LUKA 14
14
Jesu’n Pawsal Tivûng Pakhat A Sukdamna
1Jesu chu Pharisai hotu khat In ah an ne ding ah a chia lai in, mipite chun a la entha zing ua.
2Zia tak ah chun mi pakhat tivûng ah damlo a kiang in a hung a.
3Ziaphatchun, Jesu’n dan thiamte leh Pharisaite kiang ah chun, “Zia pa hi sabbath ni sukdam a thiang em thiang lo?” ti’n a dong a.
4Himaleh, amau chu a thip bik bek tau a. Ziaphatchun, ama chu a ko ah, a hi’dam ah, a chiasak kit tai.
5 #
Mat 12.11
A kiang un, “La lak un kua a hem in, a cha a hem, a bawng a hem, a sabiltung a hem khat sabbath ni’n kawkhûk sung ah ke’lut taleh, kaidok lo ding kua a hem um?” a tia.
6Zia thu ah chunle kuama’n a dawnhu thei kit ta puau hi.
Umchan Pha leh Mi Bawlphat
7Chuleh, a mi chialteu in chutna pha pha a têl sek uh a mu phât in, a kiang un tekhinthu a gen a:
8 #
Tpl 25.6,7 “Mo lopna ankuang ûm ding ah min a hun chial phat leh, chutna phapen ah chun chu ziang kin; achutiloleh, nang sâng ah ja um zaw a la chial khan tiu in, a chialpa chun:
9‘Zia pa chutna ding hi awt in’ hun ti leh nang chu zakcha tak in chutna tawp pen ah chun kichu kha’n la.
10A hun chial phat ua leh, chutna niam pen ah chun vakichu zaw ta’n; tichun, a chialpa chu a hung tak leh la kiang in, ‘Lawm, chutna pha deu ah sawn vakichu’n’ hun ti zaw’n a. Chutileh, la ankuang ûmpite mit mu ah chun jana chang inla.
11 #
Mat 23.12; Luk 18.14 Ama kingaisangte chu suktawm in um intiu in; ama kingaitawmte chu vang choisa’n in um in au,” a tia.
12Chuleh, a chialpa kiang ah chunle, “Sûn a hem, jan a hem ah gualvâkna la siam tak leh, la gualte, la suapite, la chanaute leh la Invêng ah mihausate chu ko kin; achutiloleh, amau haw chun hun ko thuk kit pai intiu in, din zo kit kha’n au.
13Gual la vâk tak leh, mi gentheite, mi piansualte, kengbâite leh mitthûmte chu chial zaw ta’n.
14Ziate chun ditna ding a nei lo ding ziak un a hampha hiding la hi; midikte thawkit tak leh dit kit ah um ding la hi,” a tia.
Gualvâkna Thupi Tekhinthu
(Mat 22.1-10)
15A ankuang ûmpi kua a hem khat in zia thute chu a la het in, a kiang in, “Pathian gam ah an ne dingte chu a hampha nau e!” a tia.
16Jesu’n a kiang un, “Mi pakhat in nitâk luaithe’na thupi tak a bawl ûm dingin mi tam tak a chial a.
17An nêk hun ahiphatin: ‘Hung tau in; bangkim siam zaw ahi tai’ ti ah a mi chialte ko dingin a suakpa a sawl a.
18Himaleh, a mi chialte zosia chu a la kihotuak in suanlam a bawl chiat tau a. A masa pen chun, ‘Gam neukhat ka chaw hen, ka va-et a ngai hi, ei la ngaithiam dingin ka hun don hi’ a ti’n.
19Midang khat chun, ‘Bawngchal tuak nga ka la chaw hen, a enchian ah vachia ding ka hi, ei la ngaithiam dingin ka hun don hi’ a ti kit in.
20Midang khat chun, ‘Ji ka nei in, ka hung thei ta puai’ a la ti kit a.
21Suakpa chun a pu kiang in zia thute chu a vagen a. In neipa chu a lungna ta’n, a suakpa kiang ah chun, ‘Chia kin-gang inla, kotzing leh khawpi sung gawlchiak kâlte’n chia inla, gentheite, piangsualte, mitthûmte leh kengbaite hun pui lût in’ a ti tai.
22Ahi’n, suakpa chun, ‘He pu, la thu ei piak gual ah khan ka hita hen, ahi ziakin mun a awng nalai hi’ a tia.
23A pu chun, a suakpa kiang ah chun, ‘Chia inla, lamlian leh dai kiang vêl ah le mi la mu mu hun ko khawm in, ka In ah mi a dim theina ding un.
24Ka hil la hi, ka mi chialte pakhat chânle ka gualvâkna an ne pua’n au, a ti tai,” a tia.
Nungzui Hi’na ding Dan
(Mat 10.37-38)
25Mipi tam tak tawh a kiton lai un, ama chu a hung kihei ah, a kiang un:
26 #
Mat 10.37
Kuale, a pate, a nute, a jite, a chate, a suapite, a suapinute leh ama hinna natiangle haw diak lo chu ka nungzui hithei pua’n au.
27 #
Mat 10.38; 16.24; Mar 8.34; Luk 9.23 Kuale ama kros kiput ah ei zui lo chu ka nungzui hithei pua’n au.
28Nanghaw lak ah kua’nle Insâng sak gaw leu chin, sak zawna ding khop sum la nei leh neilo uh he dingin, chutmun ah a man ding jat sût masa lo ding kua a hem um?
29Achutiloleh, dân leh a In suangphûm lem zo zet in, zo zo lo in hung um taleh, mi a hung mu zosia’n nuisan intiu in,
30Zia pa hin a Insak a pan zet ah, sak la a sa zo ta pua’n, ti’n au.
31Ahiloleh, leng pakhat chu leng dang do dingin kisa hen la, mi sîng ni tawh hung kuan ding chu, ama’n sîng khat tawh a la do zo ding a hileh hilo, kichu zet in ngaitua masa lo ding a hem?
32Chuti a hilo vânglak leh, leng dang chu gamla tak ah a um lai in, kichamna thu gen dingin palai sawl in a.
33Zia gual ma chun, kuale a nei zosia nusia ngam lo chu ka nungzui hitheilo ding ahi.
Chi Tekhinthu
(Mat 5.13; Mar 9.50)
34Chi hi a phai, a hinla, chi le a dau tak leh bangin hi al kit thei ding a hem?
35Leiphatna dinginle panna nei ta pua’n tin, êknin dinginle panna nei ta pua’n ah; tichun, min a paimang ta sek ui. Kuale nakhang nei chun he tau hen, a tia.
Currently Selected:
LUKA 14: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
