LUKA 13
13
Gitlona Haisan Ding A Hem, Manthai Ding
1Zia hun lai tak chun, Galili gam ah mi khenkhat in, Pilat in a thisan uh tawh a thillat thisan uh a helkhawm thu a hung gen un.
2Jesu’n a dong a, “Aleh, Galili gam ah mite chun zia gual chu a thok ziak un, amau chu Galili gam ah mite zosia lak ah a gilo diak hiding un la gingchau em?
3Hilo hial! Ka hil la hiu, nang unle la gitlo uh la haisan lo ua leh, zia gual ah chun mangthai ding la hiu.
4Aleh, Siloam Insâng chip ah, mi sawm leh giat a dellupte kha, Jerusalem ah chêngte zosia lak ah a gilo diakte hiding un la gingchau em?
5Hilo hial! Ka hil la hiu, nang unle la gitlo uh la haisan lo ua leh, zia gual ah chun mangthai ding la hiu,” a tia.
Theichang Gâ lo Tekhinthu
6Chuleh, zia tekhinthu hi a gen a: “Mi pakhat in grep huan ah theichang kung pakhat a nei in; a ga a hawl leh pakhat chale a mu puai.
7Grep huan kaituapa kiang ah chun, ‘Ngaitia, kum thum hial zia theichang kung ah hin a ga ka vahawl sek in, pakhat chale ka mu ngai puai; phûk mai ta’n, munle a lua hilo a hem?’ a tia.
8Ama chun, ‘He pu, tu kum bêk hi um tadi hen, a kîmvêl lai ing ka tin, leipha vuk tadi ing ka;
9chutia chu, a hung ga leh pha ma ma ding ahi, zia gual ah ka bawl ah le a ga diak lo leh vâng phuk mai in, a ti tai,” a tia.
Sabbath Ni Thilmak A Bawlna
10Ni khat chu sabbath ni’n sunagog ah thu a gen a.
11Ziazaw chun, numei pakhat, kum sawm leh giat thitha mat ziak ah hat lo a um ah, zia nu chu a tingbawng, ding zang theilo ahi’n.
12Jesu’n ama chu a mu phât in a ko ah, a kiang in, “Numei, la hatlona chun a hun thâsuak tai,” a tia;
13a chung ah a khut a ngak phatin a ding zang ngal ta’n, Pathian a chawihoi tai.
14 #
Pdt 20.9,10; Dan 5.13,14 Himaleh, sunagog ah hotu chun, Jesu’n sabbath ni mi a sukdam ziak ah chun, lungna tak in mipi lak in thu a hun gen a, “Mite hin nasepna dingin ni guk sung hun I nei ui; sabbath ni khel khel ah hung lo in, zia hun sung ah chun hung un la hung kihi’dam un,” a tia.
15Lalpa chun, “Nang miphalêm, la lak ua hin kuale sabbath ni, bawng a hem, sabiltung a hem a bûk ah um chu vatham ah tui vadawnsak lo ding la um ua a hem?
16Zia numei hi Abraham chanu ahi’n, Setan in kum sawm leh giat a mat tâk hi, sabbath ni hiziang taleh, zia a kikânna hi thappiak lo ding gual a hia hem?” ti’n a dawnhu a.
17Zia chu a hun gen phatin a langbawl zosia kha a hung zakcha tau a; mipite chunle zia gual ah thil lopi a bawl chu a mu ziak un, a kipak suak kêi tau hi.
Ankam Mu Tekhinthu
(Mat 13.31-32; Mar 4.30-32)
18Zia gual hin thu a gen a, “Pathian gam chu bang gual a hem? Bang tawh ka tekhin diam?
19Ankam mu chu mi pakhat in a la, a huan in a the’ ah; a hung kek a, thing lian tak hung suak gual chu ahi. Tichun, chunglêng vachate chun a bâk ah bu a hung sia sek ui,” a tia.
Thawi Tekhinthu
(Mat 13.33)
20Chuleh, a gen kit a: “Pathian gam chu bang tawh ka tekhin ta diam?
21Thawi tawhbang ahi kit hi: Thawi chu numei khat in a la, changbuang a te’na dim thum lak ah a hel leh, a leng ah a hun jel suak sek gual hi ahi,” a tia.
Kotkhak Neu Chu
(Mat 7.13-14,21-23)
22Jesu chu Jerusalem lam zuan kawm in, khawlian pakhat leh khawneu pakhat haw malam in, thu a gen malam pek a.
23Mi pakhat in, “Lalpa, hukdam hidingte chu tawmcha bep a hiu em?” ti’n a hung dong a. Ama’n a kiang un:
24“Kotkhak neu ah chun lut ham ham un; ka hil la hiu, mi tam tak in lutna ding hun hawl intiu in, himaleh, lut thei pua’n au.
25Inneipa chu a hung kipat tak leh, a kot chu hun khak pai ngal intin, ziaphat chuleh, a pawlam ah kipat in, ‘Lalpa, Lalpa, kot ei hon in’ ti’n kot hun kiu intiu in; himaleh, ama chun, ‘Khoilam mi la hiu em ka hun hekha puai’ a la ti ta’n a.
26Zia tak chuleh nang un, ‘La kiang inle ka neu ah, ka dawn sek un, ka khawlai vêl unle thu la gen sek khalam’ ti’n la tiu in.
27 #
Sam 6.8
Himaleh, ama chun, ‘Ka hil la hiu, khoilam mi la hiu ka he puai; chia mang tau in, nanghaw thil phalo bawlte haw, ei nusia tau in’ hun ti ta’n a.
28 #
Mat 22.13; 25.30 #
Mat 8.11,12 Tichun, Abraham, Isak, Jakob leh jawlneite zosia chu Pathian gam ah chun mu’n la tiu in, nangmau chu pawlam ah um la hiu la kihet tak ua leh, kap leh hagial in um ta’n lau.
29Mi tam tak, sualam, tumlam, mallam leh simlam ah kipat in hung khawm in tiu in, Pathian gam ah chun an hung ne ta’n au.
30 #
Mat 19.30; 20.16; Mar 10.31 A nunung pente le a masa pen ah um ding a um un, a masa pente le a nunung pen ah um ding a um ui,” a tia.
Jerusalem A Sûnna
(Mat 23.37-39)
31Zia hun ma ma’ chun, Pharisaite lawi khat a hung un a kiang in, “Zia kipat hin pawtdok mai in, Herod in hun tha a guai,” a hung tiu a.
32Ama chun a kiang un, “Chiau inla, zia si-al kiang ah chun, a la ngai in, tu’ni hin thitha buak ka nawdok hen, tu’ni leh jing tiang in damlote hi’dam ing ka tin, a ni thum ni leh, bangkim zaw hita’n a;
33banghilehle, tu’ni tawh, jing tawh um nalai ing ka tin, thâi ni tiang in chia jel ding ka hi; jawlnei chu Jerusalem khawpi pawlam in a that ngai puau hi.
34Aw Jerusalem, Jerusalem, jawlneite that ah, la kiang ua hun kisawlte suang ah sep sekte haw! Akpin a note a tha nuai ah a awp khum gual in, la chate tamvei tak awp khum ka nuam in; himaleh, la nuam puai!
35 #
Sam 118.26
En tiam un, la Inteu chu a hawm ah nutsia in a um tai; titakzet in ka hil la hiu, Lalpa min ah hung chu a hampha na e! la ti hun uh a hung tun masangsia, ei mu kit talo ding la hiu,” a tia.
Currently Selected:
LUKA 13: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
