THILSIAM THU 25
25
Abraham Tawh Keturah Kichenna
(1 Kh 1.32-33)
1Abraham in ji dang a nei kit ah, a min chu Keturah ahi.
2Ama chun, Zimran, Jokshan, Medan, Midian, Ishbak leh Shuah te hi a hinpiak a.
3Jokshan chun chapa Sheba leh Dedan a nei ah. Dedan chapate chu Asshurim, Letushim leh Leummim a hiu a.
4Midian chapate chu: Ephah, Epher, Hanokh, Abida leh Eldaah a hiu a. Zia sia hi Keturah chate a hiu a.
5Abraham in a nei zosia chu Isak kiang in a pia ta’n.
6A thâikemnu chate kiang in Abraham in kipakmante a pia’n; ama dam sung ngei in a chapa Isak kiang ah kipat in amau cheng chu khawsak lam ah sualam gam in a sawl mang tai.
Abraham Thi’na
7Abraham dam sung chu kum za sawmsagi leh nga ahi.
8Tichun, Abraham chu kumting tak in a têk thi ta’n, a chipite kiang ah chun vui in a um tai.
9A chapa Isak tawh Ishmael in Hit mi Zohar chapa Ephron lou ah Mamre jawn ah Makpelah kawlhawm ah chun a vui tau a;
10 #
Thl 23.3-16
zia lou chu Abraham in Hit mite lak ah kipat a chawksa kha ahi’n; zia tak ah chun Abraham chu a ji Sarah tawh a vui khawm tau a.
11Abraham thi’nung in a chapa Isak chu Pathian in vangphatna a pia’n. Chuleh, Isak chu Beer-lahai-roi khua chun a chêngden tai.
Ishmael Suante
(1 Kh 1.28-31)
12Ziate hi Abraham chapa Ishmael, Sarah suaknu, Aigupta mi Hagar in Abraham a hinpiak suante chu a hiu a.
13Zia hi Ishmael chate min, a pian dan dungzui ua kitian dan chu ahi: Ishmael chapa upa pen chu Nebaioth ahi’n; a bân ah Kedar, Adbeel, Mibsam,
14Mishma, Dumah, Massah,
15Hadad, Tema, Jetur, Naphish leh Kedemah a hiu a.
16Ziate hi Ishmael chate leh a min teu, a chênnau khua dungzui leh a giabuk dungzui ua, a nam dungzui ua leng sawm leh panite chu a hiu a.
17(Ishmael dam sung chu kum za sawmthum leh sagi ahi; tichun, a thi ta’n, a chipite kiang in a vui tau hi.)
18Amau chu Havilah gam ah kipat in Shur gam, Aigupta jawn ah Assuria lam kâi ah um ahi; a suapite zosia tawh kigâlchân ah chun a chêng den tai.
Jakob Tawh Esau Pianna Leh Khangdawn Lai
19Ziate hi Abraham chapa Isak suante chu a hiu a: Abraham chu Isak pa ahi’n:
20Isak in Paddan-aram gam ah Aram mi Bethuel chanu, Aram mi Laban suapinu Rebekah ji’n a nei ah khan kum sawmli mi a hita’n.
21A ji chu a chîn ziakin Isak in Lalpa kiang in a don ah: Lalpa’n a dotna a lawtin ta’n; a ji Rebekah chun nau a hun vop tai.
22A nauvop chu a gilpi sung in a kidel tau ah; ama chun, “Zia gual ah hin bangti’n hing leh dam in um ding ka hi em?” ti’n Lalpa dong dingin a chia tai.
23 #
Rom 9.12
Chun, Lalpa’n a kiang in:
“La sûl ah hin nam pani a um un,
la gilpi sung ngei ah hin nam pani kikhen in au.
Nam khat chu pakhat sâng in hat zaw’n tin:
ahi’n, a upa zaw chun a naupang zawk na chu,
sêm in a,” a ti tai.
24A nau nei hun ah chun, a sul ah chun nau pani a piang ta’n.
25A hung piang masa zaw chu a san seng sung ah, puan mul gual ah mul nei in a hung pian ziakin, a min in Esau a sak un.
26Ziazaw chun, a naupang zawk chu a hung suak kit ah, a khut in Esau khawtalzum a hun tu zui a; tichun, a min in Jakob a sak tau a. Rebekah in amau a nei lai ah chun, Isak chu kum sawmguk mi ahi tai.
27Naupang panite chu a hung pitin phat un, Esau chu gamvâk thiam tak, thingnuai mi tak a hung hi’n; Jakob chu mi nguai, puanbûk ah um hiat hiat mi ahi’n;
28Isak in, Esau chu sa kâp mi ahi ziakin a ngaina’; Rebekah chun vang Jakob a ngaina zawi.
Esau In A Upa Hi’na A Zuak
29Khatvei Jakob in an a la huan lai tak in Esau chu gamlak ah kipat in a hung tung ah; a gil a kial ma ma a.
30Jakob kiang ah chun, “Lungsiat tak in la an huan kha neukhat ei nêksak mai tiam in, ka chau ma ma tai!” a ti’n. (Zia ziak ah chun ahi a min ah Edom, ‘san’ ti a kisakna chu.)
31Jakob in, “Cha upa la hi’na ei chawksak phot in,” a tia.
32Esau in, “Thi ding ka hita hen, cha upa hi’na mai chu kei â dingin bang phatchuamna a um ah a hem?” a ti’n.
33 #
Heb 12.16
Ziaphatchun, Jakob in, “Ka kiang ah kitiam zet phot in,” a tia. A kiang ah chun a kitiam ta’n, a upa zaw hi’na chu Jakob kiang in a khawng tai.
34Tichun, Jakob in Esau kiang ah chun vaithum leh a nêkthei huan chu a pia, a ne a dawn ah; tichun, a kipan ah a chiana ding lam ah chun a chia kit tai. Zia gual ah chun Esau in a cha upa hi’na chu a la ngainêp ta ahi.
Currently Selected:
THILSIAM THU 25: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
