PAWTDAWNA THU 30
30
Gimtui Hâlna Mâichâm
(Pdt 37.25-28)
1Chun, gimtui hâlna ding mâichâm khat siam inla: thinggi thing ah la siam ding ahi.
2A dung lam tong khat, a vailam tong khat ah lian hi’ntin; ning li nei ah siam ding ahi; a san lam le tong ni hi’ntin, a ningbawkte chule mâichâm chu tawh kizopa sakhat ahi ding ahi.
3A chung lam, a sîkte tawh, a ningbawkte zosia chu sana thiangtho tui la luan khum ding ahi; a sik geikawl ding sana thiangtho bawl inla.
4Chuleh, a geikawl nuai lam ah, a sik tuak ah chun a kol pani sana in siam inla, zia sung ah chun a jawnna ding mol la thun lut ding ahi.
5A jawnna mol ding thinggi thing in siam inla, sana tui la luan khum ding ahi.
6Zia chu thuthunna thingkuang chung ah ka hun ho sekna ding mun, ja’ngaina chutpha mai jawn tak ah, puanjak pang ah chun la koi ding ahi.
7Aron in zia mun ah chun gimtui a hâl sek ding ahi; jingkal si’n ah thaumeite chu a siam tup zaw tak leh, zia chung ah chun gimtui a hâl ding ahi;
8Aron in nitâk lam ah thaumei a det zaw phat leh, zia mâichâm chung ah chun gimtui hâl intin, la khang zosiau ah Lalpa ma ah gimtui ahi zing ding ahi.
9A thianglo gimtui a hem, hâlmang thillat a hem, thâiga thillat a hem zia chung ah chun la lat lo diu a hia; chuleh, dawnthei thillat le zia chung ah chun la sunthâk lo ding uh ahi.
10Aron in kum khat sung ah khatvei bep zia mâichâm ningbawkte chung ah chun kichamna a bawl sek ding ahi; kichamna ding ah gitlo thoina thisan chu kumsin ah khatvei jel la suanteu zosia tiang in a bawl jel ding uh ahi. Zia chu Lalpa â ding ah munzek thiangtho pen chu ahi, a tia.
Mun Thiangtho â Ding ah Sia
11Chuleh, Lalpa chun Mosi kiang in:
12“A min uh khum ding ah Israelte la sim phat leh, Lalpa âng ah mi tin in kitatna, min khum hun ah chun a bawl chiat ding uh ahi; a min uh khum ahiziak ah a chung ua natpi a tunlona dingin.
13 #
Pdt 38.25,26; Mat 17.24 Min khum taphot mi tin in a piak ding uh chu zia gual hi hi’n a: Mun thiangtho shekel kimkhat chiat a piak diu ahi (shekel khat chu gerah sawmni tawh kibang ahi:) Lalpa chantum ding ah thillat dingin shekel kimkhat ma tawh.
14Min khum taphot, kum sawmni ah kipat chung lam zosia chun Lalpa chantum dingin thillat a pechiat ding uh ahi.
15La hinnau kitatna ding ah Lalpa chantum ding ah thil la hun lat phat ua leh, shekel kimkhat sâng ah tam zaw mi hausa ahiziak in pediak ki’hen la, mi genthei a hiziak inle zia sâng ah tawm zaw chu a piak diak lo ding ahi.
16Israel suante kitatna man dangka chu hun la’n la tin, kikhopna biakbûk ah matchâk dingin la guat ding ahi; la hinnau kitatna ding ah Lalpa âng ah Israel suante â ding ah la hetzingna ding a hung hitheina dingin,” ti’n a gen a.
Sum-eng Tuikuang
17 Lalpa chun Mosi kiang in:
18 #
Pdt 38.8
“Kisilna ding sum-eng tui kuang tawh sum-eng in a keng siam inla. Zia chu kikhopna biakbûk tawh mâichâm kikâl ah koi inla, zia chun tui la koi ding ahi;
19zia tui ah chun Aron tawh, a chapate chun a khut leh a kengteu chu a sil ding uh ahi.
20Kikhopna biakbûk ah a lut ding phat a hem, Lalpa a ding ah mei ah thillat hâl ding ah mâichâm kiang ah nasêm ding ah a hung phat si’n ua leh zia tui ah chun a kisil sek diu ahi; chutilochun, thi ziang kha’n au.
21A thi lona ding un a khut leh a kengteu chu sil sek intiu in; zia chu amau â ding ah kumtuang ah a zui ding ua chawn dan chu hi’ntin, ama leh a suante’n a khang zosiau ah a zui ding uh ahi,” a tia.
Kinu’ Ding Sathau Leh Gimtui
(Pdt 37.29)
22 #
Pdt 37.29
Mosi kiang in Lalpa’n:
23Gim namtui pente lak ah murra tui shekel za nga tawh, sinamon gimtui a kimkhat, zia chu shekel za ni leh sawmnga; chuleh, kalamas gimtui shekel za ni leh sawmnga tawh,
24kassia shekel za nga, munthiangtho shekel te’na dungzui in; chuleh, Oliv thau Hin khat tawh hun la’n la;
25gimtui siampa’n a bawl sek gual in ziate chu gawt hel in, sathau thiangtho dingin la siam ding ahi; ziate chu kinu’ ding sathau thiangtho chu hi’n a.
26Zia sathau chun kikhopna biakbûk, thuthung thingkuang,
27dawkan tawh a matchâk zosiate, thaumei koina leh a matchâkte, gimtui hâlna mâichâm,
28hâlmang thillatna mâichâm leh a matchâk zosiate, kisilna kuang leh a tunna pum in la nu’ ding ahi;
29chuleh, a zek thiangtho pen a hitheina dingin, la hithiangtho ding ahi; zia khoikha taphot chule thiangtho jel ding ahi.
30Aron tawh a chapate chu zia sathau chu nu’ inla, hithiangtho in; tichun, kei â ding ah thiampu na a septheina ding un.
31Chuleh, Israelte kiang ah chun, “Zia hi la suan zosiau kei â ding ah kinu’ ding sathau zek thiangtho hi ding ahi,” ti la hil ding ahi.
32Mihing taksa chung ah la nu’ lo ding ahi; zia sathau kihel khawm gual a hin thil dang kihel khawm, a kibatpi le la siam diak lo ding ahi: Zia hi thilzek thiangtho a hia, nang â dinginle a thiangtho ding ahi.
33Zia gual hi kuale a bawl a hem, ahiloleh, zia thau hi nu’ tâk lo kua a hem khat nu’khâk ah a um chun, a chipite lak ah kipat himangthai ding ahi, a tia.
Gimtui ah Hâl Ding
34 Lalpa chun Mosi kiang in: “Thil gimtui tak, stakti, onukte, galbanumte tawh thil gimtui begawte, a kibang chiat in hun la’n la,
35ziate chu gimtui siampa’n a gawt-hel gual ah gimtui dingin hel in; chi saw al in, thiangtho tak in gimtui la siam ding ahi:
36Bang jat a hem chu gawt buang dim dem inla, ka hun hosekna ding mun, kikhopna biakbûk sung ah thu hiatsakna mun ah chun koi in: Zia chu nang uh â ding ah thilzek thiangtho pen hi’n a.
37Zia thil gimtui la siam ding gual a hin, nangma â ding la kisiam lo ding ahi: Lalpa â ding ah thilzek thiangtho in la ngai ding ahi ngal a.
38Kuale ama mat ding ah zia gual ah kisiam a um chun, a chipite lak ah kipat nawdaw ding ahi,” a tia.
Currently Selected:
PAWTDAWNA THU 30: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
