NASEPTE 3
3
Kengbai Sukdamna
1Ni khat Peter leh Johan chu pauchap hun; zia chu nitâk lam dak thum ahi’n, tempul ah a chia to un.
2Pawsal pakhat, a pian ah kipat kengbai a hun paw lut ua. Ama chu nisi’n leh Kêlkot Mêlpha a ti’na mun ua chun, mite’n a hung sial sek un; ama chun tempul ah lut dingte kiang ah chun khut a la daw sek a.
3Ama chun, Peter leh Johan tempul ah chia chu a mu phât in, a kiang un khut a la daw a.
4Peter leh Johan chun ama chu a en zing un, a kiang in, “Kei uh ei hun en in,” a tiu a.
5Ama chun bang a hem khat ei pia ding hi’n au ti kinem in a en zing a.
6Himaleh, Peter chun a kiang in, “Dangka leh sana ka nei puai; ahi’n la, ka neisun hun pia’ng ka: Nazareth Jesu Khrista min in dingdok in la, lam zawt ta’n,” a ti’n.
7Chun, a khut changlam in a tu, a kaitho ta’n; thakhat in a kengte leh a âkkhawmit gute chu suk-hat ahi ngal tai.
8A kichawmdok ah, a hung ding ah, lam a hun zawt tai; chun, chia kawm ah kichawm in Pathian a pâk a, tempul ah chun a lut khawm tau hi.
9Mipi zosia’n ama lamjawt leh Pathian pâk chu a muu a,
10ama chu tempul Kêlkot Mêlhoi bul ah khutdaw sekpa kha ahi ti a he chiat tau ah; a chung ah thil tung ziak ah chun mak sakna leh lamdang sakna’n a dim tau hi.
Solomon Hulliap ah Peter Thugen
11Ama chun Peter leh Johan chu a tuchak zing ah, mipi chun maksa’n, hulliap, Solomon Hulliap kiti ah chun a hung taikhawm sau sau tau a.
12Peter in zia chu a mu phât in, mipite kiang ah chun thu a hun gen ah, nanghaw, Israel mite haw, bangatia zia hi lamdang sa leh keimau thilhitheina a hem, thianthona ziak a hem ah lam ka zawtsak gual ua chuti etnop ziang la hiu em?
13 #
Pdt 3.15
Abraham, Isak leh Jakob Pathian, I pu leh pateu Pathian chun a suak Jesu chu a choisa’n ahi tai; ama chu la la pedok un, Pilat in thâdaw a guat lai ah khan a ma-âng in la la kihiatlosak tau a.
14 #
Mat 27.15-23; Mar 15.6-14; Luk 23.13-23; Joh 19.12-15 Mithiangtho leh dik tak chu doi lo in, tualthat pakhat la kiang ua piak dingin la don zawu a;
15Hinna Siampa chu la that un, Pathian in ama chu thina ah kipat in a kaitho tai. Zia chu keimau hi a hiatpitute ka hiu hi.
16Ama min chu zia mipa hin a gin ziakin, a min ngei ah chun zia pa, la muu leh la het uh hi, a suhat ta ahi; tichun, Jesu a ginna ah chun ama chu la leng ua mit mu in damna bukim a pia ta ahi.
17Tu’hin, suapite haw, nangmau leh la hotuteu in la mawlna ziak bep un, zia thilte chu la la hi’khâk uh ahi, ti ka hia’i.
18Himaleh, Khrista chun zia thilte chu thuak ngei ding ahi, ti Pathian chun a jawlneite zosia mang in a la hillawk ah, zia gual tak ah chun a guitung ta ahi.
19Ziaziakchun, la gitloteu thaimang ah a umtheina dingin la lung uh hei unla, Pathian kiang lam ah hung kinung hei kit un;
20tichun, Lalpa kiang ah kipat hihalna hung tung thei in a; tichun, nangmau â ding ah kiguat Messiah, zia chu Jesu ahi’n, hun sawl ding ahi.
21Khawvel siamtil ah kipat Pathian in a jawlneite kam ah a la gensa gual khan, bangkim siamthak hun a hung tun masia, ama chu van ah um tadi ding ahi.
22 #
Dan 18.15,18 Mosi khan, nangmau mite lak ngei ah kipat in, nang uh â ding jawlnei, keima tawhbang pakhat Lalpa la Pathian uh chun hun tungdok intin. Ama’n la kiang ua a gen taphot chu la ngaithâk diu ahi.
23 #
Dan 18.19
Chuleh, kuale zia jawlnei thugen ngaisak lo taphot chu, mipite lak ah kipat in hi’mangthai dim dem ah um ding a hiu, a ti ta kha.
24Chuleh, jawlnei zosia, Samuel ah kipat a nung ah hung um te tawh, thu a la gen kha taphot chun, zia nite hi a la genlawk tau ahi.
25 #
Thl 22.18
Nanghaw hi, zia jawlneite leh Pathian in la suanpateu kiang ah thuthung a la piak suante chu la hiu hi; ama chun Abraham kiang in, La suante ah chun lei ah namtinte maljawl ah um ding a hiu, a la ti’n.
26Pathian in a suak chu a tundaw lai in, la bawsiatnateu la hun haisan ua, a hun maljawl kit theina dingin, nanghaw kiang in a hun sawl masa ahi, ti’n a gen a.
Currently Selected:
NASEPTE 3: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
