YUNIRÜBO RHIMO 17
17
Tesalonika ching
1Küyimki arünü Amphipoli tüsho Apollonia hokhea, Jihudarü sinagog lapung Tesalonika ching arü. 2Paulnü api susu lakhi nangde yüzahbah amu-khip mahsam amüsühyu chingnü arü ki atsangachih, 3Khrista ju thsünübah tüsho ashe chingnü arhang kamlopü lakheah de thanaka huhde mütsanmükhi jih, tüsho tha, “Inü nüsa ki zhiyukbuh Jisu ha Khrista ah.” 4Khürü a mulong müthribah Paul le Sila büne lung arih; junangde Thrünpuh kingaünrü Greekrü boto tüsho adungto liberü ahihkhühnü jude rhimo. 5Tüshe Jihudarünü mükthsüde kam tüsho kiudunglimrobo chingnü mihbukmuyukbo bemukhungbah kiuto alanajide kamshih tüsho ane ju mihtsürübo ki bede akhiukpü Jason yam zündo. 6Tüsho küyimki arünü ane müngükheanü Jason le keoniorü khürü kiuto limberübo müngüh bebah tsahde zhi, “Alomi neamneamjihrü mihtsürü harü ha ching she arüa lah, 7tüsho Jasonnü ane beyukdo; tüsho arü alalanü Jisu ju kiulongthsüpuh ah de thade Kaesar yakzan azhihchoh.” 8Mihtsürübo tüsho kiuto limberübo ha sobah kipathsükde kam. 9Tüsho arünü Jason le püpürübo ju arhokhitbe jihshihbah dükhea tsoshih.
Berea ching
10Keoniorübonü niokheamde Paul le Sila büne azhing chingnü Berea lim thiyia tsoshih; tüsho küyimki ane akhiungkheanü Jihudarü sinagog ching yüzah. 11Harü Jihudarü a Tesalonika ching larü ruk yungde yakli atsü lakheah, tümüde arünü thiyusheak ju künsahde leangkhi tüsho ju atsütsü a shi de nimung aban amüsühyu yimakheah. 12Jumonü Greekrü athrürü tüsho aliberü adungtobo ahihkhühnü kin. 13Tüshe küyimki Tesalonika ching lakhi Jihudarünü Berea ching she Paulnü thiyusheak zhiyukdo de asokhea, arünü ju ching she arübah boto azhihde thurumusu. 14Keoniorübonü Paul ju niokheamde keto lim thiyia tsoshih; tüshe Sila le Timothi büne a Berea ching binlo. 15Bea-dükherünü Paul ju Athen khiungde bedarü; tüsho Sila le Timothi büne nahde api lung arang dükhi Paul kilimnü thiyusheak lubah chamachih.
Athen ching
16Kheakü Paulnü Athen ching ane aleangde alachoki kiuto ching sangthsübonü amikhi ngübah api khide lümthsünü. 17Jumonü apinü sinagog ching Jihudarü le kingaünrübo tüsho nimung aban yinzüyindopung ching larü ki atsangachih. 18Epikur tüsho Stoik lümlung-yimrü khürünü she api shoru. Tüsho khürünü tha, “Mudukmükerünü tümü thacho?” Püpürünü tha, “Apinü khiungkerü thrünpuhbo dünkheak thachoh khunuh.” Arünü ha tha tümütüsho Paulnü Jisu tüsho arhang kamlokhi dünkheak thsangyuthsangra. 19Tüsho arünü tholobah kiuthsü-binkiu Areopaga miki bedarübah tha, “Nünü athsangyukhi aso ha tümüanü isanü mükheahnelah. 20Nünü hande arükhi khürü aso thsüde isanü sochoh; jumonü harü amütsan isanü mükheahnelah.” 21Kheakü ju ching lakhi Athenrü tüsho khiungkerübonü tümüanü aso thakhi tüsho anikhi ching lang kim hoshih.
22Jumonü Paulnü Areopaga bolung zhipbah tha: “Athen mihtsürübo, nüsa limro alala ching khide akin dükünglah de inü kheahkhitchoh. 23Tümüde I tsahhochoki nüsanü kingaünkhi kukrukbo inü kheahyuk, tüsho kingaün sadam kheak hade thrütkih-a ngü, ‘Mümükheahkhi thrünpuh kilim.’ Jumonü nüsanü tümü kingaünchonü mümükheahkhi ah de inü nüsa ki zhiyukchoh. 24#Yunir 7.48Alomiküp tüsho ju ching lüpdükhi Thrünpuh ju alomi tüsho yinmi Atungpuh ah tüsho khahnü athsükhi arüngyam ching mülachoh. 25Tüsho apinü tümükhüh künkhi nangde mihtsürü khahnü mükipduhchoh, tümütüsho apinü lang mihtsürü alala kilim rhang le sheak tüsho lüpdükhi jihchoh. 26Apinü mihtsürü khülang kheaknü mihtsürü trükshih aban lomi alala ching lapü thsüde thrün; tüsho apinü arü kimbo tüsho lapungbo akhualojih, 27junangde arünü api khiungpü tüsho angüpü mulonglamde Thrünpuh yimbah. Tütüshe api a isa chido kheaknü limshude müla, 28tümüde ‘Api kheak isa lah, aphapchoh tüsho rhangdung lah’; tümüde nüsa yo thiyutsü thrütrü khürünü thaa lah, ‘Isa api tsührübo ah.’ 29Jumonü Thrünpuh tsührübo a le, isanü aphü ju suna, shotoyinchi, lung, kikiukkhi tüsho mihtsürü lümkhi nangde ah de mülümbeah. 30Mümükheahkhi kimbo Thrünpuhnü amümürang thsüdo, tüshe kheaküa lüpdükhi ching mihtsürü alala ki mulong müthripü thiyukhüm jihdo, 31tümütüsho apinü amokhitkhi mihtsürünü thiyuro-lungkinü alomiküp mahkhappü nimung khülang akhukhitdo, tüsho ha apinü ashe chingnü arhang kamloshihkhi hode mihtsürü alala kilim adüngakhi jihdo.”
32Küyimki arünü asherü arhang kamlokhi dünkheak sokhea, khürünü münejih; tüshe püpürünü tha, “Ha dünkheak kheaküshe isanü nü ki anibah.” 33Jumonü Paulnü arü bolungnü wukhiuk. 34Mihtsürü khürünü api lung arih tüsho kin, arü bolung ju kiuthsü-binkiu kheyuk ching berü Dionysia la; kheaküshe aliberü amung Damari, tüsho arü lung püpürübo lakheah.
Currently Selected:
YUNIRÜBO RHIMO 17: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
