YUNIRÜBO RHIMO 11
11
Jirusalem ching Peter Yusheak
1Kheakü Judea ching lakhi amüsüh-thsangyurübo tüsho keoniorübonü khiungkerü she Thrünpuh yu leangkhido de so. 2Jumonü küyimki Peter Jirusalem lim wutukhea, tsütabahrübonü api amülim jihde tha, 3“Tümü thsükhi nünü tsütamübahkhi mihtsürübo kilim yübah arü lung yimtsühkhea?” 4Tüshe Peternü akhinashunü arü ki thanaka huhpü tankih: 5“I a Joppa kiuto ching tamkhüntamnüde alakheah; tüsho michih khülang ching tümüanü pheak nangde thüning limnü amünkheam phüyi kheaknü akishihde inü ngü; tüsho I ki aki. 6Ju thüninde kheahshe ajing phüyi kihkhi shiwühbo le shihtsühbe shiwühbo, keakninphuru tüsho thüning wuhnubo inü ngü. 7Tüsho I ki thakhi düsheak inü so, ‘Asürang, Peter; laksahang tüsho tsühang.’ 8Tüshe inü tha, ‘Yung, Atungpuh; tümü she amünean yungsho amümüsüh küyimkishe I mün ching müyüzahakheah.’ 9Tüshe yinmi chingnü mahne kipü düsheaknü alo, ‘Thrünpuhnü tümü müsühdünü nünü amünean de müjibeah.’ 10Ha mahsam kipü dünji, tüsho alala thüning lim thokihloa lu. 11Ju kim ching Kaesarea chingnü I kilim arüshihkhi mihtsürü 3 I lapung thüyam limkhuh zhip. 12Judüki mudukiuhlode arü lung yüpü Menü I ki tha, junangde harü keoniorü 6nü I atrude arü, tüsho isanü mihtsürü yam ching ju yüzah. 13Tüsho künangde api yam ching yunirü zhipbah thade angükheanü apinü isa ki tha, ‘Joppa lim yüshang tüsho Peter de ajikhi Simon bedarang; 14apinü nü, tüsho nü yamkhün alala khümkhitpü yusheak nü ki thabah.’ 15Inü thiyu thapü tankihchoki, atan isa kheak nangde Amüsüh Me arü kheak yükih. 16#Yunir 1.5Tüsho Atungpuhnü athakhi yu inü lümkhit, ‘Johannü nüsa kenü baptijih, tüshe Amüsüh Menü nüsa baptibah.’ 17Jumonü isanü Atungpuh Jisu Khrista kinchoki isa kilim jihkhi thsambah Thrünpuhnü arü kilim jih-a lasho, Thrünpuh yanlokhukpü thsüde I she lakhea?” 18Küyimki arünü ha sokheanü zhikde kamabah. Tüsho arünü Thrünpuh müretahde tha, “Judüasho khiungkerü kilim she Thrünpuhnü rhangdung lapü mulong müthrishihpü mülüjih-a lah.”
Antiok ching Borü
19 #
Yunir 8.1-4
Kheakü Stephen laksahkhinü thsümüchi lakhi hode amüzütrübonü Phoenikia, Saipra tüsho Antiok khiungde Jihudarü ki lang thiyusheak thade yü. 20Tüshe arü khürü, Saipra tüsho Serene mihtsürü Antiok ching arünü Atungpuh Jisu dünkheak Greekrü ki she thsangyuthsangra. 21Atungpuh wu arü kheak lakheah, tüsho akinrü ahihkhüh Atungpuh kilim rholo. 22Ha yusheak Jirusalem borü ching arü tüsho arünü Barnaba Antiok ching yüshih. 23Küyimki api arübah Thrünpuh amüthsüm ngükheanü, apinü asüh; tüsho apinü arü alala ki mulong düküngde Atungpuh kheak akin lapü mulong tuthsuk; 24tümüde api ju Amüsüh Me tüsho akinnü mide alakhi mihtsürü atsü lakheah. Tüsho boto ahihkhüh Atungpuh kilim bedarü. 25Jumonü Barnabanü Saul yimpü Tarsa lim yü; 26tüsho küyimki apinü anihbuh ngükhea, apinü Antiok lim bebah arü. Arünü kam khülang amuyung borü shoru, tüsho mihtsürü boto ato thsangyu; tüsho Antiok ching akinrübo ju akhuhbe thsüde Khristanrü de ajikheah.
27Ju kim ching wukihrübo Jirusalem chingnü Antiok ching aki. 28#Yunir 21.10Tüsho arü bolung khülang amung Agabanü zhipbah alomiküp alala ching khümzung labah de me hode müchit; tüsho ha Klaudia kim ching dünji. 29Tüsho mihbüm aban nihbuhnü akukkhi thülün Judea ching lakhi keoniorübo rungpü yüshihpü jingyanrübonü pungkhi; 30tüsho junangde arünü Barnaba le Saul büne kheaknü azothsürübo kilim ju mühah-a yüshih.
Currently Selected:
YUNIRÜBO RHIMO 11: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
