THIAMPUTE LEKHABU 3
3
Kichamna Thillat
(Thp 7.11-21)
1Kua’n le kichamna thillat a hem la bawlna ding ah bawng hon lak ah kipat pakhat la hun piak ding chun, a nu hi’n, a chal hitaleh, Lalpa ma ah demna bei hi hen.
2La thillat ding luchung in la khut nga’n la tin, kikhopna biakbûk kotbul ah chun that inla; chuleh, Aron chapa thiampute chun gancha thisan chu mâichâm a the’ kîmvêl ding uh ahi.
3Chuleh, kichamna thillat chu Lalpa kiang ah mei ah la lat ding ahi; a sungthau tawh, a sung ah thau bek zosia chu tawh,
4a kãlte ni tawh, a kãl chung ah a thau um zosia tawh, a phûkthau zosia tawh, a thin chung ah a thau um zosia chule la lakdaw ding ahi.
5Chuleh, Aron chapa thiampute chun, ziate chu mâichâm chung ah hâlmang thillat dingte pum in, mei chung ah thing kisia khawm chung ah chun Lalpa â ding ah gimtui, mei ah thillat hiding in a hâl tum ding uh ahi.
6Kichamna ding ah Lalpa kiang ah la thillat ding chu belam hon lak ah kipat a hiding chun, a nu’ hi’n a chal hileh, demna bei hi hen.
7Belam lân ding la hi chun, Lalpa kiang in hun kai inla;
8la thillat luchung ah la khut ngat in. Zia chu kikhopna biakbûk paw lam ah la thâlup ding ahi; tichun, Aron chapa thiampute chun a thisan chu mâichâm a the’ kîmvêl ding uh ahi.
9Chutia, kichamna thillat Lalpa kiang ah mei ah lat ding la hun piak phat leh, a thau zosia, a sungthau hileh, a meibul thau hileh, a gil ah thau um zosia tawh, a sung ah thau um zosia, a bawn in Lalpa kiang ah kithoina dingin la hun piak ding ahi;
10a kãlte ni tawh, a chung ah thau um zosia tawh, a phûkthau zosia chule la khawdaw ah, la pansak ding ahi.
11Chuleh, thiampu’n zia chu mâichâm chung ah hâltum intin; zia chu Lalpa kiang ah mei ah an thillat chu hi’n a.
12La thillat ding chu kêlcha a hiding chun, Lalpa âng ah hun kai in;
13a luchung ah la khut nga’n la, kikhopna biakbûk mai ah chun la thâlup ding ahi; Aron cha thiampute’n a thisan chu mâichâm a the’kîmvêl ding uh ahi.
14Chutia, Lalpa kiang ah mei ah thillat ding ah la piak ding chu: A sung thau zosia, a gil tuam ah thau zosia tawh,
15a kãlte ni ah a thau bek zosia pum ah, a thin tawh, a kãlte ni le la khaw thâk ding ahi.
16Ziate chu thiampu’n mâichâm ah chun mei ah gimtui an thillat hiding in hâltum ta’n a.
Athau zosia chu Lalpa chantum ahi.
17Zia hi khoi gam ah chêngleu chinle, la khang tin ua la bawl zing ding ua dan kisiam chu ahi: Sathau a hem, sa thisan a hem la nêk him him lo ding uh ahi, a tia.
Currently Selected:
THIAMPUTE LEKHABU 3: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.