LUKA 12
12
A Lêm ah Pha Demna
(Mat 10.26-27)
1 #
Mat 16.6; Mar 8.15 Zia nung ah chun mipi sim sên lo ding hial tam tak hung khawm in, a kiphu mên mûn ziang tau ah; a nungzuite kiang ah chun: Pharisaite phatlêmna thawi lak ah chun chingthei un.
2 #
Mar 4.22; Luk 8.17 Puandaw lo ding ah îmgûk bangma a um pua’n, suklat lo ding ah sêlgûkle bangma a um diak puai.
3Thim lak ah la gen uh chule vâk ah ngaithâk hi’ntin, pindan sunggil ah gûk ah mi nakhang ah la genteu chule Inchung vûm ah kikopi hi’n a.
Hangsan tak ah Kiphuang Ding ah Hilna
(Mat 10.28-31)
4Gualte haw, ka hil la hiu, taksa that ah, zia nung ah chu bangma law thei talo chu lau kiu inla;
5la lau ding uh chu ka hun hil masa ahi: A hun thalup nung ah le gawtmun ah hun pai lut thei nalai chu la lau diu ahi.
6Vachong panga paisa ni ah a zuak sek uh hilo a hem? Himaleh, a lak ua pakhat chale Pathian in a hemil kha a hem?
7La samzang zosiau hile sim suak dim diam ahi. Ziaziakchun lau kiu in, vachong tam tak sâng ah lûlzaw ma ma la hiu.
Ngaidam theilo
(Mat 10.32-33; 12.32; 10.19-20)
8Zia hile ka hun hil la hiu: Mite ma ah ei panpi chu, Mihing Chapa hin Pathian vansawlchâkte ma ah panpi ding ahi.
9Himaleh, mite ma ah ei kilepsan chu, Pathian vansawlchâkte ma ah kilepsan ah um ding a hiu.
10 #
Mat 12.32; Mar 3.29 Mihing Chapa demna thu gen tapo chu ngaidam thei hi’ntin; Thagau Thiangto demsia chu vang ngaidam thei hipua’n a.
11 #
Mat 10.19,20; Mar 13.11; Luk 21.14,15 Chuleh, sunagog ah a hun pui ua, thuneite leh vaihawmte ma ah a hun pui phat ua leh le, bang ka gen in, bangti’n ka dawnhu diam ti ngaitua in lungkham kiu in.
12Thagau Thiangtho chun a hun hun in la gen ding uh chu hun hiatsak ding ahi, a tia.
Mihausa Ngol Tekhinthu
13Mipi lak ah kua a hem khat in Jesu kiang in, “Hotupa, ka suapipa go ei hawm dingin ei gen piak in,” a hung tia.
14Ama chun a kiang in, “Lawm, la chung ua vaihawm ding leh thil hawm piak dingin kua’n ei guat ah a hem?” a tia.
15Chuleh, Jesu chun, a kiang un, “Chingthei un! Huaihapna lak ah chun kiveng un! Nei leh lam leh thil hauna mai hi mihing dampi pen ahi puai,” a tia.
16Tichun, a kiang un tekhinthu a gen a: “Mi hausa kua a hem khat in louma suak tam tak a nei in.
17Zia gual hin a hung kingaitua ah, ‘Ka bu leh bâl koikhawmna ding a kiting ta pua’n, bangti’n ka bawl ta dia aw?
18Zia gual hin a ngaitua ta’n, ka bu In hi phetha’ng ka tin, a lianzaw’n sa’ng ka tin; zia tak ah chun ka bu leh bâl leh ka thilte chu koikhawm ing ka tin;
19zia tak chuleh ka thagau kiang in, ka thagau, kum tam tak â dingin la kholdok tai, tun vang chawldam ta’n; ne’n la, dawn inla, nuam tak in um ta’n, ti’ng ka” a ti tai.
