YUNIRÜBO RHIMO 16
16
Timothinü Paul le Sila lung Yükhi
1Paulnü Derbe ching yü tüsho Khristanrü Timothi lapung Lystra ching arü. Abe ju Jihuda liberü akinrü tüsho abuh a Greekrü lakheah. 2Lystra tüsho Ikonium ching keoniorübonü Timothi tsülah de tha. 3Paulnü api lung Timothi arüshihpü mulong; tüsho apinü anihbuh bea lubah jurü dangpung ching lakhi Jihudarübo thsülimnü tsütabahjih, tümüde abuh ju Greekrü lakheah de alalanü mükheahlah. 4Ane kiutobo hode ayüchoki, Jirusalem ching amüsühthsangyurübo tüsho azothsürübonü khikzhakkhibo mihyuanide arhimoshihpü akinrübo ki thade yü. 5Junangde borübo akin ching düküngde kam tüsho nimung aban wühkhe alü kam.
Troa ching Paul Michih
6Tüsho anenü Phrygia le Galatia lomi hode yü, tümütüsho Amüsüh Menü Asia ching müthsangyuthsangrashih. 7Tüsho küyimki ane Mysia aredungyean arükheanü Bithynia lim yüzahpü mürang, tüshe Jisu Menü ane ki mümülü; 8jumonü Mysia hobah anenü Troa lim yüki. 9Tüsho azhing ching Paul ki michih khülang huh: Macedonia mihtsürü khülangnü zhipbah api ki mushude tha, “Macedonia lim arübah isa rungang.” 10Küyimki apinü michih ngükheanü, arü kilim thiyusheakatsü thsangyuthsangrapü Thrünpuhnü ike jikheah de adüngakhibah nahdü lang Macedonia lim yüpü thsakham.
Filipi ching Lydia Mulong Müthrikhi
11Isanü sangkung chingnü tsahmusubah Troa chingnü langde Samothra lim hode yü, tüsho ashidopü Neapoli khiung. 12Ju chingnü Macedonia lomi-chamnak yo kiuto ato, Rom kheang de ajikhi Filipi ching yü. Isanü ju kiuto ching nimung anükhüh mung; 13tüsho Amuni isanü kiuto chipi aleanglim, tamkhüntamnü mukhung dangpung ngüpü mükkin thsüde ayung lim yü. Isanü bin tüsho ju ching mukhungkhi aliberübo ki asukachihpü tankih. 14Isa ki anide alarü bolung aliberü khülang amung Lydia, Thyatira kiuto chingnü, mürümmuchu khimmih yinrü Thrünpuh kingaünrü lakheah. Paulnü athakhi anipü Thrünpuhnü anihbe mulong khimshuhjih. 15Tüsho küyimki alibe ju yamkhün bede baptikheanü isa jide tha, “Nüsanü I Atungpuh ki thiyuro lakhi khejihsho, I yam ching arübah binang.” Tüsho alibenü isa ki reangkihde ji.
Filipi Rihyam ching
16Isa tamkhüntamnü dangpung lim yüde alachoki, menü müchitde aputungrü khide alü thsüshihde alakhi azhorü liberü khülangnü isa shoru. 17Alibenü Paul dunglim zhide yü, “Harü mihtsürü ha nüsa ki akhümkhit limro zhiyukkhi Khide Achang Thrünpuh yamlarübo ah.” 18Tüsho alibenü hade nimung ashang thsü. Tüshe Paulnü mulong zhipzhipde kambah me ki tha, “Alibe kheaknü akhiukpü Jisu Khrista mung chingnü inü nü ki thiyukhüm jihchoh.” Tüsho ju kim chingnü akhiukabah.
19Tüshe küyimki alibe putungrünü arü mulonglam sho-arüpung tsokhi ngükhea, arünü Paul tüsho Sila rambah yinzüyindopung yakzanshuhrübo miki bede yü; 20tüsho arünü ane ju mahkhaptorü miki bede arübah tha, “Harü mihtsürübo ha Jihudarü ah tüsho isa kiuto küpkhuk jihchoh. 21Arünü isa Romrünü müleangkhikhukbe tüsho mürhimokhukbe yakzan mülakhi yakli thsangyuchoh.” 22Botonü mukhungbah ane zündo; tüsho mahkhaptorübonü ane khimmih rukrüpjih tüsho tsobonü arhappü thiyukhümbo jih. 23Khide kingbah arünü rihyam ching yuk, tüsho ane ju tsüde rihdoa zopü aheangrü ki thiyukhüm jih. 24Ha thiyukhüm lubah, apinü ane ju rihyam alungbe ching ane jingbo ching sang khrihyukbah zo.
25Tüshe tsüngphulung ching Paul le Sila büne Thrünpuh ki tamkhüntamnüde tüsho khün thsüde alakheah, tüsho aramrübonü ane ki anide alakheah, 26tüsho zukleangnü ju ching muliuyuk ato züng, junangde rihyam khimtan niuklaplap; tüsho zukleangnü khimdopü alala khimshuh tüsho aramrü wuhrünliubo atreakabah. 27Küyimki aheangbuhnü asürübah khimdopübo khimshuhkhi ngükhea, aramrü alala tsoa lah de lümbah api nukshang lubah aküdah thsüde alaksahpü thsü. 28Tüshe Paulnü düsheak achangnü zhi, “Nü düyuri tümüde isa alala ha ching lah.” 29Apinü tsünbo thsungkheak ji tüsho alihde yüzahbah ajande Paul le Sila büne miki mükhüm, 30tüsho ane bekhitbah tha, “Atorübo, akhümkhitpü thsüde inü tümü rhimoba?” 31Tüsho anenü tha, “Atungpuh Jisu kheak kinang, tüsho nü le nü yamkhün khümkhitbah.” 32Anenü api le ayam ching larü alala ki Atungpuh yu tha. 33Tüsho ju kim chingnü ane bea lubah mübo müsühjih tüsho api yamkhün alala bede api bapti. 34Jushu apinü ane ju api yam ching bede wutu, tüsho ane miki tsühyungbe zojih; tüsho apinü Thrünpuh kheak kinkhi dünkheak api yamkhün alala bede asühachih.
35Tüshe küyimki ayinkhikhea, mahkhaptorübonü bonungrü ki thaa yüshih, “Jurü mihtsürübo tsoshang.” 36Tüsho aheangbuh junü Paul ki thiyusheakbo jih, “Mahkhaptorübonü nüke tsopü thiyia lah; jumonü kheakü akhiukbah mungtsü chingnü tsoang.” 37Tüshe Paulnü arü ki tha, “Isa Rom mihkhung ah, amülim mülade boto mikinü shikbah rihyam ching yukdo; tüsho arünü kheakü ike ramde adükhepü? Yung! Arü arübah ike bekhitshang.” 38Bonungrünü thiyu harü mahkhaptorübo ki tha, tüsho ane Rom mihkhung ah de sobah arünü tre; 39jumonü arünü arübah ane ki neak kheang, tüsho arünü ane bekhitbah kiuto bahbah atsopü tha. 40Junangde anenü rihyam chingnü wukhiukbah Lydia rhuakheah; tüsho küyimki anenü keoniorübo ngükheanü arü ki mulong tuthsuk tüsho chamachih.
Currently Selected:
YUNIRÜBO RHIMO 16: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
