PAWTDAWNA THU 31
31
Biakbûk Sa Ding Mi Guatna
(Pdt 35.30—36.1)
1 Lalpa chun Mosi kiang in:
2“En in, Judah nam ah kipat Hur chapa Uri chapa, a min Bezalel kiti chu ka ko tai:
3Ama chu Pathian thagau in pilna, themthiamna, hetna leh khutthiamna chitin in ka thuam tai;
4khutthiam thil jat chuam chuam pawdok ding leh, sana, dangka leh sum-eng ah te siam dingin,
5suang sêk ding leh thing dawi dan dan ah khuak ding leh khutthiam thil tincheng bawl dingin.
6Zia lo ah chunle, ama sepkhawmpi dingin Dan nam ah mi, Ahisamak chapa, Oholiab ka guat ta ahi. Thu ka hun piak zosia dungzui ah bawldok thei dingin pilna lungthim leh khut thiamna chitin ka pia,
7kikhopna biakbûkte, thuthung thingkuang leh a chung ah um ja’ngaina chutpha tawh biakbûk sung ah matchâk zosiate,
8dawkan leh a matchâkte, sana thaumei tunna leh a matchâk zosiate, gimtui hâlna mâichâm leh,
9hâlmang thillatna mâichâm leh a matchâk zosiate, kisilna kuang leh a keng zosiate tawh,
10sil leh chên kilawm tak takte leh thiampu’n nasêm ding ah a kithuamna ding, thiampu Aron kithuamna thiangtho tawh, a chapate kithuamna dingte tawh,
11kinu’ ding sathau leh munthiangtho ah matchâk ding gimtui haw zosia hi a siamtheina ding un pilna ka pia ahi. Bawl ding ah thu ka hun piak zosia hi amau chun hun bawl ding a hiu,” a tia.
Sabbath Ummit Ni Dan
12 Lalpa chun Mosi kiang in:
13Israelte kiang in nang, nangma ngei in hi tia hin la gen ding ahi: “Ka Sabbath nite hi la chan zing ding uh ahi, zia hi keima tawh nangmau kikâl ah, la suan zosia tiang ua tepte’na hiding ahiziak in, nang uh hun hithiangtho Lalpa chu ka hi ti la het theina ding un.
14Sabbath ni chu la chan zing ding uh ahi, nanghaw â ding ah ni thiangtho ahiziak in: A subuak taphot chu tha ngal ding ahi. Zia ni ah nasêm taphot chu a chipite lak ah kipat paithâk ding ahi.
15 #
Pdt 20.8-11; 23.12; 34.21; 35.2; Thp 23.3; Dan 5.12-14 Ni guk sung nasepna’n mang in la tiu in; himaleh, a ni sagi ni chu vang Sabbath ni thiangtho, Lalpa â ding ah ni zek thiangtho ahi: Kuale zia ni ah nasêm taphot chu thalup ding ahi.
16Ziaziakchun, Israelte’n Sabbath ni chu a chan ding uh a hia, thuthung hizing dingin zia Sabbath Ummit ni chu a suan zosia tiang un a chan ding uh ahi.
17 #
Pdt 20.11
Keima leh Israelte kikâl ah kumkhua thuthung tepte’na ahi: Ni guk sung in Lalpa’n lei leh vante a siam zo ah; chuleh, a ni sagi ni chun a chawl nga, a kichawl tâk ziakin,” a tia.
Thuthung Suangpêk Panite Chu
18Sinai tâng ah Mosi kiang ah Pathian in thu a gen zaw phatin, thuthung suangpêk pani, Pathian khut in a zik chu Mosi a petai.
Currently Selected:
PAWTDAWNA THU 31: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
