LUKA 18
18
Meithâinu leh Vaihawm Diklopa Tekhinthu
1Chun, lungke lo hial ah pauchap ding ahi dan hilna dingin, zia tekhinthu hi a gen a:
2“Khawpi pakhat ah hin vaihawm pakhat, Pathian le lau lo, mihingle bangma ngai lo a um a.
3Chuleh, zia khawpi sung ma chun meithâi pakhat, vaihawmpa kiang ah hung in, ‘Ka mêlmapa chung ah phuba ei lâkpiak in’ a hung ti sek a.
4A lim ah chun a nuam ziang pua’n; himaleh, a vainung ah chun a hung kingaitua leh, ‘Pathian lau lo in, mihingle bangma’n ngai lo lengle,
5zia meithâinu hin ei subuai zing in, a phuba hi lâkpiak mai ing ka; achutiloleh, hung kit kit intin, ei hung subuai zing ding ahi’ a ti ta’n.
6Tichun, Lalpa chun, ‘Zia vaihawmpa thugen hi ngaituau in.
7Pathian chun, a mi têlte sun leh jan ah ama kiang ah thûm leh mau ah umte chu, phuba lâkpiak lo in jaidaw zing ding a hem?’ a tia.
8Ka hil la hiu, a kin thei pen in phuba chu lâkpiak in a. Banghileh le, Mihing Chapa a hung kit phat leh lei ah hin mi ginum a hun mu’na diam?” a tia.
Pharisai leh Sedawlpa Tekhinthu
9Jesu’n, midik tak ah kingai, mi dang zosia bangma simcha lo kuate a hem kiang in zia tekhinthu hi a gen a.
10“Mi pani Tempul ah pauchap dingin a chiau in; pakhat chu Pharisai ahi’n, pakhat chu sedawl mi ahi.
11Pharisai pa chu a hung ding ah, ama chang in zia gual hin a hung pauchap a: ‘Pathian, keima hi mi dang gual ah negu, diktat lo leh ângkawm ka hilo ziakin leh, zia sedawlpa gual hile ka hilo ziakin la chung in ka kipak hi.
12Hapta khat sung in nivei an ka ngawl in, ka nei tapo sawm ah khat ka pesek hi’ a ti’n.
13Sedawlpa chu vang gamla tak in a ding ah, van lam le dak ngam lo ah a awm chûm kawm kawm in, ‘Pathian, kei migilo ka hi, ka chung ah jangai in’ a tia.
14 #
Mat 23.12; Luk 14.11 Ka hil la hiu, a masa pa sâng in zia pa chu thiamchang ah um in a In lam in a chia suk tai. Ama kichawisâng tapo sukniam hi’n tiu in, kingainiamte chu choisa’n in um in au,” a tia.
Jesu’n Naupangte A Maljawl
(Mat 19.13-15; Mar 10.13-16)
15A kiang ah chapangte chu a khoi dingin a hun pui un; himaleh, a nungzuite’n a la mu phât un a la vau un.
16Himaleh, Jesu’n a kiang in a ko a, “Zia chapangte kha ka kiang ah a hung diu zada kiu inla, hun puisak un; Pathian gam chu zia gual mite â ding chu ahi.
17Titakzet in ka hil la hiu, kuale zia chapangte’n Pathian gam a lop gual ua lawp lo tapo chu, a sung ah lut lo hial ding a hiu,” a tia.
Mi Hausa leh Pathian Gam
(Mat 19.16-30; Mar 10.17-31)
18Zia tak ah chun vaihawm mi pakhat in thil khat a hung dong a, “Hotupa pha, kumtuang hinna ka neitheina dingin bang ka bawl diam?” a hung tia.
19Jesu’n a kiang in, “Bangatia, pha ei ti la hem? Pathian ti’lo ngal chu kuama a pha a um puai.