20Himaleh, Pathian in a kiang in, “Mi ngolpa! Tu’jan ah hin la hinna la ding a hiu. La thil guanggalte chu kua â ding a hita diam?, a ti’n.
21Mi ama â ding bep ah go khol khawm ah, Pathian lam ah hausa lo chu, zia gual chu hiding a hiu,” a tia.
Lungkham lo Ding ah Hilna
(Mat 6.25-34)
22A nungzuite kiang in, ziaziakchun ka hil la hiu: La hinnau, la nêk diu, la taksau leh sil leh chên ding ngaitua in lungkham kiu in.
23Hinna hi nêk ding sâng in a thupi zaw’n, taksa hile sil leh chên sâng in a lopi zawi.
24Va-akte hi ngaitua tiam un: Thâi a ching ngai puau in, lâkle a lakhawm ngai puau hi; bu In leh bupang le a nei diak puau hi; himaleh, Pathian in a vâk tho hi. La hinnau chu vachate hinna sâng in a lûl zaw na lawm lawm e!
25Aleh, la lak un, nangmau kingaitua hat ziak ah dunglam tong khat kibelap thei la um awm?
26Zia a neupen chu bawn hi’theilo in, bangatia thil dang la lungkham sek awm?
27 #
1 Le 10.4-7; 2 Kh 9.3-6 Lili pâk khan dan hi ngaitua tiam un; na a sêm puau in, patle a khêk ngai puau hi; himaleh, ka hil la hiu, Solomon ngeile a lopina zosia a kivan khan, zia lili pâk pakhat hile a tuk zo puai.
28Hampa, gamlak ah ni khat um ah a jing ah keugawp kit ah, thukkhûk ah pai ziang ding bawn, Pathian in zia gual lawm ah hi a chei chun, aw nanghaw, ginna nei zolote haw, nang uh hi bang gual bep in a hun chei zaw ta diam?
29Ziaziakchun, nêk leh dawn ding mai buaipi kiu inla, lungkham kiu in.
30Zia thilte zosia hi khawvel ah namtin in a hawl ui; himaleh, la Pau chun la mamawu zosia chu a henai.
31Tichun, Pathian gam chu hawl masa leu chin, zia thil zosia chule piak belap in um in lau.
Van ah Go Khol Ding Ahi
(Mat 6.19-21)
32Lawi tawmchate haw, lau kiu in; lenggam hun piak ding hi la Pau kipakna lam tak ahi ngal a.
33La thil neiteu chu zuak un la, gentheite kiang in piau in; Paisa dip lui theilo chu kingaituau inla, guchate’n le a nai theilonau, a nget inle a nêk siat theilona van ah chun khol khawm zaw tau in.
34La go umna taphot un la lungthim uh le um ding ahi ngal a.
Suak Kiging Zing
35 #
Mat 25.1-13
La kawng uh gâk unla, la thaumei uh vâksa’n um un;
36 #
Mar 13.34-36
a pu mo lawm ah chia hung tun kit hun ding helo ah ngâk, a suakpa gual in kiging zing in um un; ama chun a pu a hung ah kotkhak a hun kiu phat leh, hon piak ziang thei dingin a la um sek ahi kha.
37A puu a hung phat ah, kigingsa a la um zing a suakte chu mi hampha ahi nau e! Titakzet in ka hil la hiu, zia gual mi chu a kawnggâk sa’n a um in, an ne dingin a kichutsak in, a hung pawt ah, a nêk leh châk ding bawl in a um sek hi.
38Jankhang ah hung in, phalvak ding kuan ah hung ziang leh le, zia gual ah a hun tuakkhâk a suakte chu a hamphau hi.
39 #
Mat 24.43,44 Zia hi hiau in, Inneipa chun gucha hung ding hun chu a la he masa leh, a la kiging intin, a In chu suksiat sak lo ding ahi.
40Zia gual tak ah chun, nang uh le kiging zing in um un; Mihing Chapa chu la ginchâk lo lai tak un hung ding ahi, a tia.
