THILSIAM THU 30
30
Jakob Chate
1Himaleh, Rakhel in vang Jakob chu cha him him a hinpiak puai ti a kihiat phatin, a suapinu chu a mitthîp ta’n; Jakob kiang in, “Cha ei pia’n, achutiloleh thi mai zaw’ng ka,” a tia.
2Chun, Rakhel chung in Jakob a lungna ta’n: “La gil ah ga hun pia phal lo Pathian thasâng ah um ka hia ah a hem?” a tia.
3Ama chun, “Entia, ka suaknu Bilhah saw pawl mai in; chutichun, ke’nle ama lak ah chate ka neitheina dingin, ka phei chung ah hin cha hing in a,” a ti’n.
4Tichun, a suaknu Bilhah chu a ji dingin a pia ta’n; Jakob in ama chu a pawl tai.
5Chun, Bilhah chun nau a hun vop ta’n, Jakob chu chapa a hun hinpiak tai.
6Rakhel chun, “Pathian in ei ngaitua ah, ka aw a hia’n, chapa ei pia a hita hi,” a ti’n; ziaziakchun, a min dingin Dan a sak tai.
7Chuleh, Rakhel suaknu Bilhah chun nau a vop kit ah, Jakob chu chapa dang pakhat a hinpiak kit tai.
8Chun, Rakhel in, “Nasa tak in ka suapinu ka buan ah, ka zo tai,” a ti’n; tichun, a min in Naphtali a sak tai.
9Chun, Leah chun chapa a nei kit ta puai ti a kihiat phatin, a suaknu Zilpah chu a pui ah, a ji dingin Jakob a pia ta’n.
10Tichun, Leah suaknu Zilpah chun Jakob chu chapa a hinpiak tai.
11Leah chun, “A vangphat huai na e!” ti’n a min in Gad a sak tai.
12Leah suaknu Zilpah chun Jakob chu chapa dang pakhat a hun hinpiak kit a;
13Leah chun, “Ka hampha na lawm lawm e! Numeite chun hamphanu ei ti ding a hiu hilam,” a ti’n; tichun, a min dingin Asher a sak tai.
14Chuleh, bulâk hun in, Reuben in gamlak ah zawldi-âi a vamu’n, a nu Leah kiang in a hun chawi ah. Rakhel chun, a kiang in, “Lungsiat in la chapa zawldi-âi kha neukhat ei pia tiam in,” ti’n a don a.
15Ama chun a kiang in, “Ka pawsal lei chû piak hi thu duai ah la bawl ahi em? Ka chapa zawldi-âi natiangle ei chû piak gaw nalai maw?” a ti’n. Rakhel chun, “Ahiloleh, la chapa zawldi-âi man dingin tu’jan ah hin ama chu luppi in,” a ti ta’n.
16Chuleh, nitâk lam a hung hi chun Jakob chu lou ah kipat in a hung ta’n; Leah chu a dawn dingin a chia in: “Tu’jan ah hin lei luppi ding ahi, ka chapa zawldi-âi ah ka khêl la hi ta’ngal in,” a ti’n. Tichun, zia jan ah chun a luppi tai.
17Chun, Pathian in Leah pauchapna chu a ngaitha’n, nau a hun vop ta’n, Jakob chapa panga’na chu a hinpiak tai.
18Leah chun, “Ka suaknu chu ka pawsal kiang ah ka piak ziak in Pathian in ka law ei pia ta ahi,” a ti’n; tichun, a min in Issakhar a sak tai.
19Chuleh, Leah chun nau a vop kit ah, Jakob chapa pagukna a hinpiak tai.
20Chun, Leah chun, “Pathian in mo ken pha tak ei piak ziakin, tu’hin chu ka pawsal chapa paguk ka hinpiak ta’n, ei ngaisâng ta’n ah,” a ti’n; a min in Zebulun a sak tai.
21Zia nung ah chunle chanu a nei kit ah, a min in Dinah a sak a.
22Pathian in Rakhel chu a hezing ah, a pauchapna chu a ngaitha hen, a sûl le a hon piak tai.
23Nau a hun vop ta’n, chapa a nei ah; “Pathian in simmaw ah ka umna hi a lamang tai,” a ti’n;
24a min in Joseph a sak ah, “Lalpa’n cha dang le ei piak belap ta hen,” a ti’n.
