PAWTDAWNA THU 23
23
Diktatna leh Thil Kilawm
1 #
Pdt 20.16; Thp 19.11,12; Dan 5.20 Zuau thu la genjak lo ding ahi. Diklo tak ah hiatpitu ah pang dingin dawha phalote tawh kikhutzopna la nei lo diu ahi.
2Thil diklo bawl dingin mi a tam lam lam la mawk zui lo ding ahi; mi kinialna hiatpitu ah la pan phat leh, a dik lai thiam lo chansak dingin a tam lam lam in pang ziang kin la;
3 #
Thp 19.15
kihêkna mun inle mi chaga ahiziak in la dangdâk lo ding ahi.
4 #
Dan 22.1-4
La mêlmapa bawngchal a hem, sabiltung a hem vâk mang la mu ahileh, a kiang lam ah la hun pui tung kit tei tei ding ahi.
5Nang hun mudapa sabiltung khat, a puak gik in a del den lai tak la tuak khâk leh, panpi lo ah la nutsia lo ding, sabiltung chu la panpi tei ding ahi.
6 #
Thp 19.15; Dan 16.19 Vaihawmna ma âng ah mi chaga ahiziak in a dikna chu kihiatlosak kin.
7Hekna diklo lak ah kipat in kikoikiang inla, mawna neilote leh midikte chu that kin: mi diklote phuba chu la ding ka hi’ngal a.
8Golgûkna him him la lâk lo ding ahi; golgûkna hin vaihawmte mit a hi’thûm ah, midikte dikna a lebawl sek ziakin.
9 #
Pdt 22.21; Thp 19.33,34; Dan 24.17,18; 27.19 La lak ua chêng malzinte la sukgenthei lo diu ahi: Aigupta gam ah malzin la la hi’tâk ziak un malzin lungthim la he ta ngal un.
Cholna Kum leh Cholna Nite
10 #
Thp 25.1-7
Kum guk sung la gam ua buchi the’ in la tin, a gate chu kilak khawm in la tin;
11a kum sagi’na phat leh gam chu kichawl damsak in la tin; a ga him him le la lak khawm lo ding ahi: tichun, la lak ua mi gentheite’n kilak khawm intiu in, amau nêkbangte chu zu leh vâte’n a nêk ding uh ahi. Zia gual a hin la grep huan leh la Oliv huanteu le la bawl sek diu ahi.
12 #
Pdt 20.9-11; 31.15; 34.21; 35.2; Thp 23.3; Dan 5.13,14 Ni guk sung na sêm in la tiu in, a nisagi ni leh la kichawl dam diu ahi; tichun, la bawngchal leh la sabiltung un kicholdamna a muu ah, la In ah piang la suakte leh gam dang mi la lak ua chêngte le a kichawldam theina ding un.
13La kiang ua ka gen zosia hi pha tak in ngai un; pathian dangte min him him sua ki’un la, la kam ua kipat in gitdawsak him him kiu in.
Kumsin ah Kût Mat Dingte
(Pdt 23.18-26; Dan 16.1-17)
14Kum khat sung in kei â dingin Kût thumvei la bawl sek diu ahi.
15 #
Pdt 12.14-20; Thp 23.6-8; Kis 28.17-25 Thawipanglo Kût la bawl diu ahi: a hunbî ding ah ka guatna Abib tha leh, thu ka hun piak gual in ni sagi thawipanglo vaithum la nêk diu ahi: zia tha hin Aigupta gam ah kipat hung pawtdok la hiziak un.
Kuama khutngawn in ka kiang ah a hung kilat lo ding uh ahi.
16 #
Thp 23.15-21; Kis 28.26-31; Thp 23.39-43 Lou ah la tu, la nasep ga lakkhawmna Pawltâk Kût la mat diu ahi. Kumtawp phat ah, la nasepna gate lou ah kipat la puak khawm zaw phat leh bu sunkhawmna kût la mat sek ding uh ahi.
17 Lalpa Pathian âng ah la lak ua pawsal zosia kum khat sung in thumvei a kilâk tei tei diu ahi.
18Kithoina gan thisan chu thawi kisaw tawh la lat khawm lo diu ahi; ka kiang ah kithoina gancha thau chu a jingkal kit tiang in la umsak lo ding ahi.
19 #
Dan 26.2; Pdt 34.26; Dan 14.21 La gam ah ga masa doichuam bikte chu Lalpa la Pathian In sung ah la hun puak lut ding uh ahi.
Kelno chu a pi nawitui in la huan lo ding ahi.
Kanaan Lua Ding ah Tiamna
20Ngai in, la ma-âng ah vansawlchâk pakhat, la lampi nangma hun vêng ding leh nang â ding ah ka tiamna gam ah hun pui lût dingin ka hun sawl hi.
21Ama thu chu ngaisak inla, a thu mang in: hilungna kin la, ama’n la bawlkhialnate chu hun ngaidam lo hial ding ahi ngal in: ka min le ama ah chun a um ngal a.
22A thu la ngai ah, ka gen zosia la zui leh, la gâlte â ding ah gâl leh, la mêlmate a ding ah mêlma hi ding ka hi.
23Ka vansawlchâk chu la ma-âng ah a chia phat leh, Amor mite, Hit mite, Periz mite, Kanaan mite, Hiv mite leh Jebus mite gam chu hun pui tung intin; amau chu gawtmang dim dem ding ka hi’ngal a;
24a pathianteu âng ua la bawkhup lo diu, a nau le la sep lo ding uh, a bawldan uh le la zui lo diu ahi: amau chu la tawden ua, a biak uh dawikhuamte chule la khetbuang dim dem ding uh ahi.
25 Lalpa la Pathian uh na la sep ding uh ahi: tichun, la an uh leh la tui uh hun maljawl ding ka hi; chuleh, la lak ua kipat natna lamang ding ka hi.
26A piangsual leh a chîngle la gam sung un um pua’n a: La dam sung niteu huitungsak ing ka.
27La âng un keima launa hun sawl ing ka tin, la tuak khak ding mi teu zosia chu hun subuai ing ka tin, la mêlmateu zosia chu hun jamsiat sak ding ka hi.
28Chun, la ma-âng ah natpi#zia tak ah Natpi kiti hi khen khat in, Khuaingal inle a let sek ui hun sawl ing ka tin, ziate chun Hiv mite, Kanaan mite leh Hit mite chu la ma-âng ua kipat in del dawsak ding ka hi.
29Amau chu kum khat sung in la ma-âng ua kipat in deldok ziang lo ding ka hi: Chutilochun, gam chu thip talua’n tin, nang uh â ding ah gamsa hângte hung pung kha’n au.
30La hung pun ua, a gam la hun lua zaw masiau, a them them in amau chu la ma-âng ua kipat in hun nawdaw piak ding ka hi.
31Chuleh, la gamgi chu Tuipi San ah kipat Philistinte Tuipi tiang; gamthip ah kipat Euphrates luipi tiang in gît piak ing ka; a gam ah chêngte chu la khut ah pia ding ka hi’ngal a: Chuleh, amau chu la ma-âng ah kipat in la nawdok ding ahi.
32Amau tawh thuthung la siam lo hial diu a hia; a pathianteu tawh le la siam diak lo ding uh ahi.
33Amau chu la gam sung ua la chênsak lo ding uh ahi: Chutilochun, ka chung ah thil phalo hun bawlsak kha’n au: A pathian uh la biak ua ahileh, nang uh â ding ah thâng hung hilo thei lo ding ahi ngal ah, a tia.
Currently Selected:
PAWTDAWNA THU 23: VAIPBSI
Highlight
Share
Compare
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
