapateu leh la chanuteu in thu gen intiu in;
la tangvalteu in kilâknate mu’n tiu in,
la têkseteu chun mang in mat in au.
18Ahi, ka suak, numei leh pawsalte chung inle,
zia ni ah chun ka Thagau hun buntha’ng ka tin;
amau chun thu genlawk in au.
19Chung lam van ah chun thilmakte leh,
nuai lam lei ah teptênate mu sak ing ka tin,
thisan tawh, mei tawh, meikhute tawh.
20Nisa chu thim hung suak intin,
thapi chu thisan suak in a;
Lalpa ni thupi leh lopi tak a hung tun masang ah chun.
21Ziaphat chuleh, kuale Lalpa min lam tapo chu,
hukdam in um in au, ti kha.
22Nanghaw Israel mite haw, ka thugen hi a la ngai un: Nazareth Jesu, Pathian in a hetpi ngei kha, ama mang in Pathian in la lak un thil lopi takte, thilmakte leh tepte’nate a bawl ah, zia chu nangmau ngei inle la hiatsau ahi’n,
23 #
Mat 27.35; Mar 15.24; Luk 23.33; Joh 19.18 zia pa ngei, Pathian in a gêl zawsa leh a hetlawkna dungzui ah la khut ua piakdaw ah um chu nanghaw’n dan pawlam ah umte khut in kros ah khenden in, la that tau a.
24 #
Mat 28.5,6; Mar 16.6; Luk 24.5 Himaleh, ama chu thina’n a tûktân zaw ding gual ahilo ziakin, Pathian in thina kipat tandok in, a kaitho kit ta’n.
25 #
Sam 16.8-11
David in a chung thu chu zia gual hin a la gen a:
Lalpa chu ka âng in ka mu zing sek ah,
ka kichawn lona ding in ama chu ka changlam in a um ah;
26tichun, ka lungthim a kipak a,
ka lei le a lim hi;
ka taksale kinem tak in chawl in a.
27Ka thagau chu mithi khua’n nusia pua’n la tin,
la mithiangtho chu a muatmang dingle phal diak pua’n la.
28Nang in hinna lampite chu lei kawkmu ta’n,
nang in la mêl ah chun kipakna’n ei sudim ding la hi, ti’n a la gen hi.
29Ka suapi Israelte haw, I suantu bul uh David thu ah hin, la kiang un hangsan tak in ka gen ngam hi: Ama chu a thi ta’n, vui in a um tai; chuleh, a thân le tu’ni tiang hin I kiang un a um nalai hi.
30 #
Sam 132.11; 2 Sa 7.12,13 Ama kha jawlnei a la hiziak in, Pathian in a kiang ah a gen chu a hia’n, ama khalbe piang ngei chu a lalchutpha chutsak dingin a kihaksial a.
31Zia thilte hi mulawk in, David chun Khrista thawkitna thu ah zia gual hin a la gen hi:
“Ama chu mithikhua nutsia in a um pua’n,
a taksa chule a muat mang diak puai,” ti in.
32Jesu chu Pathian in a kaitho ta’n, zia chu ka leng ua hin a hiatpitute ka hiu hi.
33Ziaziakchun, tu’hin ama chu Pathian khut changlam ah choisa’n ah um in, Pa ah kipat Thagau Thiangtho hun sawlna ding thutiam chu chang in, a hun sawl tha ta’n, zia chu tu’ ah la muu leh la het uh hi ahi.
34 #
Sam 110.1
David chu van ah a kal to puai; himaleh, ama chun,
Lalpa chun ka Lalpa kiang in,
35“La mêlmate la keng nuai ah ka koi piak masia,
ka changlam ah kichu’n,” a la ti kha.
36“Israel Insung ah mi zosia’n zia hi he tau hen: Zia Jesu ngei, la khetden uh kha, Pathian in ama chu Lalpa leh Messiah in a siam tai,” ti in.
Gingtu Masate
37Zia thute chu a het phat un, a lung uh chu a kisun gual a hung hi ta’n; Peter leh sawlchâk dangte kiang ah chun, “Suapite haw, bangti ding ka hitau em?” a hun tiu a.
38Peter chun a kiang un, “La lung uh hei unla, Jesu Khrista min in baptisma chang leu chin, la gitlonau ngaidam hi’ntin; tichun, Thagau Thiangtho thilpiak hi chang in lau.
39A thutep chu nanghaw â ding, la chateu â ding, gamla tak ah um zosia a ding tawh, I Lalpau Pathian in a kiang ah a ko tapote â ding ahi ngal a,” a ti’n.
40Chuleh, thudang tam tak tawh le hilchian in, a tilkho ah, “Tu’lai khang ah gitlonate lak ah kipat in kihukdok un,” a ti’n.
41Tichun, a thugen pomte chu a baptis tau a; zia ni chun mi sâng thum vêl belap in a um ui.
42Amau haw chu sawlchâkte thuhilnate leh kithua khawmna, vaithum phelna leh pauchapnate’n a kipelut zing tau a.
Gingtu Thakte Hindan
43Sawlchâkte mang ah thilmak leh tepte’na tam tak bawl ah a um ziakin mitin chu launa’n a dim tau a.
44 #
Nas 4.32-35
A ging zosia chu a um khawm un, thil bangkim a kikop tau hi.
45A thilneiteu leh a vanteu chu zuak in, a khot zat uh chu mitin kiang ah a mamaw dungzui un a hawm sek un.
46Nisi’n in tempul ah hun a mat khawm sek ziak un, a In un vaithum a phel sek ua, a anteu chu lungthim kipak leh huangphal tak in a ne sek ui.
47Pathian a pâk zing ua, mitin doisakna a chang un. Chuleh, nisi’n in Lalpa‘n a lak un hukdam ah um dingte chu a hun belap jel tai.
Currently Selected:
NASEPTE 2: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