20 #
Pdt 20.14; Dan 5.18; Pdt 20.13; Dan 5.17; Pdt 20.15; Dan 5.19; Pdt 20.16; Dan 5.20; Pdt 20.12; Dan 5.16 Thupiakte kha la hia’i, ‘Ângkawm kin’ ‘Tualthat kin,’ ‘Gucha kin,’ ‘Hetpitu dik lo in pang kin,’ ti leh, ‘La nu leh pa ja in,’ tite hi,” a tia.
21Ama chun, “Ziate haw chu ka naupan lai ah kipat ka la zop zaw ahi tai,” a tia.
22Jesu’n zia a thugente chu a het phat in a kiang in, “Aleh, thil pakhat in la vât nalai hi; la nei zosia zuak in la migentheite kiang in vapia’n, chuti leh van ah go nei in la; chuleh, hung in la, ei zui in,” a tia.
23Ama chu mihausa tak ahi ziakin, zia thu chu a het phat in, a lungkham tai.
24Jesu’n ama chu a en a, “Mi hausate Pathian gam a lut diu a haksa na e!
25Mihausa Pathian gam a lut sâng in, sangawngsau pinbil hawm ah a lûtthen a bailam zawi,” a tia.
26Zia a thugen a la hete chun, “Aleh, kua hukdam hithei ding a hem?” a tiu a.
27Ama chun a kiang un, “Mihing â ding ah hitheilo chule, Pathian in a hithei sik sek hi,” a tia.
28Tichun, Peter in, “Ngaitia, kei uh hin bangkim nusia in ka hun zui un,” a tia.
29Ama chun, a kiang un, “Titakzet in ka hil la hiu, Pathian gam ziak ah, a In a hem, a nu leh pa a hem, a suapite a hem, a ji a hem, a chate a hem nusiate chu,
30tu’hun ma ma leh a hung tung ding kumtuang hinnale, ale’ tam tak mulo ding kuama a um puau hi,” a tia.
Jesu’n A Thina Ding A Genlawk Thumveina
(Mat 20.17-19; Mar 10.32-34)
31Sawm leh nite chu a pui chuam ah, a kiang un, “Ngai tiam un, Jerusalem lam ah chia to ding I hiu a, jawlneite’n Mihing Chapa chung thu a la genlawk zosiau kha hung guitung ding ahi.
32Jentelte khut ah piakdaw in um in tin, tawtbawl na’n mang intiu in, musit tak in engbawl intiu in, a chil uh sekkhum in au.
33Ama chu jep intiu in, hun that in au; himaleh, a ni thum ni leh hung thokit ding ahi,” a tia.
34Amau ah zia thute chu a kisêl nâk lai ziakin, a ngaina a hepuau ah; a gente chu a hethiam thei him him puau hi.
Bartimai Mit A Sukdamna
(Mat 20.29-34; Mar 10.46-52)
35Jeriko khua a hung tun ding kuan un, mitthûm pakhat, khutdaw in lam pâm ah a la um a;
36mipi hung thawmgi chu a het in, bang thu a hem ti a dong a.
37Amau chun, “Nazareth Jesu chia ahi,” ti’n a hil un.
38Ziaphatchun, a hung kiko ah, “Jesu, David Chapa, ei lungsiat in,” a hun tia.
39A malam ah chiate chun thip dingin a vau un; himaleh, ama chu a kiko ngai zaw diak a, “David Chapa, ei lungsiat in,” a ti kit a.
40Ziaphatchun, Jesu chu a hung ding ah, ama chu a kiang ah hun pui dingin thu a pia; a kiang a hung tun phat chun,
41“Bang hun hi’piak leng la nuam em?” ti’n a dong a. Ama chun, “Lalpa, muthei ka nuam hi,” a tia.
42Ziaphat chun Jesu’n, “Khua hun muthei ta’n, la ginna hi la dampi ahi,” a tia.
43Thakhat in khua a hun muthei ta’n, ama chu a hun zui a; Pathian a chawihoi a; mipi zosia chun zia chu a muu a, Pathian a chawihoi chiat tau hi.
Currently Selected:
LUKA 18: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
