THILSIAM THU 20
20
Gerar Ah Abraham Tawh Sarah
1Zia kipat chun, Abraham chu Negeb lam zuan in a kipêm ah, Kadesh leh Shur kikâl in um mun a khual ta’n; tichun, Gerar khua chun a châm tadi a.
2 #
Thl 12.13; 26.7 Abraham in a ji Sarah chu: “Ka suapinu ahi,” a ti’n. Ziaphatchun, Gerar khua hausapa Abimelekh in mi a sawl ah, Sarah chu a vapuisak ta’n.
3Himaleh, Abimelekh kiang in a mang lam in Pathian a hung kilâk ah, a kiang in, “Ngaitia, la numei pui ziak ah hin thi ding la hi tai; ama chu mi ji ahi ta’ngal ah,” a tia.
4Abimelekh in a la luppi nai pua’n; tichun, a kiang in, “Lalpa, gitlona neilo hile that tho ding la hi em?
5A pawsal in ka kiang ah, ‘Ka suapinu ahi,’ a ti hilo a hem? Ama ngei inle, ‘Ama hi ka suapipa ahi,’ a ti’ngal a. Lungthim dik tak pu leh khut thiangtho tak in zia thil hi ka la hi ahi,” a ti’n.
6Pathian in a mang lam ah chun, “Ahi, zia hi lungthim dik tak pu’ la bawl ahi ti ka hiai: ke’n le ka chung ah thil la hi’khial ding chu ka hun phal puai; ziaziakchun ahi, ama la la khoi khak ka phal lo.
7Tu’hin, mi ji kha pia kit ta’n; a pawsal kha jawlnei ahi ngal in, hun pauchap piak intin, dam mai in la. La piak kit lo leh chu thi ngei ding la hi ti he’n, nang tawh, la nei zosia natiang in,” a ti tai.
8Ahi’n, Abimelekh chu jingkal ma tak in a tho ah, a suakte zosia a ko khawm ah, a het ding un thil um dan chu a gen ta’n: mite chu a lau ma mau a.
9Chuleh, Abimelekh in Abraham a ko ah, a kiang in, “Ka chung ua la thilbawl hi bangtidan a hem? La chung ah bang bep ka hi’khial ah, kei leh ka mipite chung ah hin thil phalo tak la hun tut a hem? Bawl lo ding chi tak ka chung ah la bawl ahi tai,” a ti’n.
10Abimelekh in Abraham kiang in, “Bang lungthim la nei ah zia gual thil hi la bawl a hem?” a ti kit a.
11Abraham in, “Zia khua hin Pathian launa um paw ngei intin, ka ji ziak ah hin ei that kha’n au ti ka lau ziakin ka la gen ahi:
12Zia lo mawng ah chunle ama hi ka suapinu ahi him ah, kanu chanu hilo maleh ka pa chanu ahiziak in; tichun, ka ji’n a hung um ta ahi.”
13Chuleh, zia gual hi ahi’n, Pathian in ka pa In ah kipat ei vâkvai sak lai ah kipat khan, a kiang in, “Zia hi la hepina ka chung ah la kilat sakna ding chu ahi: I chiana taphot ah, ‘Ka suapipa ahi, ei tipek in,’ ka ti him ahi,” ti’n a dawnhu a.
14Chutichun, Abimelekh in belamte, bawgchalte, suak pawsal leh suak numeite a hun pui ah, Abraham a pia sik sek ta’n, a ji Sarah chule a pia kit tai.
15Abimelekh in, “Entia, ka gam hi la ma’n a kiphâ diai duai hi, la nopna mun pen pen ah chêng den in,” a ti’n.
16Sarah kiang ah chunle, “Entia, la suapipa hi dangka thîk Shekel sang khat ka pia’n: ngai in, la kiang ah um zosia lak ah la thiamchanna ding leh, mi tin mit mu ah dem kai lo ah la dikna suklatna ding hi’n a,” a ti’n.
17Chun, Pathian kiang in Abraham a pauchap ah: chuleh, Pathian in Abimelekh tawh, a ji tawh a suak nungakte chu a sudam kit ah, chate le a hun nei thei kit tau a.
18Abraham ji Sarah ziak ah chun Abimelekh Inkuante zosia nau neitheina chu Lalpa’n a la khâk bit piak tai.
Currently Selected:
THILSIAM THU 20: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