Suak Ginum leh Ginum lo
(Mat 24.45-51)
41Peter in, “Lalpa, zia tekhinthute hi keimau haw bep a hem lei hil, mi dang zosia le?” a tia.
42Lalpa chun, ahileh, suak ginum leh sepkol ginum, a pu’n a Insung hotu ding ah a guat ding leh, a hun tak ah a nêk ding uh ngaitua tûp piak sek ding chu a kua pen chu ahi diam?
43Suak, a pu’n zia gual ah a la bawl lai tak a hun tuakkhâk chu a hampha ahi.
44Thu dik tak la kiang un ka gen ahi, zia pa ngei chu a nei zosia chung ah thunei pen in hun koi in a.
45Ahi’n, zia suakpa chun a lungthim in, Ka pu chu hung vak pua’n tin, ti hen la; a suak chanpite chu a numei a pawsal in a la jep ta hen la, ne leh dawn in a la kham ta leh;
46zia suakpa pu chu, a kigin lo lai tak leh a ginchak lo lai tak in hung phut ta leh, ama chun sâttel intin, mi ginumlote lak in koi ta’n a.
47A pu lung lam he ma ma ngal ah, ama â ding leh a pu lung lam le bawl ngai diak lo suakpa chu, tam vei tak vok hiding ahi.
48Himaleh, a la helo him him leh, vokna ding tiang bawl a la um chun, awlcha vok hi’n a. Tam tak kipete chun tam tak a piak uh ngai in tin, tam tak kikolsakte kiang ah chun tam tak kiphût ding ahi.
Jesu Chu Inkuan Kikhenna ahi
(Mat 10.34-36)
49Leichung ah mei ko tha ding ah hung ka hi, tu’ ma ma hin kâng ziang ngal leh ka tina lawm lawm e!
50 #
Mar 10.38
Baptisma chan ding ka nei nalai in, zia chu a kichai masia chu ka lung a ki-ipna lawm lawm e!
51Lei ah chamna lensak ding ah hung hiding in lei gingchau em? Ka hil la hiu, hilo hial, kikhenna umsak ding ah hung ka hizawi!
52Tu’kipat hin In khat ah mi panga umna’nle pathum langpan intiu in, panite tawh kilang intiu in, panite chunle pathumte chu langbawl in au;
53 #
Mik 7.6
kilang bawl chiat intiu in:
Pa chun chapa lang intin,
chapa chunle a pa lang intin;
nu chunle a chanu lang intiu in,
chanu chunle a nu lang in au;
mo chunle a talpinu lang intin,
talpi chunle mo chu lang in a, a tia.
Hunbî Tepte’na
(Mat 16.2-3)
54Mipite kiang ah chun thu a hun gen kit a: “Tumlam ah kipat sûm a hung pawt tak leh, ‘Gua hung zu ding ahi’ la ti pai sek un; a hung zu sek ngei hi.
55Simlam hui a hung hân tak leh, ‘Khua hung lum ding ahi tai’ la ti kit un; zia chule a hung dik sek hi.
56Nanghaw miphalêmte haw! Khua leh van umdante hawle la hethiam ui; bangtidan ah hun umdante hi hethei lo la hiu em?” a tia.
Kilanpi Tawh Kilep Ding
(Mat 5.25-26)
57Ahileh, bangatia nangmau â ding ah thil dik chu ngaitua sek lo la hiu em?
58La kilanpi tawh vaihawmte ma ding ding ah la kiton lai un, kilemna ding ngaitua mai un; achutiloleh, vaihawmna la tun ngal ngal ua leh, vaihawmte chun miman hotu kiang ah hun pia’n tin, ama chun suangkul ah hun khum ding ahi.
59Ka hil la hiu, paisa khat tiang ah la piak thian masia hung pawtdok lo hial ding la hi, a tia.
Currently Selected:
LUKA 12: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
