THILSIAM THU 23
23
Sarah Thi’na leh Vuina
1Sarah chu kum za sawmni leh sagi a dam ah; zia chu Sarah dam sung kumjat chu ahi.
2Sarah chu Kanaan gam ah Kiriath-arba khua (Hebron le kiti sek) ah chun a thi tai; tichun, Abraham chu Sarah sûn ah kap dingin a chia ta’n.
3Chuleh, Abraham chu mithiluang jawn ah chun a ding ah, Hit mite kiang ah chun:
4 #
Heb 11.9,13; Nas 7.16 “La lak ua hin malzin leh pêm mai ka hi hen; ka mithiluang hi ka mu phâklona ka vuitheina dingin la lak uh hin kivuina ding mun pakhat ei piau in,” ti’n a don a.
5Hit mite chun Abraham chu a dawnhuu ah, a kiang in,
6“A la ngai tiam in, nang chu ka lak ua hin lal thupi tak la hi. Ka thân lak ua hin la nopna pen pen in la mithiluang chu vui mai in; la mithi vuina dingin ka lak ua hin kuama’n ka thân uh nang â ding ah a ît umlo ka hiu,” a tiu a.
7Abraham chu a dingdok ah, zia gam ah Hit mite chu chibai bûk in a kûn ta’n.
8A kiang un, “Ka mithi hi ka mulo ah vui mang pha leisak piak ua leh, ei lungsiat unla, Zohar chapa Ephron kiang ah son ei dot piak unla;
9a loutaw lam ah Makpelah kawlhawm saw ei piak thei khâk leh. A man dingle a sak jat jat pia’ng ka tin; nang uh lak ah kivuina mun ah ka nei dingin,” ti’n a don a.
10Hit mite lak ah chun Ephron chule kichu zing a hia: chuleh, Hit mi Ephron chunle Hit mite het leh a khuau kul kotkhak ah lût tapote het ah chun;
11“Hilo e he pu, ka thugen hi ngai in: lou chu ka hun pia ngal hen, a sung ah kawlbûk chule ka hun pekhawm hi; zia tak ah ka chipi um zosiate hetpi ah hi’n a leng in ka hun pedok tai: zia tak mun ah chun la mithi chu vui ziang in,” ti’n a hun dawnhu a.
12Ziaphatchun, Abraham in zia gam mite chu bokkhup in chibai a buk a.
13Ephron kiang ah chun, a gam mite het in, “Pha lasak phot chun lungsiat tak in ei la ngai tiam in: lou man chu hun pia’ng ka tin, zia chu nang inle pom inla, zia tak ah chun ka mithi hi vui ing ka,” ti’n a don a.
14Ephron in Abraham a dawnhu ah, a kiang in,
15“He pu, ngai tiam in, lei pêk dangka shekel za li man bep hi nang leh kei â dingin gen khamle hiding a hem? La mithi chu vui ziang ta’n la,” a tia.
16Abraham in Ephron thugen chu a pom ta’n: tichun, Abraham in, Hit mite zosia het ah shekel za li chu sumkawlveite’n a mat sek uh te’na chun a bûk ah, Ephron chu a pia tai.
17Chutichun, Ephron lou mun, Mamre sualam pang ah Makpelah chu a lou tawh, a sung ah kawlhawm tawh, lou ah thing um zosia tawh, a lou kîmvêl ah thing um zosia chu tawh,
18Hit mite mit mu leh a khawpi kul kotkhak ah lut zosia mit mu ah chun, go dingin Abraham chu piak det in a um tai.
19Zia nung ah chun, Abraham in a ji Sarah chu Kanaan gam ah Mamre sualam pang ah Makpelah (Hebron le kiti sek) lou ah kawlhawm ah chun a vui tai.
20Lou tawh a sung ah kawlhawm chu, kivuina mun dingin Abraham kiang ah chun Hit mite chun a pia den tau hi.
Currently Selected:
THILSIAM THU 23: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
