LUKA 17
17
Jesu Thugen Khenkhatte
(Mat 18.6-7,21-22; Mar 9.42)
1Jesu’n a nungzuite kiang in, “Pûksanna hi a umlo thei ahi puai; himaleh, pukna umsakte chung a gik hi.
2Kuale zia a neupente lak ah pakhatle pûksak chu, a ngawng in sumhêk suang ki-awsak hen la, tuisuagiat ah kisep lut leh, zia chu ama â dingin phazaw’n a.
3 #
Mat 18.15
Chingthei ta un, la suapipa’n la chung ah thil a hi’khial chun, zilgai in la; a haisan leh ngaidam ngal in.
4Mi pakhat in ni khat sung in la chung in sagivei hi’khial leh le, sagi vei ma nangma lam a hun ngat kit a, ‘Ka hai veng veng tai’ a ti leh la ngaidam ding ahi,” a tia.
5Ziaphatchun, sawlchâkte chun, “Ka ginnau ei hi’hat piak in,” a hung tiu a.
6Lalpa chun, a kiang un, “Ankam mu tawhbang ginna la nei phot ua leh, zia thingtheimi kung kiang ah hinle, ‘La zung pum in kibotdok inla, tuisuagiat sung ah vakiphu in’ tileuchin, la thuu mang ding ahi,” a tia.
7Chuleh, “La lak ua mi pakhat in la suakteu chu lou kai ding a hem, ganching ding a hem in mang leu chin, a hung tun si’n leh, ‘Hung inla, la an hung kinêk in’ kua a hem a la ti sek ding?
8Zia chu timalak sâng in, ‘Ka nêk ding ei bawl piak inla, puan chêng inla, ka nêk ka dawn zaw masia ei zen in, ziazaw chuleh ne’n la dawn na’n la’ kua a hem tilo ding?
9A suak in a thupiakte pha tak ah a bawl sek ziak ah, a kiang ah kipak thu kua’n a gen ngai em?
10Zia gual ma chun, nanghaw’nle la kiang ua thupiak zosia gual ah la bawl nung un, ‘Suak phachuam lo I hiu, I sep uh hi I sep ding him uh ahi’ ti sek un,” a tia.
Phâk Sawm A Sukdamna
11Jesu chu Jerusalem lam zuan ah a chia lai in, Samaria gam leh Galili gam a haw malam a.
12Khua pakhat ah a lutna chun, phâk sawm hial in a la lamtuau a, gamla tak ah kipat in a hung kiko un:
13“Hotupa Jesu, ka chung un jangai in,” a hun tiu a.
14 #
Thp 14.1-32
Amau chu a vak mu phât in, “Chiau inla, thiampute vaki-etsak un,” a hun tia. A chia zing lai un a hung thiangtho tau a.
15A lak ua pakhat chun a hung dam tai ti, a kihiat phatin, a hung kile’kit ah, aw ngai tak in Pathian a hun chawihoi tai.
16Jesu kengbul in a hung bokkhup ah, kipak thu a hung gen tai; ama chu Samaria mi ahi.
17Jesu’n a kiang in, “Mi sawm kha la thiang tau hilo a hem? Pakuate kha khoilam tung zo a hitau em?
18Zia gam chuam mi longal hi, Pathian chawihoi ding ah hung kit a um puau hi,” a tia.
19Chuleh, zia pa kiang ah chun, “Tho inla, chia ta’n, la ginna chu la dampi ahi,” a tia.
Pathian Gam Hungtung Ding Chu
(Mat 24.23-28,37-41)
20Khatvei chu Pharisaite’n Jesu kiang in, Pathian gam hung tun ding dan a hung dong ua; ama chun a kiang un, “Pathian gam chu muthei dingin hung tung pua’n a.
21‘Entia, zia tak ah hin’ a hem, ‘En un, zia tak ah sawn’ ti ziang thei hipua’n a; ngai un, Pathian gam chu la lak un a um hi,” a tia.
22Chuleh, a nungzuite kiang in, “Mihing Chapa dam lai ni’te hi ni khat bêk la ngai vung vung hun uh hung um intin, ahi’n la, mu ta pua’n lau.
23Zia hun tak chuleh, ‘En un, zia lam ah hin’ a hem, ‘En un, zia lam ah sawn’ ti leule taksang kiu in; delle del kiu inla, zuile zui diak kiu in.
24Kawl a hung phiat ah, van nuai langkhat lam ah kipat langkhat lam a hung tun ziang gual hin, Mihing Chapa hung ni leh zia gual chu hung hiding ahi.
25Himaleh, thil tam tak hun thuak masa phot intin, tu’lai khangthakte doi lo in hung um in a.
26 #
Thl 6.5-8
Noah hun lai gual ah khan, Mihing Chapa hung ni phat leh le hung um ding ahi.
27 #
Thl 7.6-24
Noah kuang ah a lut ah, tui a hung lêt ah, a leng ua a thi’gam niu kha a tun masang sia, a ne’n a dawn ua, ji leh pawsal in a kinei ua.
28 #
Thl 18.20—19.25
Zia gual ma chun, Lot hun lai ah khanle a neu in a dawn ua, a chawu in a zuak un, a phuu in a sau a;
29himaleh, Lot in Sodom khua a pawtsan phat ah khan, van ah kipat in mei leh kât a hung zu’n, a leng un a thigam tau hi.
30Mihing Chapa a hung kit ni phat leh le zia gual chu hiding ahi.
31 #
Mat 24.17,18; Mar 13.15,16 Zia ni phat chuleh, Inchung ah um chun In sung ah a thuamphua umte la dingin vakum ki’hen; lou ah umte’n le In lam ah hung vaikit ding gaw kiu hen.
32 #
Thl 19.26
Lot ji hezing un.
33 #
Mat 10.39; 16.25; Mar 8.35; Luk 9.24; Joh 12.25 Kuale a hinna humbitna hawl chun chân intin; kuale a hinna chân chun humbit zaw’n a.
34Ka hil la hiu, jan lai ah lupna pakhat ah mi pani lumte le, pakhat lak in um intin, pakhat nutsia hi’n a.
35Numei pani busukhawm lai le, pakhat lâk in um intin, pakhat nutsia hi’n a.
36Lou ah mi pani um le, pakhat lâkin um intin, pakhat nutsia hi’n a,” a tia.#17.36 zia chang hi I text un a um puai
37Ziazaw chun, amau chun a kiang in, “Lalpa, zia chu khoilam ahi diam?” ti’n a dong un. Ama chun, “Sapûl luang umna taphot ah chun mulukolte le um khawm in au,” a tia.
Currently Selected:
LUKA 17: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
