THILSIAM THU 24
24
Isak Tawh Rebekah Kichenna
1Tu’hin, Abraham chu a upa ta’n, têk lam a manaw ma ma ziang ta’n; chuleh, Lalpa’n bangkim in Abraham chu vangphatna a pia ta’n.
2Abraham in a suak, a In sung ah umte lak ah upa pen, a nei zosia chung ah thuneipa kiang ah chun, “Lungsiat tak in la khut kha ka malpi nuai in hun koi in;
3tichun, Lalpa van leh lei Pathian min chu sâl in, ka umna Kanaan mite nungak lak ah mi hi, ka chapa ji dingin la hun neisak lo ding ahi;
4Ahi’n, ka gam lam ah, ka chanaute kiang ah chia inla, zia kipat chun ka chapa Isak ji ding la vapui ding ahi, ti la kihaksial ding ahi,” a tia.
5A suakpa chun, “Numei chun zia gam ah hin ei hun zui nuam lo mai thei ah; la chapa hi la hung pawtdawna gam ah chun pui kit ziang ding ka hi diam?” ti’n a dong a.
6Abraham in a kiang in, “Ka chapa hi zia gam ah chun puikit lo dingin chingthei in.
7 Lalpa, van Pathian, ka pa In ah kipat leh ka pianna gam ah kipat ei puidokpa leh ei hopa, ‘Zia gam hi la suante kiang ah hun pia’ng ka,’ ti ah ka kiang ah thu tiampa khan, ama ngei in la ma lam in a vansawlchâk chu chiasak intin, zia tak ah kipat chun ka chapa hi ji la hun neisak ding ahi.
8Ahi’n, numei chun a hun zui nop lo leh ka kiang ah la kitiamna hin thiang mai in la: banghitaleh, ka chapa hi zia kipat hin la puikit lo him him ding ahi,” a ti’n.
9Chutichun, a suakpa chun a khut chu a pu Abraham malpi nuai ah chun a gawl ta’n: zia thu ah chun a kiang in a kitiam tai.
10Ziaphatchun, suakpa chun a pu sangawngsau sawmkhat pui in, a pu nei thilpha chitin chu keng in a kipandok ta’n; Mesopotamia gam ah Nahor khua chun a chia tai.
11Chun, nitâk lam ah numeite tuikhai hun lai tak in, dai kiang ah tuikul kiang ah chun a sangawngsaute chu a cholsak a.
12“Aw Lalpa, ka pu Abraham Pathian, lungsiat in tu’ni hin ei lawtinsak in, ka pu Abraham chung ah la hepina latsak in.
13Entia, tuikul kiang ah ka ding ah, khua sung ah mite chanute le tui khai dingin a hung uh hi.
14Nungak kua kiang ah le, ‘Lungsiat in ka dawn ding tui ei pia’n,’ ka ti ah, ‘Dawn inla, la sangawngsaute dawn dingle pia’ng ka,’ ti ah phal tak ah ei pia pên chu, zia ngei chu la suak Isak ji ding ah la guat mi chu hi hen. Zia ngei ah hin ka pu chung ah hepina la nei hi ti hia’ng ka,” a ti tai.
15Zia thu chu a gen zaw ma’n, Abraham nau Nahor ji Milkah chapa Bethuel chanu Rebekah chu tuibêl a liangko ah pu’n a hung pawtdok a.
16Zia nungak chu et ziang inle a mêlpha ma ma ah, nungak thiangtho, pawsal him him in a kivoppi nai lo ahi. Tuikhuk ah chun a kum suk ah, a tuibêl thâl dim in, a hung kal to kit a.
17Suakpa chu ama tuak dingin a tai ah, a kiang in, “Lungsiat in la tuibêl ah tui kha ei dawnsak tiam in,” ti’n a don a.
18Ama chun, “Dawn in he pu,” ti’n kin tak in a tuibêl chu a domtha, a dawnsak ta’n.
19Chutia, a dawnsak nung ah chun, “La sangawngsaute’nle a dawn khop masangsiau khai ziang ing ka,” a ti’n.
20Kin tak in a tuibêl chu gancha kuang ah chun a tei ah, tui thâl dingin tuikhuk lam ah chun a tai kit ah, sangawngsaute dawn ding ah chun a khai kit tai.
21Suakpa chun, Lalpa’n a zinna chu a lawtin leh lawtin lo hetna dingin ama chu thipbek in a la en zing hi.
