YUNIRÜBO RHIMO 2
2
Amüsüh Me Arükhi
1Küyimki thünimni-thünio nimung khiungkhea, arü alalanü rukhüh dangpung khülang ching mukhung. 2Tüsho zukleangnü yinmi chingnü düsheak khülang, apung müküpde ayünkhi nangde arü, tüsho arü binde alakhi thüyam alala mide kam. 3Judüki arünü mo nangde thiyutha chamnakkhibo ngü, tüsho arü aban kheak yükih. 4Tüsho arü alala Amüsüh Menü mide kam tüsho Menü athakhukshihkhinü püpürü yutha chingnü athapü tankih.
5Judüki thüning bukkhüp trükshih aban chingnü, shuhmülanga jihrü Jihudarü Jirusalem ching lakheah. 6Küyimki ha düsheak akhiukkheanü boto ju rukhüh mukhung tüsho yingyingde kam, tüsho arünü nihbuh yutha chingnü athakhi mihbüm abannü so. 7Judüki arü alala rukhühnü müyinsahde khülangnü khülang ki tha, “Kheahang, harü alalanü Galileerü yu thachoh yung de? 8Tüsho mihbüm abannü isa zübekhi yutha chingnü thade isanü asokhi ha küde? 9Parthiarü, Midiarü, Elamrü; Mesopotamia, Judea, Kappadokia, Pontus tüsho Asia, 10Phrygia le Pamphylia, Ijip tüsho Serene thüninde Libya ching larü; Rom chingnü rhuakheahrü 11Jihudarü le khiungkerü chido Judearü kamabah, tüsho Kreterü le Arabrü–amüyinsahbe Thrünpuh rhimo thsüde arünü isa yutha chingnü athakhi isanü so.” 12Jumonü arü alala müyinsah tüsho shangmangde kambah khülangnü khülang ki tha, “Ha amütsan tümü laba?” 13Püpürünü keangrümünede tha, “Arübo yukhunü müshanga lah.”
Peternü Thsangyukhi
14Tüshe Peternü thürükheak khülang lung zhipbah düsheak achangnü arü ki tha, “Juda mihtsürübo tüsho Jirusalem ching larü alala, nüsanü ha mükheahang, tüsho I yubo aniang. 15Tümüde harü mihtsürübo mümüshang, tümütüsho kheakü lang yapsu 9 kingchoh; 16tüshe Joel wukihrünü athakhi ha lah:
17‘Tüsho akheam nimungbo ching ha labah, Thrünpuhnü khipkhitchoh,
junangde inü mihtsürü alala kheak I me dungkihjihbah,
tüsho nüsa tsührübo le tsührübebonü müchitbah,
nüsa tsührü athunurübonü michihbo ngübah,
tüsho ashinbuhrübonü milimbo mibah;
18am, inü judüki I yamlarübo le yamlaberübo kheak I me dungkihjihbah tüsho arünü müchitbah.
19Tüsho inü akulim thüning ching khinthiyinbebo tüsho abolim alomi kheak amütsanbo,
thiyih, mo, tüsho mokhüh liude ahuhbah;
20Atungpuh nimung ato tüsho müretah arüpü müngüh,
ani ju mitingdo akambah tüsho khinu ju thiyih nangde akambah.
21Tüsho shepünü Atungpuh mung jibanü akhümkhitbah.’
22“Israel mihtsürübo, harü yubo aniang: Nazarethrü Jisu ju khinthiyinbebo, amüyinsahbebo tüsho amütsanbo hode Thrünpuhnü nüsa kilim jih, ju nüsa küdah thsüde mükheahlah. 23#Mt 27.35; Mk 15.24; Lk 23.33; Jhn 19.18Thrünpuhnü ha mihtsürü ju lümkhi lade tüsho mükheahjungde nüsa kilim jih; tüsho nüsanü mihbukmuyuk arung hode api sangkim kheak yümkihde sheshih. 24#Mt 28.5,6; Mk 16.6; Lk 24.5Tüshe Thrünpuhnü ashe thsünü dükheakshihde api arhang kamshih, tümütüsho ashenü api tholopü mukukde alakheah. 25Tümüde api dünkheak Davidnü tha,
‘Inü Kamruhroro I miki Atungpuh ngü,
tümüde maphappü thsüde api I khah tsülim lah;
26jumonü I mulong asühde la, tüsho I mulonü asühachih;
kheaküshe I pang mulonglamkhi ching labah.
