YUNIRÜBO RHIMO 12
12
Thsümüchikhibo
1Ju kim ching Herod kiulongthsüpuhnü borü ching kheyukrü khürü thsümüchipü tankih. 2Apinü Johan akhiung Jakob nukshangnü laksah; 3tüsho junü Jihudarü asühshihkhi apinü ngübah Peter she arampü tankih. Ha phaüm muyukkhi thünio kim ching lakheah. 4Küyimki apinü anihbuh ramkheanü rihyam ching yuk, tüsho phungho-thünio dunglim mihtsürübo kilim bekhitpü thsüde api ju mihtsürü phüyiyi lakhi bonungrü khunung phüyi kilim aheangshihpü jih. 5Junangde Peter ju rihyam ching zo; tüshe borünü api thsungkheak Thrünpuh ki tamkhüntamnüjih.
Rihyam chingnü Peter Dükhekhi
6Ju re Herodnü api bekhitpü lachoki, Peter ju wuhrünliu mahnenü rhükbah bonungrü mahne dükeak yapde la, tüsho ripit ki aheangrübonü aheangde alakheah; 7tüsho kheahang, Atungpuh yunirü khülang akhiuk, tüsho akhiungshak ching ayin tahyuk; tüsho apinü Peter ju adubuh kheaknü niukmusude tha, “Nahde asürang.” Tüsho wuhrünliubo akhahbo chingnü ayoabah. 8Yunirünü api ki tha, “Nü khimmih yihang tüsho jingkhümpübo khümang.” Tüsho apinü jude thsü. Tüsho apinü anihbuh ki tha, “Nü chim kheak khim rüma lubah I yande arang.” 9Apinü wukhiuk tüsho api yande yü; yunirübonü arhimokhi ju atsütsülim ah de apinü mümükheah, tüshe apinü michih ngüchoh de lüm. 10Küyimki anenü akhuhbuh le mahnepü aheangrü hokheanü kiuto lim yükhi yinchi ripit ki arü. Aküdah thsüde junü ane kilim khimshuhjih, tüsho anenü wukhiukbah kiudunglimro khülang ho; tüsho zukleangnü yunirü ju api kinü dükheakabah. 11Peter ju müsüde arü tüsho tha, “Atungpuhnü api yunirü thiyibah Herod le Jihudarünü mükkin thsükhi alala chingnü I bekhitdo de kheakü inü mütsando.”
12Küyimki api müsükhea, Mark de ajikhi Johan abe Mari yam ching, mihtsürü ahihkhüh mukhunga tamkhüntamnüde alapung yü. 13Apinü ripit aleanglim thrung tüsho Rhoda de ajikhi anünübenü alopü arü. 14Peter düsheak mütsanbah alibenü asühkhinü ripit mükhimshuhjihde alihde yü tüsho ripit ki Peter zhiplah de tha. 15Arünü alibe ki tha, “Nü bünchoh.” Tüshe jude ah de alibenü ningkihde tha. Arünü tha, “Ju api yo yunirü ah!” 16Tüshe Peternü mutuklode thrung; tüsho küyimki arünü akhimshuhkheanü api ngü tüsho müyinsah. 17Tüshe apinü arü ki malanpü akhah niukde thabah, künangde Atungpuhnü rihyam chingnü api bekhitkheanü kheana huh. Tüsho apinü tha, “Ha Jakob tüsho keoniorü ki thaang.” Jushu apinü chamachih tüsho püpü lim yü.
18Küyimki ayinkhikhea, Peter kheak tümü dünjikhea de aheangrü bolung ayingyingkhi ato lakheah. 19Tüsho küyimki Herodnü api yimbah müngükheanü, aheangrübo phüakheah tüsho arü asheshihpü thiyukhüm jih. Ju dunglim Herodnü Judea chingnü Kaesarea ching yükibah ju ching mung.
Herod Shekhi
20Kheakü Herodnü Tair le Sidon mihtsürü kheak bukakhiukde alakheah; jumonü arünü bo khülang thsübah api shorupü yü. Akhuhde arü rungshihpü arünü kiulongthsüpuh-yam atorü Blasta ju shukheam. Jushu arünü Herod ki yübah mungtsü thsungkheak keokhi tümütüsho arü lomi tsühyungbebo ju kiulongthsüpuh lomi chingnü ngüde alakheah. 21Akhukhi nimung Herodnü api kiulongthsürü khim yihbah kiulongthsü-binkiu kheak bin, tüsho arü ki thiyu tha. 22Tüsho mihtsürübonü zhi, “Mihtsürü yung tüshe thrünpuh düsheak ah!” 23Zukleangnü Atungpuh yunirünü api shik, tümütüsho apinü Thrünpuh müremütah; api ju musonü ru tüsho sheabah.
24Tüshe Thrünpuh yu alü jade yü.
25Tüsho Barnaba le Saul bünenü arü rhimo akuk ngü dunglim, Mark de ajikhi Johan bebah Jirusalem chingnü arülo.
Currently Selected:
YUNIRÜBO RHIMO 12: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