22Chun, sangawngsaute chun tui a dawn khop phat un, suakpa chun nâkbu shekel kimkhat bûk ding leh chaucha pani, shekel sawm ah gik a hun ladok a;
23chuleh, a kiang in, “Kua chanu la hi em lungsiat in ei gen tiam in, la pa In ah tu’jan giakna ding mun a um thei diam?” ti’n a dong a.
24Ama’n a kiang in, “Nahor â ding ah Milkah in a hinpiak, Bethuel chanu ka hi,” a tia.
25Zia ban ah chun, “Bupawl le gancha an ding ka hau un, giakna ding le ka nei ui,” a ti nalai a.
26Suakpa chu a kûn ah, Lalpa chu chibai a bûk ta’n;
27“Ka pu chung ah hepina leh dikna haisan diak lo Lalpa, ka pu Abraham Pathian chu pâk in um ta hen. Kei hile Lalpa chun ka pu suapite In lam in ei pui ahi hilam,” a ti tai.
28Ahi’n, nungak chu a tai ah, zia thu chu a nu chanaute a vahil tai.
29Rebekah chun suapi pawsal pakhat a nei in, a min chu Laban ahi; Laban chun tuikhuk lam ah mi chu a del ziang ta’n.
30Nâkbu leh chaucha a suapinu bute chu a mu in, “Zia pa chun hitia hin thu a gen hi,” ti thu a suapinu Rebekah ah kipat a het phat ah chun, zia mipa kiang lam ah chun a chia tai. Chuleh, ama chu tuikhuk pâm ah sangawngsaute lak ah chun a la ding zing hi.
31Laban in, “Nang, Lalpa maljawlna dongpa, hung inla, ka In ah hung lut in: bang ding ah pawlam ah ding zing la hem? In leh munle sangawngsaute giakna dingin ka siamtup zo ta vei!” a hung ti’n.
32Tichun, mipa chu In sung ah chun a lut ah, Laban in sangawngsaute van a thap piak ah; sangawngsaute â dingin bupawl leh gan an a pia’n, ama keng leh a lawite keng silna dingin tui le a pia tai.
33Chun, Abraham suakpa ma-âng ah nêk ding a lui piak ah; himaleh, ama chun, “Ka hungna thu ka gen masang sia bangma ne pua’ng ka,” a tin. Ziaphatchun, “A leh, gen ta’n la,” a tiu a.
34Chutichun, a hun gen pan ta’n: “Keima hi Abraham suakpa ka hi:
35 Lalpa’n ka pu chu nasa tak in vangphatna a pia hen, mi lopi tak a hung hi tai: Lalpa chun a kiang in belam honte, bawng honte, dangkate, sanate, suak numeite, suak pawsalte, sangawngsaute, sabiltungte le a pia’n.
36Ka pu ji Sarah chun a têk nung in ka pu â dingin chapa pakhat a nei ah; ama kiang ah chun a nei zosia a pe sik sek tai.
37Ahi’n, ka pu chun, ‘Ka umna gam ah Kanaan mite nungak lak ah mi ka chapa ji ding ah la pui piak lo ding ahi;
38ka pa In lam ah ka chanaute lak ah chia inla, ka chapa ji ding la va hawl ding ahi,’ ti’n ei kitiamsak a.
39Ka pu kiang ah chun, ‘Numei chun ei zui nuam talo bang leh lah?’ ka ti’n.
40Ama chun, Lalpa, a ma-âng ah ka dinsekna pa chun a vansawlchâk chu la kiang ah hun sawl intin, la chiana ding ah chun hun lawtinsak in a: Ahi’n, ka chapa â dingin ka chanaute leh ka pa chanaute lak ah mi chu ji la neisak ding ahi:
41Ka chanaute kiang ngei la tun phat leh ka kiang ah la kitiamna hin thiang ta’n la: Nungak chu a piak nop lo ua lehle ka kiang ah la kitiamna hin thiang ta’n la,” ei ti ahi.
42Tu’ni hin tuikhuk kiang ka hung tung ah, “Aw Lalpa, ka pu Abraham Pathian, ka chiana hin lei lawtinsak ding leh en tia,
43tuikhuk kiang ah hin ka ding hi! Nungak tuikhai ding ah hung suk kua kiang ah le, Lungsiat tak in ka dawn dingin la tuibêl ah tui kha ei pia’n,” ka ti ah;
44“Dawn inla, la sangawngsaute â dingle khai piak ing ka,” ti tapo chu, zia mi ngei chu ka pu chapa ji ding ah Lalpa’n numei ei guat piak chu hihen, ka ti’n.
45Chutia, ka lungthim ah ka gen zaw ma chun, Rebekah hi a tuibêl pu’n a hung suk ah; tuikhuk ah chun a chia suk ah; tui a hun pua’n: “Lungsiat in la tui kha ei dawnsak tiam in,” ka ti’n.