Laban Hekna Jakob Vangpha
25Chun, Rakhel in Joseph a hin nung ah chun, Jakob in, Laban kiang in, “Keima umna ngai, ka In leh ka gam lam ua kha ka um kit theina dingin ei chiasak ta’n;
26la na ka sep law pen ka jite leh ka chate hi ei pia’n la, ei chiasak ta’n; la na ka sep piak dan hi la henai,” a ti’n.
27Laban chun a kiang in, “Lei hepi thei ahi chun um nalai ta’n la; Lalpa’n nangma ziak ah hin maljawlna ei piak ahi ti ka hechian hi;
28chuleh, la law ding chule ei gen in, pena’ng ka,” a ti’n.
29Chun, Jakob in, “Bangti’n la na ka sêm em, bang gual in la ganchate ka chingna em ti la he na hilam:
30Kei hung ma’ khan tawmcha la nei ah, tu’hin vang tam tak a pha tau hi; ka kiheina lam taphot ah Lalpa’n a hun maljawl la hi hilam. Ahi’nla, bangtik leh keima Insung chan ding ka sêmdok ta diam?” a tia.
31Chun, ama chun, “Bang hun pe ding ka hi em le?” a ti’n. Jakob in, “Bangmacha ei pia kin; ei pia le chin la ganhonte ka vâk ah ka hun chin piak ngai kit ding ahi’n;
32tu’ni hin la ganhon chu vaen suak ing ka tin, belam hon lak ah a vom in a kâp gial leh a kâp cheng lek luk leh a pivom taphot leh, kêl hon lak ah a gial leh pawl phel phul taphot chu ka law dingin kilâk ing ka.
33Chutichun, ka law ding ah ka lakte entha la hung phat leh, ka hun nunung lam hin ka diktat dan chu taklang mai in ah. Kêl hon lak ah a gial leh a pawl phel phul hilote leh, belampi lak ah a vom hilo taphot chu nang â ka gûk dan in sim khawm mai in,” a ti’n.
34Laban in, “A pha ngut hi, la gen gual chu hihen,” a tia.
35Tichun, zia ni ma ma chun Laban in kêlchal lak ah a vam ah jem tan, a vam in a kâp cheng phel phul taphot leh, kêlpi lak ah a vam ah gial leh a vam in a kâp cheng phel phul, a vam ta phot leh, belam hon lak ah a vom taphot chu a chuam in a koi ah, ama chate a chinsak ta’n;
36Jakob in Laban gan-gual dang zosia chu a chin zing lai in, ama leh Jakob kikâl ah ni thum lam chiana ah gamla in a koichuam tai.
37Chun, Jakob in hiangzau thing leh makha thing leh sething tiangpum a la’, a hawng a khok pawl dit diat ah, mol ah chun a pawlna mun chu a latsak a.
38Chun, gan honte’n a tui dawn seknau ah kuang, tui luanna munte ah chun, gan honte mazawn chiat ah chun mol kikhok pawlte chu a koi ta’n: tui dawn ding ah a hung phat uh leh, a huam uh a kipan sek in.
39Tichun, gan honte chu molte zawn ah chun a huam uh a kipan tau ah; a jem gialte, a jem cheng phel phulte ngen a hun hing ta sek un.
40Jakob chun belamnote chu a chuam in a koi ah, a gan-gualte chu Laban gan-gual lak ah a jemtan leh a vom zosiate lam chu a ngatsak sek ah; ama gan-gualte chu a chuam in a koi sek ah, Laban gancha lak ah chun a koi ngai pua’n.
41Chun, gancha hat deute chu a huam hun sîn leh mol lak ah chun a huam theina ding un, Jakob chun tui luanna, gancha mu ah chun a molte chu a koi sek a.
42Himaleh, gancha jawngkhal deute a hiu leh a koi ngai pua’n: chutichun, a no phalo deute chu Laban chan a hisek in; a hat cha cha chu Jakob chan a hisek hi.
43Tichun, Jakob chu nasa tak in a hung pung ta’n; gan-gual tam tak tak te, suak pawsal leh numeite, sangawngsaute leh sabiltungte le a hun nei tai.
Currently Selected:
THILSIAM THU 30: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