27Tümüde nünü I me Ashe-lomi ching mübahyuk,
yungsho nü yo amüsühbuhnü athsümünim müngüshih.
28Nünü I kilim rhangdung limro mükheahshih;
nünü nü bede asühkhinü I mide akamshihbah.’
29“Keoniorübo, isa jipürü David shebah kiuyuka bahdo de inü nüsa ki mulong tode thakhuklah, tüsho api kiuyuk khihni khiungde isa lung lah. 30Jumonü wukihrü thsümonü, tüsho api kiulongthsü-binkiu kheak anihbuh tsühsoniuso bolungnü khülang binshihpü Thrünpuhnü api ki thiyuchihchimkhi mükheahde, 31apinü ngüjung tüsho Khrista arhang kamlokhi dünkheak tha, junangde Ashe-lomi ching api mübahyuk, yungsho api pangnü athsümünim müngü. 32Haju Jisu, Thrünpuhnü arhang kamloshih, tüsho ju dünkheak isa alala thiyumütsanbo ah. 33Jumonü Thrünpuh khah tsülim shuhkihjihde, tüsho Amüsüh Menü alokhikhi Abuh kilimnü leangkhide, nüsanü angükhi tüsho asokhi ha apinü nüsa kheak dungkihjih. 34Tümüde David a yinmibo lim müyükih; tüshe apinü aküdah thsüde tha,
‘Atungpuhnü I Tungpuh ki tha,
I khah tsülim binang,
35inü nü riribo nü jing-jungpung mükamshihyi khiungde.’
36“Jumonü nüsanü ayümkihbuh Jisu ha, Thrünpuhnü api Atungpuh tüsho Khrista kamshihkheah de Israel yamkhün alalanü mütsande mükheahshang.”
37Küyimki arünü ha sokheanü arü küpkhukde kam, tüsho Peter le aningkhi amüsüh-thsangyurübo ki tha, “Keoniorübo, isanü küde athsüba?” 38Tüsho Peternü arü ki tha, “Nüsa mihbüm abannü nüsa neak bahpü thsungkheak Jisu Khrista mung chingnü mulong müthriang tüsho baptiang; tüsho nüsanü Amüsüh Me thsambah leangkhibah. 39Tümüde alokhikhi ju nüsa le nüsa tsührübo tüsho limshu ching larü, Atungpuh isa Thrünpuhnü ajirü aban kilim lah.” 40Tüsho apinü püpü yubo thiyumütsan thsüde tüsho mulong tuthsukde arü ki tha, “Ha mihbukmuyuk lün chingnü nüsabo khümkhitang.” 41Junangde sherünü api yu leangkhikheanü bapti, tüsho ju nimung mihtsürü 3000 bande kheyuk. 42Tüsho arünü amüsühthsangyurübonü thsangyukhi le arihmukhung, yikhap yihnakkhi tüsho tamkhüntamnü ching mulong jih.
Akinrübo Rukhüh Lakhi
43Mihtsürü aban kheak atrepü arü; tüsho amüsüh-thsangyurübo hode khinthiyinbebo le amüyinsahbebo ahihdo rhimo. 44#Yunir 4.32-35Akinrü alala rukhüh mukhung tüsho kukruk alala rukhüh yo lakheah; 45tüsho arünü arü lakhitbo le kukrukbo yinbah khürü yihnüpü lakhi yande arü alala kilim chama jih. 46Tüsho nimung aban arüngyam ching rukhüh mukhungde tüsho arü yambo ching yikhap yihnakde, arünü mulong asühde tsühyungbe tsüh, 47Thrünpuh shijihde mihtsürü alala ki asühachih. Tüsho Atungpuhnü khümkhita larübo arü wühkhe ching kheyuk.
Currently Selected:
YUNIRÜBO RHIMO 2: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