46Ama hin a liangko ah tuibêl chu kin-gang tak in a hun domtha’n: “Dawn inla, la sangawngsaute dawn dingle hun pia’ng ka,” a ti’n.
47Ziaphatchun, “Kua chanu la hem?” ti’n ka dong ah; ama’nle, “Nahor chapa Bethuel chanu Milkah in a hinpiak ka hi,” ti’n ei dawnhu a. Tichun, a nâk ah nâkbu ding leh a khut ah chaucha dingte hi ka bûsak ta ahi.
48Chuleh, ka lu kûn in Lalpa chu chibai ka bûk ta’n; Lalpa, ka pu Abraham Pathian, ka pu unaupa chanu, a chapa ji ah neisak ding ah lampi dik ah ei puipa chu ka chawihoi ta ahi.
49Tu’hin, ka pu chung ah ti tak tak ah hepina la nei ua, dik tak ah la bawl ding uh leh ei hil un; la hilo ding uh leh le ei hil ziang un: Changlam a hem, veilam a hem ah ka kihei theina ding in, a ti tai.
50Ziaphatchun, Laban leh Bethuel in a dawnhu tau a: “Zia thil hi Lalpa kiang ah kipat hung pawt ahi. La kiang in a sia hi’n a pha hileh bangma genthei ka nei puau hi.
51Entia, Rebekah chu la ma’n a um hilam, pui inla, chia tau in: Lalpa’n a ti gual ah chun la pu chapa ji ding in um ta hen,” a tiu a.
52Abraham suakpa’n zia thute chu a het phat in, a mai ah lei si’n, Lalpa chibai a bûk tai.
53Chuleh, suakpa chun dangka leh sana kicheinate, puante a hun ladok ah, Rebekah a pia ngal ah; a suapipa leh a nu kiang inle kicheina manpha tak takte chu a pia’n.
54Tichun, ama leh a kitonpite chun nêk leh dawn dingte chu ne leh dawn zo in a giak tau a. Jingkal ah a hung thawdok phat un, “Ka pu kiang lam ah ei chiasak tau in,” a ti’n.
55A suapipa leh a nu chun, “Bawinu chu ka kiang un chomcha, ni sawm vêl um tadi hen la, ziazaw chuleh chia bep hen,” a tiu a.
56Himaleh, ama’n, “Ei hi’vaigei kiu in, Lalpa’n ka chiana hin ei lawtinsak ta’ngal in: ka pu kiang lam ka tun vak theina ding un ei chiasak mai un,” ti’n a dawnhu a.
57Amau chun, “Bawinu chu ko ing ka tiu in, ama ngei dong ing kau,” a tiu a.
58Rebekah chu a ko tau ah, “Ziapa hi la zui nuam em?” ti’n a dong tau a. Ama chun, “Ka zui nuam hi,” a ti’n.
59Chutichun, a suapinuu Rebekah chu ama donnu tawh, Abraham suakpa tawh, a lawite chu a zuisak tau a.
60Rebekah chu maljawlna a piau ah, a kiang in:
“Ka suapinuu nang chu,
sâng tam tak mun sangsawmte nu hung hi’n la:
la suante chun a mêlmateu kul kotkhak lua pek tau hen,”
a tiu a.
61Ziazaw chun, Rebekah chu a suaknu tawh a sangawngsau chung in a chuang ua, mipa chu a zui tau a: Tichun, suakpa chun Rebekah chu pui in, a chia tai.
62Tu’hin, Isak chu Beer-lahai-roi lam ah kipat in a hung ah, Negeb gam ah um ahiziak in;
63nitâk lam ah chun Isak lou lam ah hunthip mang dingin a hung pawtdok ah; a hung dakdaw leh, sangawngsaute’n ama a hun zuan ua.
64Rebekah chule a hang dakdok ah, Isak a vak mu phât in sangawngsau chung ah kipat in a kum a;
65suakpa kiang ah chun, “Loulai ah ei dawn ding ah hung saw kua a hem?” a tia. Suakpa chun, “Ka pu ahi saw lam,” a tia. Ziaphatchun, maikhûna puan a la’n, a kikhu khum tai.
66Suakpa chun a thil hi dan zosia chu Isak a hil a.
67Isak in Rebekah chu a nu Sarah puan In ah chun a pui lût ah; tichun, a kichenpi ta’n; a hepi ma ma ah. Tichun, a nu thi’nung ah chunle Isak chu a hung thamuang thei tai.
Currently Selected:
THILSIAM THU 24: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
