YUNIRÜBO RHIMO 1
1
1 #
Lk 1.1-4
Amuzho Theophila: Inü akhuhbe hüm ching thrütkhi ju Jisunü arhimopü tüsho thsangyupü tankihkhi alala dünkheak, 2Amüsüh Me hode apinü amokhitkhi amüsühthsangyurübo kilim thiyukhümbo jihkhi dunglim, api bede yükihkhi nimung khiungde alakheah. 3Api thsünü dunglim, api rhangdung lakheah de harü ki huh tüsho mütsandakkhi ahihdo jih. Apinü arü ki nimung yirü dükeak akhiuka huh tüsho Thrünpuh kiulongthsü dünkheak asuk. 4#Lk 24.49Tüsho küyimki arü mukhungkhea, apinü arü ki thiyukhüm jih: “Jirusalem bahbah dütso, tüshe inü nüsa ki thakhi I Buhnü alokhikhi thsambah thsungkheak aleangang. 5#Mt 3.11; Mk 1.8; Lk 3.16; Jhn 1.33Johannü kenü bapti, tüshe nimung anükhüh labah Amüsüh Menü nüsa baptibah.”
Yinmi lim Jisu Bekihkhi
6Jumonü küyimki arü mukhungkhea, arünü api ki keokhi, “Atungpuh, nünü ha kim ching Israel kilim kiulongthsü jihloba de?” 7Tüsho apinü arü ki tha, “Abuhnü thiyukhüm-sühmüh ching zokhi nüsa thsungkheak kimbo yungsho akheahmünchi mükheahpü yung. 8#Mt 28.19; Mk 16.15; Lk 24.47,48Tüshe küyimki Amüsüh Me nüsa kheak arübanü nüsanü wu leangkhibah; tüsho nüsabo ju Jirusalem, Judea tüsho Samaria alala ching, tüsho alomi akheam khiungde I thsungkheak thiyumütsanbo labah.” 9#Mk 16.19; Lk 24.50,51Kheakü küyimki apinü harü thakhea, arünü kheahde alachoki api bekih, tüsho arü mük kinü api ju amonü liudoabah. 10Tüsho arünü api thüning lim yükihkhi kheahmüripde alachoki, mihtsürü mahne amüye yihbah zhipde ngü, 11tüsho tha, “Galilee mihtsürübo, tümüde nüsanü thüning lim kheahde zhipla? Shepü nüsa mikinü thüning lim bekihkheanü, nüsanü Jisu yinmi ching yüde angükhi nangde, api junangde arübah.”
Juda Müthribuh
12Judüki arünü kiuto chingnü mail 1 bande alakhi Oliv Müzüng chingnü Jirusalem lim alode arü. 13#Mt 10.2-4; Mk 3.16-19; Lk 6.14-16Tüsho küyimki arü yüzahkheanü, arünü arü binkhi achangbe khiungshak ching yükih: Peter, Jakob, Johan, Andria, Philip, Thoma, Bartholoma, Mathi, Alphia tsührü Jakob, Zealot de ajikhi Simon tüsho Jakob tsührü Juda. 14Arü alala rukhühnü aliberübo le Jisu abe Mari tüsho api keoniorübo lung tamkhüntamnüpü mutukzhakde mukhungde la.
15Nimung anükhüh dunglim akinrübo 120 bande küdang la, tüsho Peternü thiyu thapü wusu, 16tüsho tha, “I keoniorübo, David hode Amüsüh Menü, Jisu rampü limbebuh kamkhi Juda dünkheak thakhi amüsühyu dünjipü lakheah; 17tümüde api isa bolung kheyuk tüsho ha tankihpü shihcham ching lakheah.”
18 #
Mt 27.3-8
(Judanü amütsü thsüde amulokhi shonü thulu khülang thulo, ju ching api she; abuk jukphukbah bukning alala akhiuk. 19Tüsho ju Jirusalem ching larü alalanü mükheahde kam; jumonü arü yutha chingnü ju lu ki Akeldama de ji, amütsan “Thiyih Lu.”)
20Tümüde Mungshikhün ching ha thrüta lah:
“ ‘Api lapung zhikrangkhündo kamshang,
tüsho ju ching she dülashih,
püpürünü api rhimoyam lushang.’
21 #
Mt 3.16; Mk 1.9; Lk 3.21; Mk 16.19; Lk 24.51 Jumonü Atungpuh Jisu isa lung yüla arüla de alachoki isa lung berü, 22Johannü baptikhi chingnü tankihbah isa bolungnü api bede ayükih khiungde, harü bolung khülang api arhang kamlokhi thiyumütsan thsürü kambeah.” 23Tüsho arünü mahne moa jih: Barsaba de ajikhi Josep (Justa düshe ji) tüsho Mathia. 24Tüsho arünü tamkhüntamnü, “O Atungpuh, shepünü alala mulong mükheahla, hane bolung nünü shepü mokhitdünü huhang, 25Judanü thsümünimbah nihbuh dangpung ching tsokhi, amüsüh-thsangyuthsangra rhimo shihcham lupü.” 26Arünü azan thsü, tüsho azan ju Mathia kheak akhiuk. Tüsho api ju amüsühthsangyurü thürükheak khülang lung kheyuk.
Currently Selected:
YUNIRÜBO RHIMO 1: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
