THILSIAM THU 29
29
Jakob Tawh Rakhel Kituakna
1Jakob a chia pek ah, khawsak mite gam a tung ta’n.
2Chun, a et leh, lou lai ah tuikul a la um ah, a kiang ah chun belam hon thum a la bok zing un; zia tuikul ah kipat chun belam honte chu tui a dawn sak sek uh a hia; tuikul kotkhak ah suang um chu a lian ma ma a;
3gan honte a chia khawm tak uh leh, belampute’n tuikul kotkhak ah suang chu likdok in, belam honte chu tui a dawnsak un; chuleh, suang chu tuikul kotkhak ah a umna ngai ah khan a koi kit sek uh ahi’n.
4Jakob in a kiang un, “Ka suapite haw, khoilam mi la hiu em?” a hun ti’n. Amau chun, “Haran khua mi ka hiu,” a tiu a.
5Chun, ama’n a kiang un, “Nahor chapa Laban la hiau em?” a ti’n. “Aw, ka hiau hi,” a hun tiu a.
6Ama chun, a kiang un, “A dam na em?” a ti’n. Amau chun, “Dam e; entia, a chanu Rakhel le belam pui in a hung saw,” a tiu a.
7Chun, ama chun, “Ngai tiam un, ni le a sâng nalai in, gancha pui khawm hunle a hinai lawm lawm pua’n; belamte hi tui dawnsak unla, vatatsak kit un,” a ti’n.
8Amau chun, “Belam hon zosia chu a chia khawm ua, tuikul kotkhak ah suang hi a lîkdawu ah, tui ka dawnsak masang siau chia thei pua’ng kau,” a tiu a.
9Chutia, amau a kihopi lai tak ah chun Rakhel chu ama’n a chin sek, a pa belamte pui in a hung tung a.
10Jakob in a nu suapipa Laban chanu Rakhel leh a belam hon chu a mu in a vanai ah, tuikul kotkhak ah suang chu a likdaw piak ah, a nu suapipa belam hon chu a dawnsak tai.
11Jakob in Rakhel a chawp ah, ngai tak in a kap ta’n.
12Jakob chun a pa tupa ahileh Rebekah chapa ahi ti Rakhel a hil ah; Rakhel chu a tai ah, a pa a vahil tai.
13Chuleh, Laban in a suapinu chapa Jakob chanchin a het phat in, a lamtua dingin a tai ah a chawp ah, a In ah a pui lût tai. Jakob in Laban kiang in a chanchin zosia chu a hil tai.
14Chuleh, Laban in a kiang in, “Nangma hi ka gu leh ka phe ma ma la hi ngut hi lam!” a ti’n. Chutichun, a kiang in tha khat a châm tai.
Jakob in Laban Chanute Kichenpi
15Laban in Jakob kiang in, “Ka tupa hilechinle a thawn in ka na sêm sam ding la hem. Bang law ding la hem, gen tiam in?” a ti’n.
16Laban in chanu pani a nei ah, a upa zawk min chu Leah ahi’n; a naupang zawk min chu Rakhel ahi.
17Leah mit chu a hat pua’n, Rakhel vang chu mi tino leh mêlhoi, ngaikâi ma ma ahi.
18Jakob in Rakhel chu a hepi ah, “La chanu neuzaw Rakhel nei ding hin kum sagi la na sêm mai ing ka,” a ti’n.
19Laban in, “Mi dang kiang ah ka piak sâng in nang kiang ah ka piak chu phazaw ding a pom; ka kiang ah um mai in,” a ti’n.
20Tichun, Jakob in Rakhel law dingin kum sagi a na a sêm ta’n; ahi’n la, a hepi ma ma ziakin ni chomcha gual bep in a ngai a.
21Jakob in Laban kiang in, “Ka luppi theina dingin ka ji chu ei pia ta’n, ka hun a ting tai,” a ti’n.
22Tichun, Laban in zia khua sung ah mi zosia chu a ko khawm ah, luaithe’na a siam tai.
23Thimbut ah chun a chanu Leah chu Jakob kiang in a hun pui lût ah; ama chun a la luppi tai.
24(Chuleh, Laban in a suaknu Zilpah chu a chanu Leah kiang in a suaknu dingin a piai.)
25Jingkal a hung hi’phat in, Leah a la hita mai ah! Ziaphatchun, Jakob in Laban kiang in, “Ka chung ah la thil bawl hi bangtidan a hem? Rakhel law ding ah nasem hilo ka hem? Bang ding ah ei thêm la hem?” a ti’n.
26Laban chun, “Ka gam ua hin zia gual ah cha upa zaw khêl ah a nau zaw sawl chu dan ahi puai.
27Zia ni sagi sung hi subukim phot inla; chun, kum sagi dang ka na la sep man dingin ama le hun pia mai ding ka pom?” a ti tai.
28Zia gual ah chun, Jakob in ni sagi a sukbukim zaw phatin, Laban in a chanu Rakhel chule a ji dingin a pia tai.
29(Laban in a suaknu Bilhah chu a chanu Rakhel suaknu dingin a pia ta’n.)
30Chun, Rakhel chule a luppi in, Leah sâng in Rakhel chu a hepi zaw’n, Laban na chu kum sagi ma a sêm kit tai.
Jakob Ah Kipat Naupang Piangte
31Chun, Lalpa’n Leah chu muda in a um hi ti a he’n, a sûl chu a hon piak ta’n; Rakhel vang chu a chîng tai.
32Leah chun nau a vop ta’n; chapa a nei in, a min in Reuben a sak ah, “Lalpa’n ka genthei dan a mu ahi hi lam, tu’hin chu ka pawsal in ei hepi ta’n a,” a ti’n.
33Chun, nau a vop kit ah, chapa a nei kit ah, “Lalpa’n, muda in ka um hi ti a het ziakin zia hile ei pia ahi,” a ti’n; tichun, a min in Simeon a sak tai.
34Chun, nauvop kit in, chapa a nei kit ah; “Tu’zet hin chu chapa pathum ka hinpiak tâk ziak hin ka pawsal in ei ngai deu ta’n a,” a ti’n; a min in Levi a sak tai.
35Chun, nau a vop kit ah, “Tu’chung hin chu Lalpa chawihoi ing ka,” a ti’n: ziaziakchun, a min in Judah a sak ta’n; tichun, cha a nei kit tadi puai.
Currently Selected:
THILSIAM THU 29: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
